Read new_tumbuka_bible Yesaya 63 Bible Online

Yesaya 63 - new_tumbuka_bible bible

Yesaya 63

¹Kasi ndi njani uyo wakwiza kufuma ku Edomu, uyo wavwara malaya ghachesamu kufuma ku Bozira? Kasi ndi njani uyo wavwara malaya gha uchindami, wakwenda mwakujikuzgira mu nkhongono zakhe zikuru? Ndine FUMU, ine nkhuyowoya vya kutonda, ndili na nkhongono kuponoska.

²Kasi malaya ghinu ghachesama na vichi, ghali nga ndi gha uyo wali mu chakukamiramo vinyo?

³Ine ndakandirizga ndekha ŵamitundu nga ndi mpheska, palije na yumoza uyo wakandovwirako. Nkhaŵakandirizga ndili mu ukari. Ndopa zawo zikamijikira pa vyakuvwara vyane, na kunanga malaya ghane ghose.

⁴Pakuti ili likaŵa zuŵa lakuwezgera nduzga, chirimika chakuwombolera ŵanthu ŵane.

⁵Nkhalaŵiska, kweni pakaŵavye wakundovwira, nkhazizwa kuti kukaŵavye na yumoza wakukhozgerapo. Ntheura nkhatonda na nkhongono za ine ndekha, ukari wane ndiwo ukandovwira.

⁶Mu ukari wane nkhaŵakandira pasi ŵamitundu. Mu kutukutwa kwane nkhaŵaloŵezga ndipo nkhathira pasi ndopa zawo.

⁷Ine nditi ndiphare vya lusungu lwa FUMU, milimo iyo FUMU yikwenera kurumbika, kwakuyana na vyose ivyo yili kutichitira ise. Nadi FUMU yachita vinandi chomene, kuchitira ŵaIsraele kwakuyana na kuzara kwa chisungusungu chakhe, na kutemwa kwakhe kukuru.

⁸Pakuti FUMU yikuti, Nadi ŵeneawo ndi ŵanthu ŵane. Mbana ŵane awo kuti ŵangandipusika chara, ndipo FUMU yikazgoka kuŵa Muponoski wawo.

⁹Mu visuzgo vyawo vyose, iyo nayo yikasuzgika nawo. Kuti wakaŵa mungelo chara uyo wakaŵaponoska kweni yikaŵa FUMU iyo yekha. Yikaŵawombola mu kutemwa na mu lusungu lwakhe, yikaŵanyamura na kuŵayegha mu mawoko ghakhe, mazuŵa ghose gha mwaka.

¹⁰Kweni ŵakayigarukira FUMU, na kukwiyiska Mzimu wakhe Utuŵa. Ntheura yikazgoka kuŵa murwani wawo, ndipo yikalimbana nawo.

¹¹Penepapo ŵakakumbuka mazuŵa ghakale, mazuŵa gha Mozesi na ŵanthu ŵakhe. Kasi wali nkhu uyo wakaŵambuska nyanja, muliska wa mberere, ŵanthu ŵakhe? Kasi wali nkhu uyo wakaŵika Mzimu Mutuŵa, mukati mu ŵanthu ŵakhe?

¹²Ndi njani uyo wakatuma nkhongono zakhe za uchindami, kuti ziteŵete kwizira mwa Mozesi? Ndi njani uyo wakagaŵa maji paŵiri uku ŵanthu ŵakuwona, mwakuti zina lakhe limanyikwe kwa muyirayira.

¹³Ndi njani wakaŵaporoteska mu ndimba ya nyanja? Nga ndi hachi mu chiparamba, iwo kuti wakukhuŵara chara.

¹⁴Mzimu wa FUMU ukaŵapumuzga nga ndi ng'ombe izo zikusanga chipumuro mu dambo. Ntheura ndimo imwe FUMU mukarongozgera ŵanthu ŵinu mwakuti zina linu limanyikwe na ŵanthu ŵa mafuko ghose.

¹⁵Kufuma kuchanya nkhanira uko mukukhara, ku malo ghinu ghakupatulika na gha uchindami laŵiskani kuti mutiwone ise. Kasi phamphu linu na nkhongono zinu vili nkhu? Kunweka kwa mtima winu na chiwuravi vyakanizgika kwa ise.

¹⁶Kweni imwe ndimwe dada withu, nangauli Abrahamu ise wakutimanya chara, nesi Israele kuti wakutimanyiska ise chara. Imwe, Mwe FUMU ndimwe Dada withu, Ndimwe Muwomboli withu kufuma papo kale, leneili ndilo zina linu.

¹⁷Imwe, Mwe FUMU, kasi mukutirekerachi kuti tipurukenge mu nthowa zinu? Kasi nchifukwa uli mukutirekera kuti tinonofyenge mitima yithu, mwakuti tikureka kumuchindikani imwe? Wererani chifukwa cha ŵateŵeti ŵinu, mafuko gha ŵanthu ŵinu agho nchiharo chinu.

¹⁸Ŵanthu ŵinu ŵakupatulika ŵakakharapo nagho malo ghinu ghakupatulika pa kanyengo kachoko waka. Kweni ŵarwani ŵithu ŵaghabwangandulira pasi.

¹⁹Ise tazgoka kuŵa nga mbanthu awo kuti mukaŵawusapo na kale chara, panji nga ndi ŵanthu awo mbinu na ŵinu chara.