Read new_tumbuka_bible Levitiko 15 Bible Online

Levitiko 15 - new_tumbuka_bible bible

Levitiko 15

¹FUMU yikati kwa Mozesi na Aroni,

²Muŵaphalire ŵaIsraele kuti, para mwanarume waliyose wali na nthenda yakusurura ku mavwaro ghakhe, ivyo vikusurura mbukazuzi.

³Dango lakurongora kukazuzgika kwa munthu uyo wali na nthenda yakusurura mafira ku mavwaro ghakhe ndi ili: Manyi mafira ghachali kufuma panji ghareka kufuma, mbukazuzi kwa iyo.

⁴Chitara chose icho mwanarume uyo wali na nthenda yakusurura mafira ku mavwaro ghakhe wakukharaso panji kugonapo ndi cha kukazuzgika.

⁵Munthu waliyose uyo wakukhwaska chitara ichi wakwenera kuchapa vyakuvwara vyakhe na kugeza na maji. Ndipouli wati waŵe wakukazuzgika mpaka mise.

⁶Munthu waliyose uyo wakukharapo pa kanthu kose ako wangukharapo uyo wali na nthenda yakusurura mafira ku mavwaro ghakhe, wakwenera kuchapa vyakuvwara vyakhe na kugeza na maji. Ndipouli wati waŵe wakukazuzgika mpaka mise.

⁷Munthu waliyose uyo wakukhwaska uyo wali na nthenda yakusurura mafira ku mavwaro ghakhe wakwenera kuchapa vyakuvwara vyakhe na kugeza na maji. Ndipouli wati waŵe wakukazuzgika mpaka na mise.

⁸Usange mwanarume uyo wali na nthenda yakusurura mafira ku mavwaro ghakhe wathunyira mata munthu uyo ngwa kuphotoka, wakuthunyirika mata yura wachape vyakuvwara vyakhe na kugeza na maji, ndipouli wati waŵe wakukazuzgika mpaka na mise.

⁹Chiskaro chilichose icho mwanarume uyo wali na nthenda yakusurura mafira ku mavwaro ghakhe wakharapo chiti chiŵenge chakukazuzgika.

¹⁰Ndipo munthu waliyose uyo wakhwaska chinthu icho mwanarume uyo wali na nthenda yakusurura mafira ku mavwaro ghakhe wakakharapo, wati waŵe wakukazuzgika mpaka mise. Yose uyo wakutora chilichose icho wakakharapo mwanarume uyo wali na nthenda yakusurura mafira ku mavwaro ghakhe wakwenera kuchapa vyakuvwara vyakhe na kugeza na maji. Ndipouli wati waŵe wakukazuzgika mpaka mise.

¹¹Munthu waliyose mweneuyo mwanarume uyo wali na nthenda yakusurura mafira ku mavwaro ghakhe wati wamukhwaske kwambula kugeza mawoko, wachape vyakuvwara vyakhe na kugeza na maji, ndipouli wati waŵe wakukazuzgika mpaka mise.

¹²Chiŵiya cha dongo icho mwanarume, uyo wali na nthenda iyi, wakukhwaska chisweke nanga nchiteŵetero chose cha khuni nacho chichapike na maji.

¹³Para mwanarume uyo wali na nthenda yakusurura mafira ku mavwaro ghakhe wawona kuti watozgeka, wajipendere mazuŵa ghankhonde na ghaŵiri ghakutozgeka kwakhe, ndipo wachape vyakuvwara vyakhe na kugeza na maji ghaweme ndipo wati watozgekenge.

¹⁴Pa zuŵa la chinkhonde na chitatu watore nkhunda ziŵiri panji viwunda viŵiri na kwiza navyo panthazi pa FUMU, pa muryango wa Chihema Chakukumaniranamo na kupereka kwa musofi.

¹⁵Musofi wati wazipereke, yimoza kuŵa sembe yakuphepiskira kwananga, ndipo yinyakhe kuŵa sembe yakocha. Mwa ntheura musofi wati wamuphepiskira mwanarume uyo panthazi pa FUMU mwanarume uyo chifukwa wali na nthenda yakusurura mafira ku mavwaro ghakhe.

¹⁶Usange mwanarume wathira pasi, wakwenera kugeza mu thupi lose, ndipouli wati waŵenge wakukazuzgika mpaka mise.

¹⁷Chakuvwara chilichose na chikumba chilichose apo pathikira wanarume chikwenera kuchapika na maji. Ndipouli chiti chiŵenge chakukazuzgika mpaka mise.

¹⁸Para mwanarume wagonana na mwanakazi ndipo wathira wanarume wakhe, wose ŵaŵiri ŵakwenera kugeza, ndipouli ŵati ŵaŵenge ŵakukazuzgika mpaka mise.

¹⁹Para mwanakazi wali ku mwezi, wati waŵenge wakukazuzgika mazuŵa ghankhonde na ghaŵiri. Ndipo yose uyo wakumukhwaska mwanakazi uyo, nayo wati waŵenge wakukazuzgika mpaka mise.

²⁰Pa chose icho wakugonapo apo wachali ku mwezi nanga ndi icho wakukharapo viti viŵenge vyakukazuzgika.

²¹Munthu waliyose uyo wakukhwaska chitara chakhe, wakwenera kuchapa vyakuvwara vyakhe na kugeza na maji. Ndipouli wati waŵenge wakukazuzgika mpaka mise.

²²Munthu waliyose uyo wakukhwaska chose icho mwanakazi uyo wali ku mwezi wakukharapo, wakwenera kuchapa vyakuvwara vyakhe na kugeza na maji, ndipouli wati waŵenge wakukazuzgika mpaka mise.

²³Manyi chiŵe chitara panji chilichose icho mwanakazi uyo wali ku mwezi wakukharapo para munthu wachikhwaska wati waŵenge wakukazuzgika mpaka na mise.

²⁴Usange mwanarume wagonana na mwanakazi uyo wali ku mwezi, nayo ngwa kukazuzgika mazuŵa ghankhonde na ghaŵiri. Ndipo chitara icho wagonapo, nacho chiti chiŵenge chakukazuzgika.

²⁵Usange mwanakazi wakhara ku mwezi mazuŵa ghanandi panji warutilira kuruska agho wakuŵira nyengo zose, wati waŵenge wakukazuzgika mazuŵa ghose agho wakuŵira ku mwezi nga ndi umo wakuŵira para wali ku mwezi.

²⁶Chitara chilichose icho wakugonapo pa mazuŵa agho warutilira kuŵira ku mwezi na nga ndi icho wakukharapo pa mazuŵa agho, vyose viti viŵenge vya kukazuzgika nga ndi umo vikuŵira para wali ku mwezi.

²⁷Munthu yose uyo wakukhwaska vinthu ivi wati waŵenge wakukazuzgika, ndipo wakwenera kuchapa vyakuvwara vyakhe na kugeza na maji. Ndipouli wati waŵe wakukazuzgika mpaka mise.

²⁸Kweni usange kuŵa ku mwezi kwakhe kwakurutilira kwareka, wajipendere mazuŵa ghankhonde na ghaŵiri ndipo pamanyuma pa mazuŵa agha wati waŵenge wakutozgeka.

²⁹Pa zuŵa la chinkhonde na chitatu, mwanakazi uyo wati wize na nkhunda panji viwunda viŵiri kwa musofi pa muryango wa Chihema Chakukumaniranamo.

³⁰Ndipo musofi wati wapereke yimoza kuŵa sembe yakuphepiskira kwananga ndipo yinyakhe kuŵa sembe yakocha. Mwa ntheura ndimo musofi wati waphepiskire mwanakazi uyo panthazi pa FUMU chifukwa chakurutilira kuŵa ku mwezi kwakhe.

³¹Mwa ntheura ndimo muti muŵaphotorenge ŵaIsraele mu kukazuzgika kwawo mwakuti ŵareke kufwa chifukwa cha kukazuzga Chihema chane icho chili mukati mwawo.

³²Agha ndi marango gha mwanarume uyo wali na nthenda yakusurura mafira ku mavwaro ghakhe, gha mwanarume uyo wakuthira pasi wanarume wakhe na kujikazuzga nawo,

³³gha mwanakazi uyo wali ku mwezi, gha mwanarume panji mwanakazi uyo wali na nthenda ya kusurura mafira ku mavwaro ghakhe, ndiposo na gha mwanarume uyo wagonana na mwanakazi uyo ngwa kukazuzgika.