Read new_tumbuka_bible Levitiko 12 Bible Online

Levitiko 12 - new_tumbuka_bible bible

Levitiko 12

¹FUMU yikati kwa Mozesi,

²“Uŵaphalire ŵaIsraele kuti, ‘Usange mwanakazi wali na nthumbo ndipo wababa mwana mwanarume, wati waŵenge wambula kuphotoka kwa mazuŵa ghankhonde na ghaŵiri, nga ndi umo wakuŵira para wali ku mwezi.

³Pa zuŵa la chinkhonde na chitatu mwana uyo wakotoreka.

⁴Mwanakazi yura wati warutilire mukujitozga ku ndopa zakhe mazuŵa 30. Ndipo wareke kukhwaska kanthu kose kakupatulika nanga nkhunjira mu Chihema Chakupatulika ghasuke ghafikepo mazuŵa ghakhe ghakujitozgera.’ ”

⁵“ ‘Usange wababa mwana, mwanakazi wati waŵenge wambula kuphotoka kwa mazuŵa 14, nga ndi umo wakuŵira para wali ku mwezi. Ndipo wati warutilire mu kujitozga ku ndopa zakhe mazuŵa 66.’ ”

⁶“ ‘Para mazuŵa ghakutozgeka kwakhe ghamara pa mwana mwanarume panji mwanakazi, wize na mwana-mberere wa chirimika chimoza kwa musofi kuŵa sembe yakocha, na chiwunda panji nkhunda kuŵa sembe ya kwananga pa muryango wa Chihema Chakukumaniranamo.

⁷Musofi wati wapereke sembe izi panthazi pa FUMU na kumuphepiskira mwanakazi yura ndipo iyo wati waphotoke ku ndopa zakhe. Ili ndilo dango la mwanakazi uyo wababa mwana mwanarume panji mwanakazi.’ ”

⁸“ ‘Usange watondeka kusanga mwana-mberere, watore nkhunda ziŵiri panji viwunda viŵiri, yimoza ya sembe yakocha ndipo yinyakhe ya sembe ya kwananga. Ntheura musofi wamuphepiskire mwanakazi uyo ndipo wati waŵenge wakutozgeka.’ ”