Read new_tumbuka_bible Yesaya 61 Bible Online

Yesaya 61 - new_tumbuka_bible bible

Yesaya 61

¹Mzimu wa FUMU Chiuta uli pa ine, pakuti FUMU yili kundiphakazga ine, kuti ndipharazge uthenga uweme ku ŵakavu. Yili kundituma kuti ndichizge ŵa mitima yakusweka, kuti ndipharazge wanangwa ku awo ŵali mu uzga, ndiposo na kuŵasutula awo ŵali mu gadi.

²FUMU yili kundituma kuti ndipharazge, nyengo chisungusungu chakhe, na nyengo iyo yiti yiwezgerenge nduzga ku ŵarwani ŵakhe, ndiposo na iyo yiti yipembuzgirenge ŵakulira,

³kuŵapa awo ŵakutengera mu Ziyoni, nkhata ya utozi ya maluŵa mu malo mwa kujithilira vyoto, mafuta gha kukondwa mu malo mwa kutengera sumu ya marumbo mu malo mwa chitima. Ŵati ŵachemeke kuti “Musoro wa urunji, makuni ghakupandika na FUMU”, kuti yirongore uchindami wakhe.

⁴Wizamkuzengaso mahami gha kale, na kuwezgeraso malo agho ghakapasuka kale. Wizamkunozgaso misumba iyo yikabwanganduka, misumba iyo yikapasuka pa virimika vinandi.

⁵Ŵalendo ndiwo ŵizamkuliska mberere zinu, ŵanthu ŵa kutali ndiwo ŵizamkulima minda yinu ya mpheska.

⁶Kweni imwe muti muchemekenge ŵasofi ŵa FUMU, muti muchemekenge ŵateŵeti ŵa Chiuta withu. Mwamkuryanga usambazi wa ŵamitundu, ndipo mu usambazi wawo ndimo mwamkuthumbwira.

⁷Mu malo mwakukhozgeka soni, mwamkupokera phande paŵiri. Mu malo mwa kuyuyurika, muti musekererenge mu icho mwagaŵikira. Ntheura muti mupokere phande paŵiri mu charu chinu, ndipo mwamkuŵa na chimwemwe cha muyirayira.

⁸FUMU yikuyowoya kuti, “Ine nkhutemwa weruzgi wakunyoroka, nkhutinkha unkhungu na machitiro ghaheni. Mwakugomezgeka ndizamkuŵapa njombe yawo, ndipo ndizamkuchita phangano la muyirayira na iwo.

⁹Ŵa mphapu yawo ŵizamkumanyikwa mukati mu mafuko ghanyakhe. Ŵazukuru ŵawo nawo ŵizamkumanyikwa mukati mu ŵanthu wose. Munthu yose uyo wizamkuŵawona wizamkumanya, kuti ndi ŵanthu awo FUMU yili kuŵatumbika.”

¹⁰Ine nkhusekerera chomene mwa FUMU, mzimu wane ukukondwera mwa Chiuta wane. Pakuti wandivwarika chiponosko nga ndi malaya, wandidikiska urunji nga ndi munjilira. Ndili nga ndi mwene-nthengwa uyo wajitozga na nkhata ya maluŵa, panji nga ndi mwali uyo wajitozga na vitowelo vyakhe.

¹¹Umo charu chikumezgera mbewu, ndiposo umo munda ukumezgera ivyo vyapandika mwenemumo, ndimo FUMU Chiuta wizamkurongorera urunji wakhe, ndipo ŵamitundu yose ŵizamkumurumba iyo.