Read new_tumbuka_bible Yesaya 59 Bible Online

Yesaya 59 - new_tumbuka_bible bible

Yesaya 59

¹FUMU kuti yilije nkhongono zakumuponoskani chara, nesi njakumangwa makutu chara kuti yireke kupulika.

²Kweni uheni winu uwo mukuchita, ndiwo wamupatulani na Chiuta winu. Zakwananga zinu ndizo zabisa chisko chakhe kwa imwe, mwakuti FUMU yikupulika chara ivyo mukuromba.

³Pakuti mawoko ghinu ngakukazuzgika na ndopa, ndipo minwe ghinu njakukazuzgika na mauheni. Milomo yinu yayowoya utesi pera, ndipo lulimi lwinu nalo lukuyowoya vinthu vya ukazuzi.

⁴Palije na yumoza wakukaka munyakhe mu urunji, palije na yumoza wakuruta ku weruzgi mu unenesko. Wakugomezga mu mphindano zawakawaka na kuyowoya utesi, wakwamba maghanoghano ghaheni na kuchita viheni.

⁵Imwe mukukonkhomora masumbi gha chipiri, na kuruka ukonde wa utatavu. Uyo wakurya masumbi ghawo wakufwa. Usange sumbi limoza lasweka, mukufuma njoka ya chipiri.

⁶Mautatavi ghawo kuti ghamkuŵa na nchito nga nchakuvwara chara. Ŵanthu kuti ŵamkujivwarika na icho ŵapanga chara Milimo yawo ndi milimo ya ubendezi, ndipo mawoko ghawo ghakuwuska vivulupi pera.

⁷Ŵanthu aŵa ŵakuchimbilira ku kuchita uheni, ŵakwenda maluŵiro kuya kakoma ŵanthu ŵambula chifukwa. Ivyo ŵakughanaghana nviheni pera, kose uko ŵakwenda, ŵakuya kaparanya na kukoma.

⁸Nthowa ya mutende kuti ŵakumanya chara, ivyo ŵakuchita kuti ndi vyakunyoroka chara. Wakwenda mu nthowa zakubendera, ndipo uyo wakwenda mu nthowa izi wakuŵa mu mutende chara.

⁹Ŵanthu ŵakuyowoya ŵakuti, “Pa chifukwa ichi weruzgi wakunyoroka uli kutali na ise, ndipo urunji nawo kuti ukutisanga chara. Tikupenja ungweru, kweni tikusanga mdima pera. Tikukhumba kwenda mu kuŵala, kweni tikwenda mu chisi pera.

¹⁰Tikupapaska viliŵa nga ndi ŵanthu ŵachiburumutira, tikupenja nthowa nga ndi ŵanthu ŵambula maso. Na muhanya pakati tikukhuŵara nga ndi usiku, mukati mu ŵanthu ŵankhongono, ise tikuŵa nga ndi ŵakufwa.

¹¹Ise tose tikuwuruma nga ndi vinkharamira, tikulira nga ndi nkhunda. Tikukhumba weruzgi wakunyoroka, kweni tikuwusanga chara. Tikukhumba chiponosko, kweni chikuŵa kutali na ise.”

¹²“Pakuti majuvyo ghithu nganandi panthazi pa imwe FUMU, ndipo kwananga kwithu kukutipanikizga. Majuvyo ghithu ghali nase nyengo zose, ndipo tikughamanya maubendezi ghithu agha:

¹³Tamugarukirani na kumukanani imwe FUMU, tazgokera kunyakhe kureka kurondezga Chiuta withu. Ise tayowoya vyakutindiŵizga na vya kugarukira, tayowoya utesi uwo tili kuvunga mu mitima yithu.

¹⁴Ntheura weruzgi wakunyoroka wawezgekera nyuma, urunji nawo uli kutali na ise. Unenesko mulije mu zimphara za mirandu, ndipo kugomezgeka nako kuti kulimoso chara.

¹⁵Unenesko kuti ukusangikamo chara, ndipo uyo wakureka kuchita uheni wakujiŵika mu visuzgo.” FUMU yikachiwona ichi ndipo yikakondwa nacho chara, pakuti pakaŵavye weruzgi wakunyoroka.

¹⁶FUMU yikawona kuti palije munthu na yumoza, yikazizwa pakuti pakaŵavye na yumoza wakuŵeyerera. Ntheura FUMU na nkhongono zakhe yikamupa kutonda, ndipo na urunji wakhe wakamufighilira.

¹⁷FUMU yikavwara urunji kuŵa nga ndi ngunya ya pa chifuŵa, ndipo chipewa cha chiponosko chikaŵa pa mutu wakhe. Yikavwara nduzga kuŵa nga ndi munjilira wakhe, ndipo ukari ukaŵa nga ndi chakudika chakhe.

¹⁸FUMU yizamkuŵalanga, kwakuyana na ivyo ŵali kuchita. Yizamkurongora ukari ku ŵa vimphindikwa ŵakhe, yizamkuwezgera nduzga ku ŵarwani wakhe ndipo yizamkulanga ŵanthu awo ŵakukhara ku vyaru vya kutali.

¹⁹Ntheura kufuma ku mafumiro gha dazi, mpaka ku manjiliro ghakhe, ŵanthu ŵizamkopa na kuchindika uchindami wa FUMU. Pakuti iyo wati wizenge nga ndi mronga wa maji, agho ghakukanchizgika na mphepo ya FUMU.

²⁰FUMU yikuti, “Muwomboli wamkwiza mu Ziyoni, ku ŵanthu ŵa fuko la Yakhobe, ŵeneawo ŵang'anamuka ku majuvyo ghawo.”

²¹FUMU yikuti, “Kwakuyana na ine, phangano lane na imwe ndi ili: Mzimu wane uwo uli pa imwe ndiposo na mazgu ghane agho ndili kuŵika mu mlomo mwinu, kuti ghamkufumamo mu mlomo mwinu chara nanga ndi mu milomo ya ŵana ŵinu panji ya ŵazukuru ŵinu kwamba sono na kunthazi na kwa muyirayira.”