Read new_tumbuka_bible Yesaya 64 Bible Online

Yesaya 64 - new_tumbuka_bible bible

Yesaya 64

¹Mwe FUMU mphanyi mwanguparura mlengalenga, na kukhilira pa charu cha pasi, mwakuti mapiri ghatentheme panthazi pinu.

²Nga ndi umo moto ukochera thengere, nga ndi umo ukugaduskira maji, khirani kuti ŵarwani ŵinu ŵamanye zina linu, ndiposo kuti ŵamitundu ŵatentheme panthazi pinu.

³Para imwe mukachita milimo yakofya, iyo ise tikagomezgeka chara, imwe mukakhilira pa charu cha pasi, ndipo mapiri ghakatenthema panthazi pinu.

⁴Kufuma ku mutendeko na yumoza wali kupulikapo, panji kutegherezgapo na makutu ghakhe, nesi kuwonapo Chiuta munyakhe pa dera pa imwe, uyo wakuchita vyakuzukumiska, kuchitira awo ŵakumugomezga.

⁵Mukovwira awo na kusekerera ŵakuchita icho nchakunyoroka, ŵeneawo ŵakukumbuka kwenda mu nthowa zinu. Kweni para ise tikarutilira kumunangirani imwe, imwe mukatikaripira. Nadi, taŵa ŵakumunangirani nyengo yitali, sono kasi ise tingaponoskeka uli?

⁶Tose tazgoka nga mbanthu ŵakukazuzgika, milimo yithu yose ya urunji yili nga ndi laya lakufipirwa. Tose tikufota nga ndi mahamba. Ndipo maubendezi ghithu ghakutiwuruskira kutali nga ndi umo yikuchitira mphepo.

⁷Palije na yumoza uyo wakusopa zina linu, panji uyo wakulimbalimba kuti wademerere kwa imwe. Pakuti imwe mwarazgira nkhongono kwa ise, ndipo mwatireka kuti tisuzgike chifukwa cha zakwananga zithu.

⁸Ndipouli, imwe, Mwe FUMU ndimwe ŵadada, ise ndise dongo, imwe ndimwe muwuvi. Tose ndise mlimo wa mawoko ghinu.

⁹Mwe FUMU, mureke kutikaripira mwakurutilira, nanga nkhukumbuka zakwananga zithu kwa muyirayira. Mwe FUMU, tikumuŵeyani, laŵiskani kwa ise, pakuti ise tose ndise ŵanthu ŵinu.

¹⁰Misumba yinu yakupatulika yazgoka mapopa, Ziyoni wazgoka mapopa, Yerusalemu wazgoka mayiyi.

¹¹Nyumba yithu yakupatulika na yakutowa, umo ŵasekuru ŵithu ŵakamurumbiraninge imwe, yili kocheka na moto. Malo ghithu ghose ghakukondweska, ghazgoka kuŵa mahami.

¹²Mwe FUMU, kasi muti mukharenge waka chete pa vyose ivi? Kasi muchetamenge waka, na kutilanga ntheura mwakurutilira?