Read new_tumbuka_bible Yesaya 6 Bible Online

Yesaya 6 - new_tumbuka_bible bible

Yesaya 6

¹Mu chirimika icho wakafwira Karonga Uziya, nkhawona Fumu yakhara pa chizumbe chakhe chitali chakukwezgeka, ndipo umaliro wa munjilira wakhe ukati waka mbyembyelere na kuzura Nyumba ya Chiuta.

²Pachanya pa FUMU, pakimilira ŵaserafi awo ŵakamuteŵeteranga. Muserafi waliyose wakaŵa na mapapindo ghankhonde na limoza. Iyo wakabenekerera chisko chakhe na ghaŵiri, na ghaŵiriso wakabenekerera malundi ghakhe ndipo wakawurukanga na ghanyakhe ghaŵiri.

³Ŵaserafi ŵara ŵakacherezganga ku yumoza na munyakhe kuti, “Mutuŵa, Mutuŵa, Mutuŵa ndi FUMU Mwenenkhongono zose. Charu chose chazura na uchindami wakhe.”

⁴Kuchemerezga kwa mazgu ghawo kukachitiska kuti malufura gha chipata ghasunkhunyike ndipo Nyumba ya Chiuta yikazura na josi.

⁵Ntheura ine nkhachemerezga nkhati, “Soka kwa ine. Ndafwa ine chifukwa ndine munthu uyo wakuyowoya vya ukazuzi, ndipo nkhukhara pamoza na ŵanthu awo ŵakuyowoya vya ukazuzi. Ndipouli ndamuwona Karonga, FUMU Mwenenkhongono zose.”

⁶Penepapo yumoza wa ŵaserafi ŵara wakawurukira kwa ine, wakaŵa na khara la moto leneilo wakalitora na mbano kufuma pa jochero.

⁷Wakakhwaska mlomo wane na khara la moto lira ndipo wakati, “Wona, khara ili lakhwaska mlomo wako. Ntheura uheni wawuskikako kwa iwe ndipo zakwananga zako nazo zagowokereka.”

⁸Penepapo nkhapulika mazgu gha Fumu ghakuti, “Kasi wangaŵa njani uyo ndingamutuma, ndipo ndi njani uyo wati warute mu malo ghithu?” Ndipo ine nkhazgora nkhati, “Ndine pano, nditumani.”

⁹FUMU yikati, “Rutanga, ukaŵaphalire ŵanthu aŵa kuti, ‘Kupulika muti mupulikenge nadi, kweni muti mupulikiskenge chara, kulaŵiska muti mulaŵiskenge nadi, kweni muti muwonenge kanthu chara.’ ”

¹⁰Uyikurungazge mitima ya ŵanthu aŵa, ughazotofye makutu ghawo, ughaburumutizge maso ghawo, mzire ŵawone na maso ghawo, ŵapulike na makutu ghawo, ŵamanyiske na mitima yawo, ndipo ŵang'anamuke mu mtima na kuchizgika.

¹¹Penepapo ine nkhazgora nkhati, “Mwe Fumu, kasi mpaka pauli?” Fumu yikandizgora yikati, “Mpaka misumba yikhare mahami, na yambula ŵanthu ŵakukharamo. Mpaka nyumba zizakazgeŵe ŵanthu ŵakukharamo, ndipo charu nacho chizakaŵe mapopa nkhanira.

¹²Mpaka FUMU yizakasezgere kutali munthu waliyose, ndipo charu chizakaŵe cha mayiyi chambula ŵanthu.

¹³Nangauli munthu yumoza mu ŵanthu khumi wakhareko mu charu, iyo nayo wamkukomekaso. Kweni nga ndi umo chisinga cha muŵanga panji cha musoro, chikukhalirira pa malo apo khuni latemeka, ntheuraso ndimo mbuto yakupatulika yamkuŵiraso chisinga mu charu.”