Read new_tumbuka_bible Yesaya 9 Bible Online

Yesaya 9 - new_tumbuka_bible bible

Yesaya 9

¹Kweni ŵanthu awo ŵakaŵa mu urwirwi, kuti ŵamkuŵaso na suzgo chara. Mu nyengo ya kale, Chiuta wakayuyura charu cha Zebuloni na cha Nafutali, kweni mu nyengo iyo yikwiza, wizamkuchindika Galileya, charu cha ŵamitundu icho chili mu nthowa ya mu nyanja, ku sirya linyakhe la mronga wa Yorodani.

²Ŵanthu awo ŵakendanga mu mdima, ŵawona ungweru ukuru. Awo ŵakakharanga mu charu cha mufwiri wa nyifwa, ungweru waŵaŵalira.

³Mwe FUMU, mwandaniska fuko linu, ndipo mwasazgirako chimwemwe chawo. Ntheura ŵakukondwa panthazi pinu, nga ndi umo ŵanthu ŵakukondwera pa nyengo ya kuvuna, umoso ŵanthu ŵakukondwera pakugaŵana vya kuskogha.

⁴Pakuti imwe mwaphyora goliwoli ilo likaŵanyekezganga, na ndodo iyo ŵakatimbiranga pa viŵegha vyawo, ndiposo na muchiza wa awo ŵakaŵatindiŵizganga, nga ndi pa zuŵa ilo mukathereskera Midiyani.

⁵Nadi viryato vyose vya musilikari, na chakuvwara chilichose icho chili na ndopa, vizamkocheka pa moto nga ndi nkhuni.

⁶Pakuti mwana wababika kwa ise, mwana mwanarume waperekeka kwa ise. Iyo ndiyo wati wawusenge. Wati wachemekenge zina lakuti, “Movwiri Wakuzizwiska, Chiuta Mwenenkhongono zose, Dada wa Muyirayira, Karonga wa Mutende.”

⁷Muwuso na mutende wakhe vikulirengekulirenge, kuti vizamkumara chara. Iyo wizamkuwusira pa chizumbe cha Karonga Davide. Wizamkumwimika na kuwukhozga, na weruzgi wakunyoroka ndiposo na urunji, kwamba sono na kwa muyirayira. FUMU Mwenenkhongono zose, yapanikizga kuti yiti yichitenge nadi ichi.

⁸Fumu yatuma mazgu ghakususka Yakhobe, ndipo ghawa pa ŵaIsraele.

⁹Ŵanthu wose ŵati ŵamanyenge ichi, ndiwo ŵaEfurayimu na awo ŵakukhara mu Samariya, ŵeneawo ŵakuyowoya mwakujikuzga, na mitima yakujitukumura kuti,

¹⁰“Nangauli nyumba za njerwa zagumuka, ise tizengengeso na mawe ghakuŵaja. Nangauli migororo ya vikuyu yawiskikira pasi, ise tiŵikenge migororo ya milanje mu malo mwakhe.”

¹¹Ntheura FUMU yaŵawuskira ŵavimphindikwa kulimbana nawo, yakhuŵirizga ŵarwani ŵawo kurwa nawo.

¹²ŴaSiriya ku mafumiro gha dazi na ŵaFilisiti ku zambwe, ŵayasama ku mlomo kumirimitizga ŵaIsraele. Ndipouli ukari wa FUMU ulije kugowoka, woko lakhe ndakunyoroka ndipera kuŵalanga.

¹³Ŵanthu ŵara ŵalije kuwerera kwa Chiuta mweneuyo wakaŵalanga, nesi kupenja FUMU Mwenenkhongono zose.

¹⁴Ntheura mu zuŵa limoza FUMU yadumula mutu wa Israele pamoza na muchira wakhe, munthavi wa mukama na thete.

¹⁵Mutu ndi ŵararaŵarara na ŵanthu ŵakuzirwa, muchira ndi nchimi izo zikusambizga vya utesi.

¹⁶Pakuti awo ŵakurongozga ŵanthu aŵa ŵakuŵapuruska, ndipo awo ŵakurongozgeka ŵakutayika.

¹⁷Pa chifukwa ichi, Fumu kuti yikakondwa na ŵanyamata ŵawo chara, nesi kuŵa na chiwuravi na ŵalanda na vyokoro. Pakuti waliyose ngwambula kopa Chiuta na wakuchita uheni, ndiposo wakuyowoya vya uchindere pera. Ndipouli ukari wa FUMU kuti ukagowoka chara, woko lakhe likaŵa lakunyoroka ndipera kuŵalanga.

¹⁸Nadi, uheni ukugolera nga ndi moto, ukumyangura mkolankhanga na minga. Ukubuska matundu gha mu thengere, mwakuti ukuthuvukira muchanya mu josi la kusunkha.

¹⁹Kwizira mu ukari wa FUMU Mwenenkhongono zose, charu chizamkuphya. Ŵanthu ŵati ŵaŵe nga ndi khuni zakupembere moto, ndipo palije na yumoza wamkuthaska mwana munyakhe.

²⁰Iwo ŵakukwapura chakurya na woko la maryero, kweni wati wakhutenge chara. Ŵati ŵakwapure chakurya na woko la mazere, napo kuti ŵati ŵakhutenge chara. Waliyose wakurya na ŵana ŵakhe wuwo.

²¹Fuko la Manase lamkurwa na fuko la Efurayimu, ndipo la Efurayimu na fuko la Manase, ghose pamoza ghamkurwa na charu cha Yuda. Ndipouli nanga vikaŵa ntheura, ukari wa FUMU kuti ukagowoka chara, woko lakhe likaŵa lakunyoroka ndipera kuŵalanga.