Read new_tumbuka_bible Levitiko 11 Bible Online

Levitiko 11 - new_tumbuka_bible bible

Levitiko 11

¹FUMU yikati kwa Mozesi na Aroni,

²“Muŵaphalire ŵaIsraele, muti, ‘Pa nyama zose za mu charu, izo mungarya ndi izi:

³Nyama yose iyo vikandiro vyakhe nvyakugaŵikana, ndipo yikusumbira ivyo yabyokora.

⁴Ndipouli mukati mwa ivyo vikusumbira, na kubyokora panji ivyo ndi vikugaŵikana vikandiro paŵiri, mureke kurya ivi: Ngamila, nangauli yikusumba ivyo yabyokora, kweni vikandiro vyakhe kuti nvyakugaŵikana chara. Ntheura njakukazuzgika kwa imwe.

⁵Mbira, nangauli yikusumba ivyo yabyokora, kweni vikandiro vyakhe kuti ndi vyakupatukana paŵiri chara. Ntheura nayo njakukazuzgika kwa imwe.

⁶Kalulu, nangauli wakusumbira ivyo wabyokora, kweni vikandiro vyakhe kuti ndi vyakupatukana chara. Ntheura njakukazuzgika kwa imwe.

⁷Nkhumba, nangauli vikandiro vyakhe ndi vyakupatukana paŵiri, kweni kuti yikusumbira chara. Ntheura njakukazuzgika kwa imwe.

⁸Nyama izi mureke kurya nanga nkhukhwaska mathupi ghawo pera para zafwa, pakuti ndi zakukazuzgika kwa imwe.’ ”

⁹Ivi ndi vilengiwa ivyo vikukhara mu maji vyeneivyo mungamanya kurya. Vilengiwa vyose vya mu maji ivyo vili na viphepe na mamba, manyi vili mu nyanja panji mu mironga.

¹⁰Kweni chilengiwa chose cha mu nyanja panji cha mu mironga icho chilije chiphepe panji mamba, mukati mu vilengiwa vyose ivyo vikwenda mu chiwunjiwunji mu maji, ndiposo na vyamoyo vyose vya ntheura vya mu maji, nvyakukazuzgika kwa imwe.

¹¹Vyamoyo vyose vya ntheura viŵenge vya ukazuzi kwa imwe, ndipo mureke kurya. Ndipo para vyafwa, mathupi ghawo mughanyanyarenge.

¹²Cha moyo chilichose icho chikukhara mu maji cheneicho chilije chiphepe panji mamba, ncha ukazuzi kwa imwe.

¹³Mwa viyuni ivyo muvipimenge kuŵa vya ukazuzi ndipo mureke kurya ndi ivi: Nombo, chipungu, nkhwazi,

¹⁴londoŵara, kaŵando kwakuyana na mtundu wakhe,

¹⁵ŵachihoŵe wose kwakuyana na mitundu yawo,

¹⁶nthiŵatiŵa, manchinchi, mbuyi, nyarweŵe na mtundu wakhe,

¹⁷phururu, njoyo, visasa,

¹⁸baka, nyangenyange, khuŵi,

¹⁹khonongo, kataŵa kwakuyana na mtundu wakhe, kamukuŵezi na kasuska.

²⁰Vibenene vyose vya mapapindo ivyo vili na malundi ghanayi, nvya ukazuzi kwa imwe.

²¹Pali vibenene vinyakhe vya mapapindo ivyo vikwenda na malundi ghanayi vyeneivyo mungarya. Ivi ndi ivyo vili na minkhozo pachanya pa malundi ghawo na kwenda mwa kubwanthira.

²²Mwa ivyo mungaryapo ndi ivi: zombe kwakuyana na mtundu wakhe, phanana kwakuyana na mtundu wakhe, noni kwakuyana na mtundu wakhe, ndiposo na mphazi kwakuyana na mtundu wakhe.

²³Kweni vibenene vyose vinyakhe vya mapapindo ndipo vili na malundi ghanayi, nvya ukazuzi kwa imwe.

²⁴“ ‘Munthu waliyose wati waŵe wakukazuzgika na nyama izi: Yose uyo wakukhwaska thupi la chinyama chakufwa wati waŵe wakukazuzgika kufikira na mise.

²⁵Yose uyo wati wayeghe chigaŵa chimoza cha mathupi gha nyama ya kufwa, wakwenera kuchapa vyakuvwara vyakhe, ndipo wati waŵe wakukazuzgika kufikira na mise.’ ”

²⁶“ ‘Chinyama chilichose icho vikandiro vyakhe ndi vyakupatukana paŵiri kweni malundi kuti ndi ghakugaŵikana chara ndiposo yikusumbira chara ivyo chabyokora, njakukazuzgika kwa imwe. Yose uyo wati wakhwaske mathupi ghawo ghakufwa, waŵe wakukazuzgika.

²⁷Pa nyama zose izo zili na malundi ghanayi, zeneizo zikwenda na vikufi, ndi zakukazuzgika kwa imwe. Yose uyo wakukhwaska mathupi ghawo ghakufwa wati waŵe wakukazuzgika kufikira na mise.

²⁸Yose uyo wati wayeghe mathupi ghawo ghakufwa, wakwenera kuchapa vyakuvwara vyakhe, ndipo wati waŵe wakukazuzgika vikufikira na mise. Vyeneivi ndi vyakukazuzgika kwa imwe.’ ”

²⁹“ ‘Pa ivyo ndi vyakukhwaŵa, vyakukazuzgika ndi ivi: msuru, mbeŵa, gwarawara kwakuyana na mtundu wakhe,

³⁰kabwezang'anga, kaŵaŵa, mutondoli, katukuŵara na lwivi.

³¹Vyakukhwaska vyeneivi nvyakukazuzgika kwa imwe, ndipo yose uyo wakukhwaska mathupi ghawo ghakufwa, wati waŵe wakukazuzgika kufikira na mise.

³²Ndipo chilichose cha ichi usange chafwa ndipo chawira pa chinthu chilichose, chinthu icho chiti chiŵenge chakukazuzgika, manyi ncha khuni panji chakuvwara, panji chikumba, panji chigudulu, manyi chingaŵa chiteŵetero uli icho nchakuteŵeteramo mlimo. Chinthu icho chichapike na maji kweni chiŵenge chakukazuzgika kufikira na mise. Penepapo ndipo chiti chiŵenge chakuphotoka

³³Usange chinyama chakufwa chilichose chawira pa chiŵiya, chose icho chili mwenemumo, ndi chakukazuzgika ndipo chiŵiya icho mukwenera kuswa.

³⁴Maji ghakufuma mu chiŵiya chakukazuzgika icho, para ghathikira pa chakurya chilichose, chakurya icho chiti chiŵenge chakukazuzgika. Maji nagho agho ghali mu chiŵiya icho ngakukazuzgika.

³⁵Chigaŵa chimoza cha nyama yakufwa para chawira pa chilichose, chinthu icho chiti chiŵenge chakukazuzgika, manyi ndi mafigha panji chakuphikapo, ndipo chikwenera kusweka pakuti ndi vyakukazuzgika na kwa imwe wuwo.

³⁶Mbwiwi panji chisimi cha maji chiti chiŵenge chakuphotoka, kweni yose uyo wakukhwaska chinyama icho chafwira mu maji wati waŵenge wakukazuzgika.

³⁷Usange chigaŵa chimoza cha nyama yakufwa chawira pa mbuto iyo yipandikenge, mbuto iyo yiti yiŵenge yakuphotoka.

³⁸Kweni usange maji ghathikirapo pa mbuto ndipo chigaŵa chimoza cha nyama yakufwa chawira pa mbuto, mbuto iyo njakukazuzgika kwa imwe.’ ”

³⁹“ ‘Usange nyama iyo mukurya yafwa yekha ndipo munthu wakukhwaska nyama iyo, wati waŵenge wakukazuzgika kufikira na mise.

⁴⁰Munthu uyo waryako nyama yakufwa iyi, wachape vyakuvwara vyakhe, kweni iyo wati waŵenge wakukazuzgika kufikira na mise. Nanga ndi uyo wayeghako nyama iyi, nayo wachape vyakuvwara vyakhe, kweni iyo wati waŵenge wakukazuzgika kufikira na mise.’ ”

⁴¹“ ‘Chilengiwa chose icho chikukhwaŵa pa charu, nchakukazuzgika, ndipo mureke kurya.

⁴²Mureke kurya chilengiwa chilichose icho chikukhwaŵa, manyi chikukhwaŵa na nthumbo, panji chikwenda na malundi ghanayi, panji na malundi ghanandinandi, pakuti cha ntheura nchakukazuzgika.

⁴³Mureke kujikazuzga pakurya chimoza cha vinthu ivi vikukhwaŵa, panji kujikazuzga na ivyo, nesi kuti chimoza chimukazuzgani.

⁴⁴Ine ndine, FUMU, Chiuta winu. Ntheura mujipatuliske. Muŵenge ŵatuŵa, pakuti ine ndili mutuŵa. Mureke kujikazuzga na chilengiwa chilichose icho chikukhwaŵa.’ ”

⁴⁵“ ‘Ine ndine FUMU, mweneuyo wakamufumiskani mu Eguputo mwakuti ndiŵenge Chiuta winu. Ntheura muŵenge ŵatuŵa, pakuti ine ndili mutuŵa.’ ”

⁴⁶“ ‘Ili ndi dango ilo likukhwaska vinyama, viyuni, chamoyo chose icho chikwenda mu maji na chilichose icho chikukhwaŵa.

⁴⁷Ndi dango ilo likurongora mphambano pakati pa chakukazuzgika na chakuphotoka, pakati pa nyama iyo ŵanthu ŵangarya na iyo wangareka kurya.’ ”