Read new_tumbuka_bible Yesaya 65 Bible Online

Yesaya 65 - new_tumbuka_bible bible

Yesaya 65

¹FUMU yikuti, “Ine nkhaŵa wakunozgeka kupenjeka, na awo kuti ŵakandirombanga chara. Nkhaŵa wakunozgeka kusangika, na awo kuti ŵakandipenjanga chara. Ku fuko ilo likachindika zina lane chara, nkhati kwa iwo, Ndine pano! Ndine pano.”

²Nyengo yose nkhutandaula mawoko ghane, kupokera awo ŵakundigarukira, ŵanthu awo ŵakwenda mu nthowa ziheni, ŵeneawo ŵakuchita ivyo ŵakukhumba iwo ŵekha.

³Ndi ŵanthu awo ŵandavya ine mwakanandi chomene, uku ine nkhuwona na maso ghane. Ku minda yawo ndiko ŵakuperekera sembe, ndipo pa majochero gha njerwa ndipo ŵakochera vyakununkhira.

⁴Ŵeneaŵa ŵakutandara ku mararo, ndipo ŵakukhara usiku wose mu malo ghakubisika. Iwo ŵakurya nyama ya nkhumba, ndipo ŵakuŵika musuni wa vinthu vya ukazuzi, mu ŵadira ŵakuryeramo.

⁵Iwo ŵakuti, Kharani kwa mwekha, mureke kwiza pafupi na ise chara, pakuti ise ndise ŵakupatulika chomene kuruska imwe. Ŵanthu aŵa ndi josi mu mphuno zane ndi moto uwo ukugolera zuŵa lose.

⁶Wonani, mrandu wawo walembeka panthazi pa ine kuti, “Ndiwezgerenge nduzga kuti ndikharenge chete chara. Nadi, nditi ndiwezgerenge nduzga zakuŵayenelera.

⁷Nditi ndiŵalange iwo pamoza na ŵawiskewokuru, chifukwa cha zakwananga zawo. Nditi ndiŵalange chifukwa cha kocha vyakununkhira pa mapiri, ndipo ŵakundituka ine pa tumapiri. Ntheura nditi ndiŵawezgere nduzga zakuŵayenelera, pa ivyo ŵakachita kale.” Ntheura ndimo yikuyowoyera FUMU.

⁸FUMU yikuti, “Para vinyo wali mu makunje gha mpheska, ŵanthu ŵakuti, ‘Mureke kuyinanga, pakuti uweme uchali mwenemumo.’ Ntheura ndimo nditi ndichitirenge na ŵateŵeti ŵane, kuti nditi ndiŵamare wose chara.

⁹Mwa Yakhobe, nditi ndifumyengemo mphapu yinyakhe, mwa Yuda, nditi ndifumyengemo ŵazukuru, awo ŵati ŵaharenge charu chane cha mapiri. Ŵanthu ŵane ŵakusoreka ŵati ŵaharenge charu ichi, ndipo ŵateŵeti ŵane ŵati ŵakharenge mwenemumo.

¹⁰Charu cha Sharoni, chizamkuŵa luhari lwa miskambo, ndipo Dambo la Akori lizamkuŵa malo ghakupumulirako miskambo ya ng'ombe, ku ŵanthu ŵane awo ŵakundipenja ine.”

¹¹Kweni imwe mwayireka FUMU, mwaruwa phiri lane lakupatulika, ndipo mukunozgera vyakurya ŵachiuta ŵa mwaŵi, na kuŵazuzgira ŵachiuta ŵa soka[4] ŵadira ŵa vinyo wakusazgikana.

¹²Ine nditi ndimunozgerani kuti mukafwire ku nkhondo, ndipo mose mwizamkukomekanga waka. Pakuti para ine nkhamuchemani, imwe kuti mukandizgora chara, para ine nkhayowoya, imwe mukandipulika chara. Imwe mukachita icho nchiheni panthazi pane, mukasankha kuchita icho nchambula kundikondweska.

¹³Ntheura FUMU Chiuta wakuti, “Ŵateŵeti ŵane ŵizamkuŵa na chakurya, kweni imwe mwizamkufwa na njara. Ŵateŵeti ŵane ŵizamkuŵa na vyakumwa, kweni imwe mwizamkomirwa, ŵateŵeti ŵane ŵizamkukondwa, kweni imwe mwizamkukhozgeka soni.

¹⁴Ŵateŵeti ŵane ŵizamkwimba, kufuma mukukondwa kwa mu mtima. Kweni imwe mwizamkulira, chifukwa cha vyakuŵinya vya mu mtima, mwizamkutengera chifukwa cha kukweŵeka mu mtima.

¹⁵Ŵanthu ŵane ŵakusankhika, ŵati ŵazunurenge zina linu para ŵakutemba. Ndipo FUMU Chiuta wizamkumukomani, kweni ŵateŵeti ŵakhe ŵizamkuŵapa zina linyakhe.

¹⁶Yose uyo wakurombera vitumbiko mu charu, wati warombere mu zina la Chiuta uyo wakuyowoya unenesko. Yose uyo wakurapa chirapo mu charu, wachitire mu zina la Chiuta uyo wakuyowoya unenesko. Pakuti visuzgo vya kale vili kuruwika, ndipo kuti vyamkuwonekaso chara.”

¹⁷FUMU yikuyowoya yikuti, “Wonani, nditi ndilenge kuchanya kuphya, na charu cha pasi chiphya. Vya kale kuti vyamkukumbukikaso chara, vyose vya kale vyamkuruwikirathu.

¹⁸Kweni kondwani na kusekerera kwa muyirayira, mwa icho nkhuchilenga. Wonani nkhulenga Yerusalemu muphya wakukondwereska, na ŵanthu ŵakhe kuŵa chimwemwe.

¹⁹Ine ndizamkukondwa na Yerusalemu, ndipo ndizamkusekerera na ŵanthu ŵane. Kulira kuti kwamkupulikikaso mu chara, mazgu ghakutengera kuti ghamkupulikikwa chara.”

²⁰“Kwamkuŵaso bonda chara uyo wamkukhara mazuŵa ghachoko waka, nesi muchekuru uyo wakureka kukhara virimika vyakhe vyose. Munthu uyo wamkufwa na virimika 100, wamkupimika kuti ndi bonda. Munthu uyo wamkutondeka kufika virimika 100, wamkupimika kuti ngwa kutembeka.

²¹Ŵanthu ŵane ŵizamkuzenga nyumba na kukharamo, ŵizamkulima minda ya mpheska na kurya vipambi vyakhe.

²²Ŵizamkuzenga nyumba kuti munyakhe wakharemo chara, panji kupanda mpheska ndipo yunji kurya vipambi vyakhe chara. Nga ndi umo viliri virimika vya makuni, ndimo ŵanthu ŵane ŵati ŵakhalire na virimika vinandi. Ŵakusoreka ŵane ŵizamkukoroka ivyo ŵachita na mawoko ghawo.

²³Kuti ŵamkuchita nchito yambula chandulo chara, nesi kubaba ŵana kuti ŵizakakumane na soka chara. Pakuti ŵamkuŵa ŵanthu awo ŵatumbikika na FUMU, iwo pamoza na ŵana ŵawo.

²⁴Ŵachali kundiromba, ndizamkuŵazgora, apo ŵachali kuyowoya, ndamkuŵapulika.

²⁵Mphumphi na ŵana-mberere vyamkuryera pamoza, nkharamu nayo yamkurya utheka nga ndi ng'ombe, ndipo fuvu lamkuŵa chakurya cha njoka. Mu phiri lane lose lakupatulika, kwamkuŵavye wakupweteka panji kukoma munyakhe.” Ntheura ndimo yikuyowoyera FUMU.