Read new_tumbuka_bible Levitiko 1 Bible Online

Levitiko 1 - new_tumbuka_bible bible

Levitiko 1

¹FUMU yikamuchema Mozesi para yikaŵa mu Chihema Chakukumaniranamo ndipo yikati kwa iyo,

²“Uyowoye ku ŵaIsraele uti kwa iwo, ‘Para munthu yose wa imwe wakwiza na chakupereka kwa FUMU, wizenge na chakuŵeta kufumira mu ng'ombe, panji mberere na mbuzi, panji mbuzi’.

³Usange munthu uyo wakupereka sembe yakocha, wizenge na ng'ombe yanarume yambula kalema. Ndipo wizenge nayo pa muryango wa Chihema Chakukumaniranamo mwakuti yiŵe yamapokerereko panthazi pa FUMU.

⁴Munthu uyo waŵike woko lakhe pa mutu wa ng'ombe yira ndipo yiti yiŵenge yamapokerereko kuti yiŵe sembe yakuphepiskira zakwananga zakhe.

⁵Wakome nkhambako yira panthazi pa FUMU, ndipo ŵasofi ŵa mbumba ya Aroni ŵize na ndopa za nkhambako yira na kumija jochero zingirizge ilo liri pa chipata cha Chihema Chakukumaniranamo.

⁶Ndipo wafuŵe nyama ya sembe yira na kuyicheketa tuchokotuchoko.

⁷Ŵana ŵa musofi Aroni ndiwo ŵati ŵapembe moto pa jochero na kuŵika khuni pa moto makora ghene.

⁸Ndipo ŵana ŵa musofi Aroni ndiwo ŵati ŵaŵike tuvipitika twa nyama yira pamoza na mutu na mafuta ghakhe pa nkhuni za moto izo zili pa jochero.

⁹Kweni vya mukati na malundi ghakhe wasuke na maji, ndipo musofi wati woche vyose ivi pa jochero kuŵa sembe yakocha na moto ya sungu liweme kwa FUMU.

¹⁰“Usange munthu wakupereka sembe yakhe yakocha ya mberere panji ya mbuzi, wakwenera kupereka yanarume yambula kalema.

¹¹Wati wayikomere panthazi pa FUMU ku dera la ku mpoto kwa jochero, ndipo ŵana ŵa musofi Aroni ndiwo ŵati ŵamije ndopa zakhe pa jochero zingirizge.

¹²Musofi wayicheke nyama yira tuchokotuchoko ndipo wayiŵike makora ghene pamoza na mutu wakhe na mafuta ghakhe pa nkhuni za moto izo zili pa jochero.

¹³Kweni vya mukati na malundi ghakhe wasuke na maji. Ndipo musofi wati wapereke vyose ivi na kuviwocha vyose pa jochero kuŵa sembe yakocha na moto ya sungu liweme kwa FUMU.

¹⁴“Usange munthu wakupereka sembe yakocha ya viyuni kwa FUMU, wakwenera kupereka nkhunda panji viwunda.

¹⁵Musofi wize nayo ku jochero na kuyikoma pakuyinyongorora singo na kudumula mutu wakhe, ndipo mutu uwo wawuwoche pa jochero. Ndopa zakhe wanthonyezgere mu mphepere mwa jochero.

¹⁶Wawuskeko chifoliro pamoza na mahungwa ghakhe na kuvitaya mu mphepete mwa jochero ku mafumiro gha dazi uko wakuthira vyoto.

¹⁷Musofi wayiparure pakati uku phapindo limoza uku limoza kwambula kuyipanthulirathu ndipo wayiwoche pa nkhuni izo zili pa jochero kuŵa sembe yakocha na moto ya sungu liweme kwa FUMU.