Read new_tumbuka_bible Levitiko 13 Bible Online

Levitiko 13 - new_tumbuka_bible bible

Levitiko 13

²“Usange munthu wali na chitufya, panji phumba panji kabanga mu chikumba cha thupi lakhe ndipo kakuwoneka nga ndi nthenda ya vyoni, ŵize nayo kwa musofi ŵa mbumba ya Aroni panji kwa yumoza wa ŵana ŵakhe.

³Musofi yura wati wapime kabanga ka pa thupi la munthu yura, ndipo usange weya wanjira kujumpha chikumba cha pa thupi lakhe, ndi vyoni. Para musofi wamupima ntheura wamuphalire kuti, ‘Uli wakukazuzgika.’

⁴Kweni usange kabanga nkhatuŵa ndipo kuti kanjira kujumpha weya chara, ndiposo weya wa penepapo undazgoke utuŵa, musofi wamupatule kuti wakhare pa yekha kwa mazuŵa ghankhonde na ghaŵiri.

⁵Musofi wamupimeso pa zuŵa la chinkhonde na chiŵiri, ndipo usange wamuwona kuti kabanga kandasinthe, kweniso kandaparare mu chikumba chakhe, wamupatuleso kuti wakhare pa yekha kwa mazuŵa ghanyakhe ghankhonde na ghaŵiri.

⁶Pa zuŵa la chinkhonde na chiŵiri, musofi wamupimeso ndipo usange kabanga kati waka bii, na kuti kandaparare mu chikumba chakhe, wamuphalire kuti, ‘Wakuphotoka, kanguŵa waka kachiŵawu.’ Munthu uyo wachape vyakuvwara vyakhe ndipo wati waŵe wakuphotoka.

⁷Kweni usange chiŵawu chira chikuparara chomene mu chikumba, pamanyuma pakuwoneka kale kwa musofi kuti watozgeka, wakwenera kawonekaso pa maso pa musofi.

⁸Musofi wati wamupimengeso ndipo usange wasanga kuti chiŵawu chikuparara, penepapo wamuphalire kuti, ‘Uli wakukazuzgika na vyoni.’ ”

⁹“Usange munthu wali na vyoni, watorekere kwa musofi.

¹⁰Musofi wamupime ndipo usange pali chakutupa icho nchituŵa pa chikumba chakhe icho chazgora weya kuŵa utuŵa, ndipouli pali chilonda mukati mwa chakutupa,

¹¹ndi nthenda ya vyoni vya papo kale iyo yili mu thupi lakhe. Penepapo musofi wamuphalira kuti, ‘Ndiwe wakukazuzgika.’ Ndipo kuti wati wamupatule chara chifukwa ngwa kukazuzgika.”

¹²“Usange vyoni vyatunkha mu chikumba ndipo vyaparara mu thupi la murwari yura, kufuma ku mutu mpaka ku malundi ghakhe kwakuyana na umo musofi wamuwonera,

¹³penepapo musofi wamupime. Usange vyoni vyaparara nadi thupi lose, wamuphalire kuti ngwa kuphotoka ku nthenda yira. Pakuti yose yazgoka yituŵa, ngwa kuphotoka.

¹⁴Kweni usange chilonda chikuwoneka pa thupi lakhe ndiko kuti ngwa kukazuzgika.

¹⁵Musofi wamupimeso ndipo usange wakuwona chilonda, wamuphalire kuti ngwa kukazuzgika. Chilonda ichi nkhuwura kuphotoka pakuti ivi ndi vyoni.

¹⁶Usange chilonda chira chasinthaso ndipo chazgoka chituŵa, penepapo wize kwa musofi.

¹⁷Musofi wamupime ndipo usange chilonda chazgoka chituŵa, musofi wati wamuphalire kuti iyo ngwa kuphotoka, ndipo nadi waŵenge wakuphotoka.”

¹⁸“Usange munthu yunji wali na chitufya pa chikumba chakhe, ndipo chapora,

¹⁹sono pa bamba la phumba pakutunkha chitufya chituŵa panji kabanga kachesamu kakusazgikana na utuŵa, munthu uyo wize kwa musofi.

²⁰Musofi wachipime chilonda chira, ndipo usange chanjira kujumpha chikumba, ndipo weya wakhe nawo wazgoka utuŵa, wamuphalire munthu yura kuti ngwa kukazuzgika. Iyi ndi nthenda ya vyoni iyo yatunkha pa bamba la chitufya.

²¹Kweni usange musofi wachipima na kusanga kuti weya undazgoke kuŵa utuŵa ndipo chindanjire kujumpha chikumba, kweni chati waka bii, penepapo musofi wamupatule kuti wakhare pa yekha kwa mazuŵa ghankhonde na ghaŵiri.

²²Usange chikuparara mu chikumba chose, musofi wamuphalire kuti ngwa kukazuzgika. Wali na nthenda ya vyoni.

²³Kweni usange kabanga kali penepapo pa malo ghakhe ndipo kakutandazga pa chikumba chara, ndi kabamba ka chitufya. Musofi wamuphalire kuti ngwa kutozgeka.”

²⁴“Usange munthu waphya na moto pa chikumba, ndipo apo waphya na moto pakuwoneka kabanga kachesamu kakusazgikana na utuŵa, panji katuŵa,

²⁵musofi wapime banga lira. Usange weya wa pa kabanga wazgoka utuŵa, ndipo chilonda chanjira kujumpha chikumba, ipo ndi nthenda ya vyoni. Iyi yamba pa chilonda cha moto ichi ndipo musofi wati wamuphalire kuti ngwa kukazuzgika. Iyi ndi nthenda ya vyoni.

²⁶Kweni usange musofi wapima ndipo wasanga kuti weya wa pa kabanga undazgoke utuŵa, ndiposo kanjira kujumpha chikumba chara, kweni chati waka bii, musofi wamupatule kuti wakhare pa yekha kwa mazuŵa ghankhonde na ghaŵiri.

²⁷Pa zuŵa la chinkhonde na chiŵiri, musofi wati wamupime, ndipo usange wasanga kuti chilonda chatandazgika pa chikumba chose, musofi wati wamuphalire kuti ngwa kukazuzgika. Iyi ndi nthenda ya vyoni.

²⁸Kweni usange banga liri penepapo pa malo ghakhe, likutandazga mu chikumba chara ndipo lati waka bii, ndi chakutupa pa bamba la kuphya na moto. Musofi wamuphalire kuti ngwa kuphotoka. Ichi ndi bamba waka la kuphya na moto.”

²⁹“Usange munthu yunji manyi ndi mwanarume panji mwanakazi wali na chilonda ku mutu panji pa kalezulezu,

³⁰musofi wapime chilonda chira. Usange wasanga kuti chindanjire mukati kujumpha chikumba ndipo weya pa chikumba chira ngwanthura na wakufyongoroka, musofi wamuphalire kuti ngwa kukazuzgika. Iyi ndi nthenda ya chipere ndipo ndi vyoni vya ku mutu panji pa kalezulezu.

³¹Usange musofi wapima chipere na kusanga kuti chindanjire kujumpha chikumba ndipo weya undazgoke kuŵa ufipa, musofi wamupatule munthu yura kuti wakhare pa yekha, kwa mazuŵa ghankhonde na ghaŵiri.

³²Pa zuŵa la chinkhonde na chiŵiri, musofi wapime chipere chira, ndipo para wasanga kuti chindatandazge, palijeso weya wa phyuu, ndiposo chindanjire kujumpha chikumba,

³³wa chipere yura wamete ku mutu wakhe, kweni pa chipere chara. Musofi wamupatule munthu uyo kuti wakhare pa yekha kwa mazuŵa ghanyakheso ghankhonde na ghaŵiri.

³⁴Pa zuŵa la chinkhonde na chiŵiri, musofi wapime chipere chira ndipo usange wasanga kuti chindatandazge pa chikumba ndipo kuti chanjira kujumpha chikumba chara, musofi wamuphalire kuti ngwa kuphotoka. Munthu yura wachape vyakuvwara vyakhe kuti waŵe wakuphotoka.

³⁵Kweni chipere chikutandazga pa chikumba pamanyuma pakuphalirika kuti ngwa kutozgeka

³⁶musofi wamupime. Usange wasanga kuti chipere chatandazgika pa chikumba, wareke kujisuzga kuti wawone weya wa phyuu. Munthu wa chipere yura ngwa kukazuzgika.

³⁷Kweni umo musofi wamuwonera munthu yura ndipo wasanga kuti chipere chapora, weya ufipa nawo wamerapo ndiko kuti chipere chapora. Ntheura musofi wamuphalire kuti ngwa kuphotoka.”

³⁸“Para munthu yunji, manyi ndi mwanarume panji mwanakazi, wali na mabanga ghatuŵa pa chikumba chakhe,

³⁹musofi wamupime. Ndipo usange mabanga pa chikumba na kuwoneka ghatuwulufu, ndi mathuvya waka agho ghatunkha pa chikumba. Ntheura munthu uyo ngwa kuphotoka.”

⁴⁰“Usange sisi la munthu layoyoka ku mutu wakhe mwakuti wali na mupara, iyomwene ngwa kuphotoka.

⁴¹Usange sisi la munthu layoyoka pachanya pa chisko chakhe, mwakuti wali na mupara, iyomwene ngwa kuphotoka.

⁴²Kweni usange pa mupara wakhe wa mutu panji pa chisko chakhe pali kabanga kachesamu kakusazgikana na utuŵa, ndi vyoni ivyo vyafuma pa mupara wa pa mutu panji wa pa chisko.

⁴³Ntheura musofi wamupime, ndipo usange wasanga kuti kabanga nkhachesamu na kakusazgikana na utuŵa pa mupara wa mutu, panji wa pa chisko nga ndi umo vikuwonekera vyoni, pa chikumba,

⁴⁴ndiko kuti munthu uyo ndi wakukazuzgika. Musofi wamuphalire kuti ngwa kukazuzgika, ndipo wali na vyoni vya ku mutu.”

⁴⁵“Munthu uyo wali na vyoni wavwarenge vizwazwa, sisi lakhe liŵe lambula kupesa ndipo wajarepo pa mlomo na kuchemerezga kuti, ‘Ndine wakukazuzgika, ndine wakukazuzgika.’

⁴⁶Munthu uyo wati waŵe wakukazuzgika nyengo yose apo wachali na vyoni ndipo wati wakharenge pa yekha kuwaro kwa msasa.”

⁴⁷“Usange chuku chili pa chakuvwara cha thonje panji cha bafuta,

⁴⁸manyi ncha bafuta waliwose panji ncha thonje, panji ncha chikumba panji nchakupangika ku chikumba,

⁴⁹usange chikuwoneka chakubiriŵira panji chakuchesama, pa chakuvwara, ndi chuku ndipo chikwenera kuwoneka kwa musofi.

⁵⁰Musofi wa chipime chuku icho na kuchipatula chakuvwara cha chuku chira pa mazuŵa ghankhonde na ghaŵiri.

⁵¹Pa zuŵa la chinkhonde na chiŵiri, musofi wachipime chuku chira. Usange chatandazgika pa chakuvwara chira manyi ncha bafuta, panji cha thonje, panji cha chikumba cha mlimo uliwose, ndi chuku chakofya. Chakuvwara cha ntheura ndi cha kukazuzgika.

⁵²Musofi woche pa moto chakuvwara chira, manyi ncha thonje, panji ncha bafuta panji chilichose chakupangika na chikumba, pakuti ndi vyoni virwani chomene. Ntheura chakuvwara chira chikwenera kocheka.”

⁵³“Kweni usange wachipima ndipo wasanga kuti chuku chindatandazgike pa chakuvwara chira, manyi ndi cha thonje, panji cha bafuta, panji chilichose chakupangika na chikumba,

⁵⁴penepapo musofi walangure kuti wachape chakuvwara chakunangika na chuku chira na maji ndipo wachipatule kuti chikhare pa chekha kwa mazuŵa ghankhonde na ghaŵiri.

⁵⁵Musofi wati wapimeso chakuvwara chira pamanyuma pakuchapika. Ndipo usange banga la chuku lindasinthe kawonekero kakhe, nangauli chindatandazge pa chakuvwara, ndi chakukazuzgika. Woche pa moto nanga kabanga ka chuku kangaŵa mukati panji kuwaro kwa chakuvwara.

⁵⁶Kweni usange musofi wapima chakuvwara chira ndipo wasanga kuti chuku chathimbilira, pamanyuma pakuchapika, waparurepo kabanga ka chuku pa chakuvwara chira manyi ndi cha thonje panji cha bafuta panji cha chikumba.

⁵⁷Sono usange chuku chikuwonekaso pa chakuvwara, manyi mpha cha thonje panji cha bafuta, panji pa chilichose chakupangika na chikumba, ndiko kuti chuku chikutandazgika. Ntheura chilichose icho chili na chuku, chocheke pa moto.

⁵⁸Kweni chakuvwara chilichose, manyi ncha thonje, panji cha bafuta, panji chilichose chakupangika na chikumba, usange chili na chuku pamanyuma pakuchapika, chichapikeso, ndipo chiti chiŵenge chakuphotoka.”

⁵⁹Ili ndi dango la chuku icho chili pa chakuvwara, manyi ncha thonje, panji cha bafuta panji chilichose chakupangika na chikumba kuti ŵachipime na kuchiwona usange nchakuphotoka panji nchambula kuphotoka.