Read new_tumbuka_bible Yesaya 62 Bible Online

Yesaya 62 - new_tumbuka_bible bible

Yesaya 62

¹Pa chifukwa cha Ziyoni ine kuti ndichetamenge chara, chifukwa cha Yerusalemu ine kuti ndikharenge chete chara, mpaka urunji wakhe uŵale nga ndi ungweru wa mulenje ndipo chiponosko chakhe nga ndi nyali yakugolera.

²Ŵamitundu ŵizamkuwona urunji wako, ŵakaronga wose ŵizamkuwona uchindami wako. Wizamkukuchema na zina liphya, ilo FUMU yekha yizamkukuthya.

³Wizamkuŵa mphumphu ya uchindami mu woko la FUMU, ndiposo mphumphu ya ufumu mu woko la Chiuta wako.

⁴Iwe wizamkukuchemaso chara kuti “Wakurekeka,” nesi kuchema charu chako kuti “Mapopa.” Kweni wizamkuchemeka kuti, “Wakutemweka wane.” Ndipo charu chako chizamkuchemeka kuti, “Mutengwa.” Pakuti FUMU yizamkukondwera mwa iwe ndipo charu chako chizamkutengwa kwa FUMU.

⁵Umo munyamata wakutorera mwali wakulangwa, ndimo ŵana ŵako ŵizamkutorera iwe. Umo mwene-nthengwa wakukondwera na mwali uyo wakumutora, ndimo Chiuta winu wizamkukondwera na imwe.

⁶Iwe Yerusalemu naŵikapo ŵalinda pa malinga ghako, iwo kuti ŵati ŵakharenge chete chara muhanya na usiku. Mose imwe mukuromba FUMU, mureke kukhara chete chara.

⁷Mureke kukhara chete chara, mpaka FUMU yikhozge Yerusalemu, na kuwuzgora msumba kuŵa wakurumbika mu charu.

⁸FUMU yarapa na woko lakhe la maryero, yarapa na nkhongono ya woko lakhe yati, “Ine kuti ndiperekeso tirigu wako, kuŵa chakurya cha ŵarwani ŵako chara, ŵakwiza kuti ŵamkumwaso vinyo muphya chara, ilo iwe wafukafukira.

⁹Kweni awo ŵamkuvuna ndiwo ŵamkurya, ndiwo ŵamkurumba FUMU. Awo ŵakuyaŵa mpheska ndiwo ŵamkumwa maji ghakhe, mu mabaraza gha malo ghane ghakupatulika.”

¹⁰Sorotani! Sorotani pa vipata! Nozgani msewu kuti ŵanthu ŵizakendemo. Wundirani! Wundirani msewu! Wuskanimo mawe, kwezgani ndembera kuti ŵamitundu ŵayiwone.

¹¹FUMU yapharazga, ku charu chose cha pasi yati, “Yowoyani ku ŵanthu ŵa mu Ziyoni muti, ‘Wonani Muponoski winu wakwiza.’ Iyo wakwiza na njombe yakhe, nadi wakwiza kuti waŵalipira awo mbakhe.”

¹²“Iwo ŵati ŵachemeke kuti, ‘Ŵanthu Ŵakupatulika’, ‘Ŵakuwombokwa ŵa FUMU’. Iwe wizamkuchemeka kuti, ‘Wakupenjeka’, ‘Msumba uwo Undasidike’.”