Read new_tumbuka_bible Yesaya 66 Bible Online

Yesaya 66 - new_tumbuka_bible bible

Yesaya 66

¹ FUMU yikuti, “Kuchanya ndi chizumbe chane, charu cha pasi nchitambaliro cha malundi ghane. Kasi ndi nyumba uli iyo mungandizengera? Kasi ndi malo uli agho ndingamanya kupumulirapo.

²Asi mawoko ghane ndigho ghakalenga vyose ivi, ntheura vinthu vyose nvyane?” Ntheura ndimo yikuyowoyera FUMU. “Ŵanthu awo ine nkhucha nawo ndi aŵa: Awo ŵakujiyuyura na ŵa mtima wa kurapa, awo ŵakopa ine na kupulika mazgu ghane.

³Pali ŵanji awo ŵakuchita ivyo ŵakukhumba. Kwa iwo kukoma nkhambako kuŵa sembe, kukulingana na kukoma munthu. Kukoma mwana-mberere kuŵa sembe, kukulingana na kukoma ncheŵe. Kupereka sembe ya ufu, kukulingana na kupereka ndopa za nkhumba. Kupereka vyakununkhira kuŵa sembe ya chikumbusko, kukulingana na kulambira chikozgo. Ŵanthu aŵa ŵali kujisankhira mendero ghawo, ndipo mtima wawo ukukondwera na maukazuzi ghawo.

⁴Ine nane nditi ndiŵatorere visuzgo, nditi ndiŵizire na icho chingaŵawofya. Pakuti para nkhaŵachema, na yumoza wakandizgora, Para nkhayowoya, iwo ŵakategherezga chara. Iwo ŵakachita icho chikaŵa chiheni panthazi pane, ŵakasankha kuchita icho nchambula kundikondweska.”

⁵Pulikani mazgu gha FUMU, imwe mukutenthema para mukupulika mazgu ghakhe: “Ŵabali ŵinu awo ŵakumutinkhani, ndipo ŵakumukanani chifukwa cha zina lane ŵakunena kuti, ‘FUMU yirongore uchindami wakhe, mwakuti ise tiwone chimwemwe chinu.’ Kweni aŵa ndiwo ŵati ŵakhozgeke soni.

⁶Pulikani chivulupi kufumira mu msumba, pulikani mazgu kufumira mu Nyumba ya Chiuta. Mazgu agha yikuyowoya ndi FUMU, kuwezgera nduzga pa ŵarwani ŵakhe.”

⁷Msumba wane uli nga ndi mwanakazi uyo wakubaba pambere wandapulike vyakuŵinya, uyo wakubaba mwana mwanarume pambere wandapulike urwirwi.

⁸Kasi ndi njani uyo wali kupulikapo cha ntheura ichi? Ndi njani uyo wali kuwonapo vya ntheura ivi? Kasi charu chingapangika mu zuŵa limoza? Kasi fuko lingababika mu nyengo yimoza? Kweni msumba wa Ziyoni ukababa ŵana ŵakhe ŵanarume ukati wamba waka kupulika vyakuŵinya.

⁹FUMU yikuti, Kasi ine ndingamufikiska mwanakazi pa nyengo ya kubaba, kwambula kuti ndimovwire kuti wababe mwana? Kasi ine ndingajara nthumbo, para nkhovwira mwanakazi pakubaba?

¹⁰Sekererani pamoza na Yerusalemu, kondwerani chifukwa cha msumba uwu, mose imwe mukuwutemwa. Sekererani pamoza na msumba uwu, mose imwe mukuwutengerera.

¹¹Pakuti muti monkheko na kukhuta, pa maŵere ghakhe gha chisangurusko. Muti mumwe chomene, ndipo muti mukondwe na uchindami wakhe wakufikapo.

¹²Chifukwa FUMU yikuti, “Nditi ndikuzgireko mutende kwa iyo nga ndi mronga, ndipo usambazi wa ŵamitundu nga ndi mronga wakufurukira. Muti munkheko na kuyegheka pa mbeyeka, na kusanguruskika pa chipakato chakhe.

¹³Umo mama wakupembuzgira mwana wakhe, ndimo ine nditi ndipembuzgire imwe, imwe muti mupembuzgike pakuŵa mu Yerusalemu.

¹⁴Para mwamkuwona ichi, mwamkusekerera mu mtima, mathupi ghinu ghamkuti waka tefutefu nga ndi utheka. Nkhongono ya FUMU yamkumanyikwa pa ŵateŵeti ŵakhe, ndipo yaŵakwiyira ŵarwani ŵakhe.

¹⁵Wonani, FUMU yamkwiza na moto, ndipo magareta ghakhe ghati ghafike nga ndi kavuruvuru. Iyo yiti yirongore ukari wakhe wakofya, ndipo kuchenya kwakhe nkhwa dimi la moto wakumyangura.

¹⁶Pakuti na moto ndiposo na nkhondo, FUMU yizamkulanga ŵanthu wose ŵa charu cha pasi, awo ŵizamkukomeka na FUMU ŵizamkuŵa ŵanandi.”

¹⁷FUMU yikuti, “nyengo ya kumalira wose awo ŵakujipatula na kujitozga kuti ŵachite maluso ghawo gha ku minda yira yikwiza. Iwo ŵakurondezga murongozgi wawo, na kurya nyama ya nkhumba, ya mbeŵa na vya ukazuzi vinyakhe.

¹⁸Ine nkhumanya milimo yawo na maghanoghano ghawo. Ine nditi ndizenge kwiza kawunganya ŵamitundu yose na ŵa viyowoyero vyakupambanapambana. Iwo ŵamkwiza ndipo ŵamkuwona uchindami wane.

¹⁹Nditi ndimike chimanyikwiro mukati mwawo. Mu ŵeneawo kwamkuŵa ŵanyakhe awo ŵamkuponapo awo ndamkuŵatuma kuti ŵarute ku ŵamitundu nga ŵa ku Tarishishi, ku Libiya, ku Ludi, uko kukaŵa ŵanthu ŵakumanya mauta, ku Tubala, na ku Yavani ndiposo na mu vyaru vya kutali vya mu mphepete mwa nyanja, ŵeneawo ŵandapulikepo lumbiri lwane panji kuwona uchindami wane. Ŵeneaŵa ndiwo ŵizamkupharazga za uchindami wane ku ŵamitundu.

²⁰Ŵeneaŵa ndiwo ŵamkumutorerani ŵabali ŵinu wose kufuma ku vyaru vya ŵamitundu, na kuŵapereka kwa FUMU kuŵa nga ndi chawanangwa kwa ine. Ŵati ŵizenge nawo ku phiri lane lakupatulika la Yerusalemu uku waŵayegha pa mahachi, pa magareta, pa machira, pa mbunda, na pa ngamila. Ŵati ŵizenge nga ndi umo ŵaIsraele ŵakwizira na chawanangwa cha chakurya ku Nyumba ya Chiuta icho ŵachiyeghera pa chiteŵetero chakutowa chomene.

²¹Ndipo ŵanji ŵa iwo ndizamkusankha kuŵa ŵasofi ŵa ŵaLevi.” Ntheura ndimo yikuyowoyera FUMU.

²²FUMU yikuti, “Nga ndi umo viti vikhalirirenge panthazi pane, kuchanya kuphya na charu chiphya, ivyo nditi ndilengenge, ntheura ndimo ŵa mphapu yinu na zina linu, viti likhalirirenge kwa muyirayira.”

²³FUMU yikuti, “Kwamba pa kuthwasa kwa mwezi umoza mpaka pa kuthwasa kwa unyakhe, kwamba pa zuŵa la Sabata limoza mpaka pa zuŵa linyakhe la Sabata, ŵanthu wose ŵamkwiza kuti ŵasope panthazi pane.”

²⁴“Ŵanthu ŵamkufumira kuwaro kwa msumba ndipo ŵamkuwona vitanda vya ŵanthu awo ŵakandigarukira ine. Mphorozi izo zamkuŵaryanga kuti zamkufwa chara, ndipo moto uwo wizamkuŵawocha kuti wamkuzimwa chara. Ŵanthu wose awo ŵamkuchiwona ichi, ŵamkuseruskika nacho.”