Read new_tumbuka_bible Levitiko 10 Bible Online

Levitiko 10 - new_tumbuka_bible bible

Levitiko 10

¹Ŵana ŵa Aroni, Nadabu na Abihu, waliyose wakatora chakusunkhizgirapo vyakununkhira na kuŵikamo makara gha moto. Ndipo wakaŵikapo vyakununkhira na kupereka moto wambula kupatulika panthazi pa FUMU, cheneicho ŵakaŵavye kuzomerezgeka kuchichita.

²Penepapo FUMU yikatuma moto na kuŵamyangura wose ndipo wakafwira panthazi pa FUMU.

³Mozesi wakati kwa Aroni, “Ichi ndicho FUMU yikayowoyanga para yikati, ‘Wose awo ŵali pafupi na ine, Ine nditi ndijirongore kuŵa wakupatulika. Panthazi pa ŵanthu wose, Ine nditi ndirongore uchindami wane.’ ” Ndipo Aroni wakasoŵa na chakuyowoya wuwo.

⁴Mozesi wakachema Mishayele na Elizafani, ŵana ŵa Uziyele, sibweni wa Aroni ndipo wakati kwa iwo, “Sendererani pafupi, ndipo muŵawuskepo vitanda vya ŵavyara ŵanyinu aŵa pa Chihema Chakupatulika na kuvifumiskira kuwaro kwa msasa.”

⁵Ntheura ŵakasenderera pafupi na kuŵayeghera mu malaya ghawo kuwaro kwa msasa nga ndi umo Mozesi wakalangulira.

⁶Penepapo Mozesi wakamuphalira Aroni na ŵana ŵakhe Eleyazara na Itamara kuti, “Mungarekanga kupesa masisi ghinu nanga nkhuparura vyakuvwara vyinu kurongora kuti mukulira. Usange muchitenge ichi, muti mufwenge, ndipo FUMU yiti yikwiyirenge mpingo wose. Kweni ŵabali ŵinu, ŵaIsraele wose, ŵangalira chifukwa cha nyifwa iyo yachitika na moto uwo FUMU yatuma.

⁷Mungafumangapo pa muryango wa Chihema Chakukumaniranamo chara, mzire mufwe, chifukwa mukaphakazgika na mafuta gha FUMU.” Ntheura ŵakachita nga ndi umo Mozesi wakayowoyera.

⁸Penepapo FUMU yikati kwa Aroni,

⁹“Iwe na ŵana ŵako mureke kumwa vinyo panji moŵa, para mukunjira mu Chihema Chakukumaniranamo. Usange mumwenge muti mufwenge. Ili liŵe dango la muyirayira mu miwiro yinu yose.

¹⁰Mupambaniskenge pakati pa icho nchakupatulika na chambula kupatulika, pakati pa icho nchambula kuphotoka na chakuphotoka.

¹¹Muŵasambizge ŵaIsraele marango ghose agho FUMU yili kupereka kwizira mwa Mozesi.”

¹²Mozesi wakati kwa Aroni na ŵana ŵakhe awo ŵakakharapo Eleyazara na Itamara, “Torani sembe ya ufu iyo yakharako ku sembe yakocha kwa FUMU ndipo murye yambula chirungo pa mphepete pa jochero pakuti njakupatulika nkhanira.

¹³Muyiryere mu malo ghakupatulika chifukwa ndilo phande lako na ŵana ŵako kufumira mu sembe yakocha kwa FUMU. Pakuti ntheura ndimo ndakulangulira.

¹⁴Kweni iwe na ŵana ŵako ŵanarume na ŵanakazi murye, pa malo ghali ghose agho ngakupatulika, nganga na chigha ivyo vyaperekeka mwakuzungunya. Pakuti ivi vyaperekeka na ŵaIsraele kuŵa phande la iwe na mbumba yako kufuma mu sembe ya wenenawene.

¹⁵Chigha icho chaperekeka na nganga iyo ŵayizungunya, ŵati ŵize navyo pamoza na sembe yakocha ya mafuta, na kuvizungunya kuŵa sembe yakuzungunya panthazi pa FUMU. Ivi viti viŵenge phande lako na ŵana ŵako kwa muyirayira nga ndi umo FUMU yili kulangulira.”

¹⁶Sono Mozesi wakafumba za mbuzi ya sembe yakuphepiskira kwananga, ndiyo wakasanga kuti yocheka kale. Ntheura wakakwiyira Eleyazara na Itamara ŵana ŵa Aroni awo ŵakakharako, na kuti kwa iwo,

¹⁷“Kasi nchifukwa uli mundaryere sembe yakuphepiskira kwananga yira mu malo ghakupatulika? Iyi ndi sembe yakupatulika nkhanira ndipo yikaperekeka kwa imwe kuti muwuskeko kwananga kwa mpingo pakuŵaphepiskira panthazi pa FUMU.

¹⁸Pakuti ndopa zakhe zikanjizgika mu Malo Chakupatulika nkhanira chara, mphanyi mukaryera mu malo ghakupatulika nga ndi umo nkhalangulira.”

¹⁹Aroni wakamuzgora Mozesi wakati, “Muhanya uno ŵanthu ŵapereka sembe zawo zakuphepiskira kwananga na sembe zawo zakocha kwa FUMU. Ndipouli vinthu vyakofya vyandiwira ine. Usange ine ndiryenge sembe yakuphepiskira kwananga muhanya uno, kasi mphanyi yanguŵa yamapokerereko panthazi pa FUMU?”

²⁰Mozesi wakati wapulika ichi, wakakhorwa.