Read new_tumbuka_bible Levitiko 16 Bible Online

Levitiko 16 - new_tumbuka_bible bible

Levitiko 16

¹FUMU yikati kwa Mozesi pamanyuma pa nyifwa ya ŵana ŵaŵiri ŵa Aroni awo ŵakakomeka ŵakati ŵapemba moto wambula kulangurika na FUMU.

²FUMU yikati kwa Mozesi, “Umuphalire Aroni, mukuru wako, kuti wareke kwiza nyengo yiliyose ku Malo Ghakupatulika Nkhanira kuseri kwa chisalu chakuchinga panthazi pa chibenekerero chakuphepiskirapo icho chili pa Bokosi la Phangano mzire wafwe. Pakuti ine nditi ndiwonekerenge mu bingu pachanya pa chibenekerero icho.

³Kweni Aroni wanjirenge ku Malo Ghakupatulika Nkhanira pekhapekha wiza na nkhambako yichoko ya sembe yakuphepiskira kwananga na mberere yanarume ya sembe yakocha.”

⁴Ndipo wavware laya lakupatulika la bafuta, kabunthu wa bafuta na kujikaka na lamba wa bafuta mu chiuno mwakhe ndiposo na kuvwara chilemba cha bafuta. Ivi ndivyo vyakuvwara vyakupatulika. Wagezenge maji mu thupi lakhe ndipo wavware vyakuvwara ivi.

⁵Ndipo kufuma ku mpingo wa ŵaIsraele watoreko mbuzi ziŵiri zanarume pera kuŵa sembe yakuphepiskira kwananga na mberere yanarume kuŵa sembe yakocha.

⁶Aroni wati wapereke nkhambako kuŵa sembe yakuphepiskira kwananga kwa iyomwene na mbumba yakhe.

⁷Ndipo watoreso mbuzi ziŵiri zira na kwiza nazo panthazi pa FUMU pa muryango wa Chihema Chakukumaniranamo.

⁸Aroni wachite mphenduzgo pa mbuzi ziŵiri zira kuti yimoza yiŵe yakuphepiskira FUMU ndipo yinyakhe yiŵe ya Azazele.

⁹Aroni wize na mbuzi iyo mphenduzgo yarongora kuti nja FUMU ndipo wayipereke kuŵa sembe yakuphepiskira kwananga.

¹⁰Kweni mbuzi iyo mphenduzgo yarongora kuti nja Azazele, wize nayo yamoyo panthazi pa FUMU kuŵa sembe yakuphepiskira kwananga pakuyikaka kuti yirute ku mapopa gha Azazele.

¹¹Aroni wize na nkhambako kuŵa sembe yakuphepiskira kwananga kwa iyomwene ndipo wayikome kuti waphepiskire kwananga kwa iyomwene na mbumba yakhe.

¹²Watore jonjo wakusunkhizgirapo, wakuzura na makara gha moto kufuma pa jochero ilo liri panthazi pa FUMU. Watoreso vyakununkhira vya sungu liweme ivyo ŵabwaska, vyakuzura vikufi viŵiri, ndipo vyose ivi wize navyo ku Malo Ghakupatulika Nkhanira.

¹³Waŵike vyakununkhira vira pa moto panthazi pa FUMU, ndipo josi la vyakununkhira viti vijarenge chibenekerero chakuphepiskirapo icho chili pachanya pa Bokosi la Phangano mwakuti wareke kuwona chibenekerero chakuphepiskirapo mzire wafwe.

¹⁴Watorepo ndopa zinyakhe za nkhambako yira ndipo na munwe wakhe wazimijire pachanya pa Bokosi la Phangano. Ndopa zinyakhe wazimijire panthazi pa chibenekerero chakuphepiskirapo kankhonde na kaŵiri.

¹⁵Ntheura Aroni wakome mbuzi kuŵa sembe yakuphepiskira kwananga kwa ŵanthu. Ndopa zakhe wize nazo ku Malo Ghakupatulika Nkhanira na kuchita ntheura pera nga ndi umo wanguchitira na ndopa za nkhambako pakuzimijira pachanya pa chibenekerero chakuphepiskirapo ndipo na panthazi pakhe.

¹⁶Ntheura ndimo wati waphepiskire Malo Ghakupatulika Nkhanira chifukwa chakukazuzgika kwa ŵaIsraele pakuchita mauheni ghawo ghose. Wachite ntheura pera na pa Chihema Chakukumaniranamo icho chili mukati mwawo cheneicho nacho nchakukazuzgika.

¹⁷Paŵavye munthu wakuŵa mu Chihema Chakukumaniranamo kwamba pa nyengo iyo Aroni wakunjirira kuya kaphepiska ku Malo Ghakupatulika Nkhanira mpaka wafumemo. Iyo wati wajiphepiskire iyomwene, mbumba yakhe, na mpingo wose wa ŵaIsraele.

¹⁸Penepapo ndipo wafumemo na kuruta ku jochero panthazi pa FUMU ndipo wati wali phepiskire. Wati watore ndopa zinyakhe za nkhambako na za mbuzi na kuziphaka pa masengwe gha jochero zingirizge.

¹⁹Watorepo ndopa zinyakhe na kuzimija na munwe wakhe kankhonde na kaŵiri pa jochero lira. Mwa ntheura wati walitozge ku maukazuzi gha ŵaIsraele na kulipatula.

²⁰Para Aroni wamara kuphepiskira Malo Ghakupatulika Nkhanira, Chihema Chakukumaniranamo, na jochero, wati wize na mbuzi yamoyo yira iyo nja Azazele kwa FUMU.

²¹Ndipo Aroni waŵike mawoko ghakhe ghose ghaŵiri pa mutu wa mbuzi yamoyo na kuzomera pa mbuzi yira zakwananga zose za ŵaIsraele pakuchita mauheni ghawo ghose. Ndipo wati waŵike zakwananga zose pa mbuzi iyi na kuyitumizga ku mapopa na munthu uyo wati wasankhule penepapo.

²²Mbuzi yira yiti yiyeghe zakwananga zawo zose na kuya nazo ku mayiyi. Ndipo munthu yura wati wayilekezge kuti yirute ku mapopa.

²³Penepapo Aroni wati wanjire mu Chihema Chakukumaniranamo na kuvura vyakuvwara vyabafuta ivyo wanguvwara pakunjira mu Malo Ghakupatulika Nkhanira ndipo wavireke mwenemumo.

²⁴Ndipo wati wageze mu thupi na maji mu malo ghakupatulika na kuvwara vyakuvwara vyakhe vya zuŵa na zuŵa. Ntheura wati wafume na kwiza kuti wakapereke sembe yakocha ya iyomwene na ya ŵanthu ndipo wajiphepiskire iyomwene na kuphepiskira ŵanthu.

²⁵Mafuta gha nyama gha sembe yakuphepiskira kwananga ŵaghawochere pa jochero.

²⁶Munthu uyo wangurongozgera mbuzi yira kuruta ku Azazele wakwenera kuchapa vyakuvwara vyakhe na kugeza namaji, para wachita ntheura ndipo wanjirenge mu msasa.

²⁷Nkhambako na mbuzi vya sembe yakuphepiskira kwananga vyeneivyo ndopa zawo wangwiza nazo mu Malo Ghakupatulika Nkhanira kuŵa za kuphepiskira ziti zitorekere kuwaro kwa msasa. Vikumba vyawo, nyama yawo na ulongwe wakhe ŵavyoche pa moto.

²⁸Munthu uyo wochanga vyeneivi wati wachape vyakuvwara vyakhe na kugeza na maji, para wachita ntheura ndipo wanjirenge mu msasa.

²⁹Ili ndi dango ilo likwenera kusungika muyirayira, kuti pa zuŵa la khumi la mwezi wa chinkhonde na chiŵiri muziŵizgenge kurya ndipo mureke kuchita mlimo, manyi muŵe imwe ŵenecharu panji ŵalendo awo ŵakupanjwa mukati mwinu.

³⁰Pakuti pa zuŵa ili, musofi wati wamuphepiskirani mwakuti mutozgeke ku zakwananga zinu zose. Ntheura muti muŵenge wakutozgeka panthazi pa FUMU.

³¹Zuŵa ili ndi Sabata lakupumula nkhanira kwa imwe, mu leneilo mukwenera kuziŵizga kurya na kureka kuteŵeta mlimo uli wose. Ili ndi dango ilo likwenera kusungika muyirayira.

³²Musofi uyo wali kuphakazgika na kupatuliskika kuŵa musofi mukuru mu malo mwa ŵawiske wati wamuphepiskirani uku wavwara vyakuvwara vyakupatulika vya bafuta.

³³Ndipo iyo wati waphepiskire Malo Ghakupatulika Nkhanira, malo ghanyakhe gha Chihema Chakukumaniranamo, jochero, ŵasofi, na mpingo wose wa ŵanthu.

³⁴Ili ndi dango ilo likwenera kusungika muyirayira lakuti kuphepiskira kukwenera kuchitika kamoza ku ŵaIsraele pa chirimika chilichose chifukwa cha zakwananga zawo. Ntheura Mozesi wakachita nga ndi umo FUMU yikalangulira.