Read new_tumbuka_bible Yesaya 8 Bible Online

Yesaya 8 - new_tumbuka_bible bible

Yesaya 8

¹FUMU yikayowoya kwa ine yikati, “Tora chakulembapo chisani ndipo ulembepo malembo ghakuŵazgika makora kuti, ‘Kuparanya Kwa Luŵiro, Kuskogha Kwambula Kuchedwa’.

²Ntheura nkhajitorera ŵakaboni ŵamagomezgeko, musofi Uriya na Zakariya mwana wa Yeberekiya, kuti ŵandisimikizgire.”

³Pamanyuma nkhanjira mu muwoli wane nchimi yanakazi ndipo wakaŵa na nthumbo na kubaba mwana mwanarume. Sono FUMU yikati kwa ine, “Mwana uyo umuthye zina lakuti, ‘Kuparanya Kwa Luŵiro, Kuskogha Kwambula Kuchedwa’.

⁴Pambere mwana uyo wandambe kuchema kuti, ‘Adada’ panji ‘Amama’, usambazi wa mu Damaseko na vyakuskogha vya mu Samariya vizamkutoreka na karonga wa charu cha Asiriya.”

⁵FUMU yikayowoyaso kwa ine yikati,

⁶“Pakuti ŵanthu aŵa ŵakana maji gha Shilowa agho ghakwenda makoramakora, ndipo ŵakusekerera mwa Rezini na Peka mwana wa Remaliya,

⁷ntheura Fumu yiti yitume karonga wa charu cha Asiriya kuti wize na nkhondo pa charu cha Yuda. Iyo wati wizenge pa iwo nga ndi maji ghanandi gha mronga wa Yufurate agho ghakwiza na nkhongono, ndipo ghati ghafurukire mu tumifwerenje tose mpaka mu vibumira vya mronga.

⁸Ŵasilikari aŵa ŵati ŵatandazgike mu charu chose cha Yuda nga ndi chigumura cha maji icho chikufurukira posepose mpaka mu singo. Ŵati ŵaŵe nga ndi mapapindo agho ghatandaukira na kubenekerera charu chako chose, iwe Imanuwele.”

⁹Imwe ŵamitundu, wunganani kunozgekera nkhondo, ndipouli muti musakazikekenge. Pulikani ichi, imwe vyaru vyose vya kutali. Nozgekerani nkhondo, kweni muti musakazikenge. Nadi, nozgekerani nkhondo, kweni muti musakazikenge.

¹⁰Wunganani pamoza, kweni wupu winu uti uparanyike waka. Panganani ivyo muti muchite, kweni viti vitondekenge, pakuti Chiuta wali nase.

¹¹FUMU yikayowoya kwa ine mwa nkhongono ndipo yikandisoka kuti ndireke kwenda mu nthowa ya ŵanthu aŵa, yikati,

¹²“Ureke kuyowoya kuti nchiŵembu chose icho ŵanthu aŵa ŵakuti nchiŵembu ndipo ureke kopa ivyo iwo ŵakopa, nanga nkhutenthema navyo.

¹³FUMU Mwenenkhongono zose ndiyo yekha uyipimenge kuŵa yakupatulika, ndiyo yekha ukwenera kuyiwopa, ndipo ndiyo yekha ukwenera kutenthema nayo.

¹⁴Iyo ndiyo yiti yiŵenge malo ghakupatulika. Kweni yiŵenge libwe lakutinkhika, jarawe lakukhuŵarapo nyumba ziŵiri za Israele, diŵa na chipingo ku awo ŵakukhara mu Yerusalemu.

¹⁵Ŵanthu ŵanandi ŵizamkukhuŵarapo. Ŵizamkuwa na kuphyoka. Ŵizamkuwira mu chipingo na kukoreka.”

¹⁶Sungani chilayizgo, didimizgani chisambizgo mukati mu ŵasambiri ŵane.

¹⁷Nditi ndilindilire FUMU, iyo yikubisa chisko chakhe ku ŵa fuko la Yakhobe, ndipo nditi ndigomezge mwa iyo pera.

¹⁸Wonani, ine pamoza na ŵana awo FUMU yili kundipa, ndise chimanyikwiro na chirongorero ku ŵaIsraele kufuma kwa FUMU Mwenenkhongono zose, iyo yikukhara pa Phiri la Ziyoni.

¹⁹Para ŵanthu ŵakumuphalirani kuti, “Penjani ku ŵawukwi na ku ŵamayere, ŵeneawo ŵakuyowoya mazgu gha pasipasi na kuphwepwerezga, asi ŵanthu ŵakwenera kufumba ŵachiuta ŵawo? Kasi ŵafumbenge ku ŵakufwa mu malo mwa awo mbamoyo,

²⁰kuti ŵapokere visambizgo na visimikizgo?” Nadi, awo ŵakuyowoya ntheura ŵati ŵawone nanga nkhaungweru chara.

²¹Ŵanthu ŵamkuyingayinga waka mu charu uku ŵakusuzgika chomene na kupulika njara. Chifukwa cha kupulika njara, ŵizamkukaripa ndipo ŵizamkulaŵiska kuchanya na kwamba kutemba karonga wawo na Chiuta wawo.

²²Ŵizamkulaŵiska pasi ndipo ŵizamkuwona visuzgo pera na mdima wakofya chomene wa bii. Ntheura ŵizamkuponyeka mu mdima weneuwo.