Read new_tumbuka_bible Yesaya 60 Bible Online

Yesaya 60 - new_tumbuka_bible bible

Yesaya 60

¹Iwe Yerusalemu wuka, ŵara. Ungweru wako wafika, uchindami wa FUMU waŵalira pa iwe.

²Wona, mdima uti ubenekererenge charu cha pasi, ndipo mdima wa bii uti ubenekerere mitundu ya ŵanthu. Kweni FUMU yizamkuŵara pa iwe, uchindami wakhe wizamkuwoneka pa iwe.

³Mafuko ghamkwiza ku ungweru wako, ndipo ŵakaronga ku marazi gha ungweru wako.

⁴Iwe Yerusalemu, inuska maso ghako kosekose, uwone. Wose ŵakuwungana pamoza kuti ŵize kwa iwe. Ŵana ŵako ŵanarume ŵati ŵizenge kufuma kutali, ndipo ŵana ŵako ŵanakazi ŵati ŵayeghekenge mu mawoko.

⁵Penepapo ndipo mwizamkuwona na kusekerera, mtima winu wizamkuyaghanika na kukondwa. Usambazi wa ku mafuko wamkwiza kwa imwe, usambazi wa ŵamitundu wamkwiza kwa imwe.

⁶Miskambo ya ngamila yizamkuŵa posepose mu charu chinu, ngamila zichokozichoko kufuma ku Midiyani na ku Efa. Ŵanthu wose ŵa ku Sheba ŵamkwiza, uku ŵayegha golide na vyakununkhira ndipo ŵizamkupharazga marumbo gha FUMU.

⁷Vyakuŵeta vyose vya ku Kedara vizamkuwunjikika kwa imwe, mberere zanarume za ku Nebayoti zizamkuŵa zinu. Vyeneivi vyamkwiza na kupokerereka kuŵa sembe pa jochero lane, ndipo ndizamkuyitozga nyumba yane ya uchindami.

⁸Kasi ivyo vyati yanja pa maji nga ndi mitambo ndi vichi, ivyo vikuwuruka nga ndi nkhunda madangazi ghawo?

⁹Izi ndi ngaraŵa izo zikwiza kufuma kutali, izo zadangira, zafuma ku Tarishishi, zayegha ŵanthu ŵa Chiuta kuŵawezgera ku kwawo, pamoza na ndarama za siliva na za golide, kwiza kachindika FUMU, Chiuta winu, Mutuŵa Yura wa Israele, pakuti yamupani uchindami ukuru.

¹⁰FUMU yikuti kwa Yerusalemu, “Ŵalendo ndiwo wizamkuzenga malinga ghako, ndipo ŵakaronga ŵawo ndiwo ŵizamkumuteŵeterani. Nangauli apo nkhaŵa mukari, nkhamulangani kweni mukutemwa nditi ndiŵe na lusungu na imwe.

¹¹Vipata vyinu vizamkuŵa mwazi nyengo zose, muhanya na usiku kuti vizamkujarika chara, mwakuti ŵanthu ŵamutoreraninge imwe usambazi wa ŵamitundu, pamoza na ŵakaronga ŵawo awo ŵaŵarongozgenge pakwiza.

¹²Pakuti fuko panji ufumu, uwo wamkureka kumuteŵeterani wamkumara petu, mafuko gha ntheura ghamkupankhuka nadi.

¹³Makuni ghaweme gha nguyi ya Lebanoni, ghamkwiza kwa imwe, makuni gha mulombwa, gha muŵanga na milanje nagho ghamkwiza, kuti ghatozge malo ghane ghakupatulika, ndipo malo agho nkhukandapo malundi ghane ghizamkuchindamiskika.

¹⁴Ŵana ŵa awo ŵakamutindiŵizganinge, ŵamkwiza kwa imwe na kumulambirani. Wose awo ŵakamuyuyuraninge, ŵamkumulambirani pasi pa malundi ghinu, ndipo ŵamkumuchemani kuti Msumba wa FUMU, Ziyoni wa Mutuŵa Yura wa Israele.”

¹⁵Nangauli ukarekeka na kutinkhika na ŵanthu, kwambula na yumoza wakwendamo mwa iwe, ine nditi ndikuzgore kuŵa msumba ukuru na wakutowa, wakupereka chimwemwe ku ŵanthu ŵa miwiro na miwiro.

¹⁶Nga ndi mwana wakonkha wizamkurya chuma cha ŵanthu ŵa mitundu yinyakhe, ndipo ŵakaronga ŵawo ŵizamkukupwererera. Ntheura ŵizamkumanya kuti ine FUMU ndine Muponoski, na kutiso kuti ndine Muwomboli wako, Chikurukuru Yura wa Yakhobe.

¹⁷Mu malo mwa mkuŵa, ndizamkukupa golide, mu malo mwa chisulo, ndizamkukupa siliva. Mu malo mwa makuni ndizamkukupa mkuŵa mu malo mwa mawe ndizamkukupa chisulo. Ŵakumuwusani ndiwo wizamkupereka mutende kwa imwe, ndipo awo ŵakumurongozgani ndiwo ŵaŵenge urunji winu.

¹⁸Vivulupi kuti vyamkupulikikwaso chara mu charu chako, nanga nkhupakhuka panji kubwanganduka kwa mphaka zinu, Viliŵa vyinu mwizamkuvichema kuti “Chiponosko”, ndipo vipata vyinu mwizamkuvichema kuti, “Marumbo.”

¹⁹“Dazi kuti lizamkuŵaso ungweru wako chara na muhanya, nanga ndi mwezi kuti wizamkukupa ungweru chara na usiku. Pakuti FUMU ndiyo yiti yiŵenge ungweru winu wa muyirayira, ndipo Chiuta winu ndiyo wati waŵenge uchindami winu.

²⁰Dazi linu kuti lamkunjiraso chara, ndipo mwezi nawo kuti wamkufipiskika chara. FUMU ndiyo yiti yiŵenge ungweru winu kwa muyirayira, ndipo mazuŵa ghinu ghakutengera ghizamkumara.

²¹Penepapo ŵanthu ŵako wizamkuchita icho mburunji, ndipo wizamkukhara charu kwa muyirayira. Wizamkuŵa chiphukira icho ine ndekha nkhapanda, nadi mlimo wa mawoko ghane mwakuti ndirongore uchindami wane.

²²Nyumba yichoko chomene mukati mwinu, yizamkuŵa fuko la ŵanthu ŵanandi. Mtundu uchoko chomene wizamkuŵa wa nkhongono chomene. Ine ndine FUMU, ndipo pa nyengo yakhe ndizamkuchifiska ichi mwaluŵiro.”