Read new_tumbuka_bible Levitiko 14 Bible Online

Levitiko 14 - new_tumbuka_bible bible

Levitiko 14

²“Dango la munthu wa vyoni pa nyengo ya kutozgekera kwakhe para watorekera kwa musofi ndi ili:

³Musofi wafume nayo kuwaro kwa msasa na kumupima. Usange wa vyoni wasangikenge kuti wali kuchitira ku vyoni vyakhe,

⁴musofi walangure ŵanthu kuti ŵamutorere uyo wati watozgeke, viyuni vyamoyo viŵiri vyakuphotoka, khuni la milanje, salu yiswesi na hisopo.

⁵Musofi wati walangure ŵanthu ŵara kuti chiyuni chimoza ŵachikomere mu chiŵiya cha dongo pachanya pa maji ghakwenda.

⁶Ndipo musofi watore chiyuni chamoyo na kakhuni ka milanje, salu yiswesi, na hisopo ndipo wakabizge pamoza mu ndopa za chiyuni icho chakomeka pachanya pa maji ghakwenda ghara.

⁷Wamijire ndopa zakhe kankhonde na kaŵiri pa mweneuyo wakutozgeka ku vyoni, ndipo wamuphalire kuti watozgeka. Ntheura wachirekezge chiyuni chamoyo chira kuti chirutenge ku thondo.

⁸Ndipo uyo watozgeka wachape vyakuvwara vyakhe, wamete sisi lakhe, na kugeza na maji. Ntheura ndipo wati waŵe wakutozgeka. Pamanyuma pa ivi, wanjire mu msasa, kweni wakhare kuwaro kwa hema lakhe kwa mazuŵa ghankhonde na ghaŵiri.

⁹Pa zuŵa la chinkhonde na chiŵiri wameteso sisi lakhe la ku mutu, mwembe wakhe, nkhope zakhe na sisi linyakhe lose la mu thupi mwakhe. Pamanyuma, wachape vyakuvwara vyakhe na kugeza na maji ndipo wati waŵe wakutozgeka.”

¹⁰Pa zuŵa la chinkhonde na chitatu, wa vyoni yura, wize na ŵana-mberere ŵanarume ŵaŵiri na mwana-mberere mwanakazi yumoza wa chirimika chimoza, wose ŵambula kalema. Wizeso na chakupereka cha ufu wakunyiririka wakukwana vigaŵa vitatu mu vigaŵa khumi vya debe, wakusazgikana na mafuta ghakukwana chigaŵa chimoza cha vigaŵa vitatu vya lita.

¹¹Musofi uyo wakaphara kuti wa vyoni yura watozgeka, wati wize na wa vyoni yura pamoza na vyakupereka vyakhe ivi, panthazi pa FUMU pa muryango wa Chihema Chakukumaniranamo.

¹²Musofi watore mwana-mberere yumoza mwa ŵana-mberere ŵanarume na kumupereka kuŵa sembe yakuphepiskira majuvyo. Watoreso mafuta ghakukwana chigaŵa chimoza cha vigaŵa vitatu vya lita na kughazungunya panthazi pa FUMU kuŵa sembe yakuzungunya.

¹³Wamukome mwana-mberere yura mu malo ghakupatulika agho ŵakukomerapo sembe ya kwananga na sembe yakocha. Pakuti sembe ya kwananga na sembe yakocha ndi vya musofi. Zeneizi nzakupatulika nkhanira.

¹⁴Musofi watorepo ndopa za sembe yakuphepiskira majuvyo yira na kuziphaka ku songo kwa khutu la maryero la munjilira wa uyo watozgekenge na pa chigunwe cha woko lakhe la maryero ndiposo pa chigunwe cha lundi lakhe la maryero.

¹⁵Musofi watorepo mafuta ghachoko waka gha mafuta ghara na kughapungulira pa chikufi cha woko lakhe la mazere.

¹⁶Ndipo wabizge munwe wakhe wa ku maryero mu mafuta agho ghali mu chikufi cha woko lakhe la mazere ndipo na munwe wakhe, wamijire mafuta ghanyakhe panthazi pa FUMU kankhonde na kaŵiri.

¹⁷Mafuta ghanyakhe agho ghakharako mu chikufi cha woko lakhe, musofi waghaphake ku songo kwa khutu la maryero la munjilira wa uyo wati watozgekenge, pa chigunwe cha woko lakhe la maryero ndiposo pa chigunwe cha lundi lakhe la maryero mu malo umo mwanguŵa ndopa zakuphepiskira majuvyo.

¹⁸Mafuta agho ghakharako mu chikufi cha woko lakhe, waghaphake pa mutu wa uyo wati watozgekenge. Mwa ntheura musofi wati wamuphepiskire munthu uyo panthazi pa FUMU.

¹⁹Ntheura musofi wapereke sembe yakuphepiskira kwananga kwa munthu uyo wati watozgekenge kukukazuzgika kwakhe. Pamanyuma ndipo wakome sembe yakocha,

²⁰na kuyipereka sembe yakocha yira pamoza na sembe ya ufu pa jochero. Mwa ntheura ndimo musofi wati waphepiskire munthu yura ndipo wati watozgekenge.

²¹Kweni usange ndi mukavu, wakutondeka kusanga vyose ivi, wapereke mwana-mberere mwanarume kuŵa sembe yakuphepiskira majuvyo, pakuyipereka mwakuzungunya mawoko. Waperekeso ufu wakunyiririka wakukwana chigaŵa chimoza mu vigaŵa khumi vya debe, wakusazgikana na mafuta, ghakukwana chigaŵa chimoza mu vigaŵa vitatu vya lita, kuŵa sembe ya ufu.

²²Ndipo waperekeso nkhunda ziŵiri panji viwunda viŵiri kwakuyana na umo wangasangira. Yimoza yiti yiŵenge ya sembe yakuphepiskira kwananga ndipo yinyakhe yiŵenge ya sembe yakocha.

²³Pa zuŵa la chinkhonde na chitatu wize navyo vyose ivi kwa musofi pa muryango wa Chihema Chakukumaniranamo panthazi pa FUMU, kuŵa vyakutozgekera kwakhe.

²⁴Musofi watore mwana-mberere wakuphepiskira majuvyo pamoza na mafuta ghara ndipo wavizungunye panthazi pa FUMU kuti viŵe sembe yakuzungunya.

²⁵Wati wakome mwana-mberere yura wa sembe yakuphepiskira majuvyo, ndipo watorepo ndopa zinyakhe na kuphaka ku songo la khutu la maryero la munjilira wa uyo watozgekenge na pa chigunwe cha woko lakhe la maryero ndiposo pa chigunwe cha lundi lakhe la maryero.

²⁶Musofi wapungulepo mafuta ghanyakhe pa chikufi cha woko la iyomwene la mazere.

²⁷Ndipo na munwe wakhe wa ku maryero wamijire mafuta agho ghali pa chikufi cha woko lakhe la mazere panthazi pa FUMU kankhonde na kaŵiri.

²⁸Musofi waghaphakazge mafuta ghanyakhe agho ghali mu chikufi cha woko lakhe ku songo kwa khutu la maryero la munjilira wa uyo watozgekenge na pa chigunwe cha woko lakhe la maryero, na pa chigunwe cha lundi lakhe la maryero mu malo umo mwanguŵa ndopa za sembe yakuphepiskira majuvyo.

²⁹Mafuta agho ghakharako mu chikufi cha woko lakhe, waghaphake pa mutu wa uyo wati watozgekenge. Mwa ntheura musofi wati wamuphepiskire munthu uyo panthazi pa FUMU.

³⁰Ntheura waperekeso yimoza mwa nkhunda panji viwunda kwakuyana na umo wangasangira,

³¹yimoza kuŵa sembe ya kwananga ndipo yinyakhe kuŵa sembe yakocha pamoza na sembe ya ufu. Ndipo musofi wamuphepiskire munthu uyo watozgekenge panthazi pa FUMU.

³²Ili ndi dango la munthu wa vyoni uyo kuti wangasanga vinthu vyakukhumbikwa kwakutozgeka kwakhe chara.

³³FUMU yikati kwa Mozesi na kwa Aroni,

³⁴“Para mwaya kafika mu charu cha Kanani icho ndamupani kuŵa chinu ndipo ndaŵika chuku chakutandazga mu nyumba yiliyose ya mu charu icho,

³⁵penepapo mwenenyumba wakwenera kwiza kwa musofi na kumuphalira kuti, ‘Kukuwoneka kuti nyumba yane muli chuku.’ ”

³⁶Penepapo musofi walangure munthu yura kuti vyose vya mu nyumba yira vifumiskikire kuwaro pambere musofi wandanjiremo kuya kawona chuku chira, mzire vyose ivyo vili mu nyumba yira vipharazgike kuti ndi vyakukazuzgika. Pamanyuma pakuchita ntheura, musofi wanjire mu nyumba kuya kawona chuku chira.

³⁷Musofi wachipima chuku chira, ndipo usange chili na mabanga ghafipa biriŵiri panji ghachesamu mu kawonekero na kunjira mukati chomene kujumpha chimati cha nyumba,

³⁸musofi wamkufuma mu nyumba yira na kuruta pa muryango na kujara nyumba yira kwa mazuŵa ghankhonde na ghaŵiri.

³⁹Pa zuŵa la chinkhonde na chiŵiri musofi wizeso ku nyumba yira kuti wawone. Usange chuku chatandazgika mu chimati,

⁴⁰walangure kuti ŵawuskepo njerwa izo zili na chuku na kuzitaya ku chizara, kuwaro kwa msumba.

⁴¹Ndipo wati waŵaphalire ŵenecho kuti ŵaparemo mu vimati vya mukati vya nyumba na kutaya dongo lakuparika lira ku chizara, kuwaro kwa msumba.

⁴²Ntheura watore njerwa zinyakhe kuti ŵazengere apo ŵangugumura ndiposo watoreso dongo linyakhe na kumataso mu vimati cha nyumba apo ŵanguparapo.

⁴³Usange chuku chaŵaso mu nyumba yira pamanyuma pakuwuskamo njerwa zira na kupara kwa nyumba na kuyimata,

⁴⁴musofi wize na kuyiwona nyumba yira. Usange chuku chatandazgika mu nyumba yira, ndiko kuti ndi chuku chirwani. Nyumba iyo njakukazuzgika.

⁴⁵Nyumba yira yigumurike ndipo mawe ghakhe, mapaso ghakhe na dongo lakhe lose, viwuskikemo na kuvitaya kuwaro kwa msumba, ku malo ghakukazuzgika.

⁴⁶Munthu yose uyo wakunjira mu nyumba iyo yajarika chifukwa yili na chuku, wamkuŵa wakukazuzgika kufikira ku mise.

⁴⁷Munthu yose wakugona panji kuryera mu nyumba iyo, wakwenera kuchapa vyakuvwara vyakhe.

⁴⁸Kweni usange musofi wiza, wachipima chuku chira, na kusanga kuti chindatandazge mu nyumba yira pamanyuma pakumatika, wati waphare kuti nyumba njakutozgeka chifukwa chuku chamara.

⁴⁹Kuti nyumba yira yitozgeke mwenenyumba watore tuyuni tuŵiri, khuni la milanje, salu yiswesi na hisopo.

⁵⁰Musofi wakomere kayuni kamoza mu chiŵiya umo muli maji ghakutowa.

⁵¹Ntheura musofi watore khuni la milanje, hisopo, salu yiswesi na kayuni kamoyo kara, na kuvibizga mu ndopa za kayuni ako kakomeka mu chiŵiya cha maji ghakutowa ndipo wamijire nyumba yira kankhonde na kaŵiri.

⁵²Ntheura ndimo wati watozgere nyumba yira na ndopa za kayuni, maji ghakutowa, kayuni kamoyo, khuni la milanje, hisopo, na salu yiswesi.

⁵³Ndipo kayuni kamoyo kara wakareke kuti kadukire ku thondo kuwaro kwa msumba. Mwa ntheura ndimo wati wayiphepiskire nyumba yira ndipo yiti yiŵenge yakutozgeka.

⁵⁴Ili ndi dango la nthenda yiliyose ya vyoni: nthenda ya kunyenyera kwa chikumba,

⁵⁵ya chuku cha pa vyakuvwara, panji chuku cha mu nyumba,

⁵⁶chitufya, mankhakanimba na mabanga gha mu thupi.

⁵⁷Marango agha ngakurongora para chinthu nchambula kutozgeka panji para nchakutozgeka. Ili ndi dango lakukhwaska vyoni.