Read new_tumbuka_bible Levitiko 17 Bible Online

Levitiko 17 - new_tumbuka_bible bible

Levitiko 17

¹FUMU yikati kwa Mozesi,

²“Umuphalire Aroni na ŵana ŵakhe ndiposo na ŵaIsraele wose kuti icho ndicho FUMU yalangula.

³MuIsraele waliyose, usange wakomera ng'ombe, panji mwana-mberere, panji mbuzi mu msasa panji kuwaro kwa msasa,

⁴kwambula kwiza nayo ku muryango wa Chihema Chakukumaniranamo kuŵa sembe kwa FUMU panthazi pa Chihema chakhe, wati waŵe na mrandu wakuthiska ndopa. Munthu uyo wati wawuskikemo mu ŵanthu ŵakwawo.”

⁵Urato wakhe ngwa kuti ŵaIsraele sono, ŵati ŵizenge kwa FUMU na sembe izo ŵati ŵakomere ku thondo. Ŵati ŵize nazo kwa musofi pa muryango wa Chihema Chakukumaniranamo na kukoma kuŵa sembe ya wenenawene kwa FUMU.

⁶Musofi wati wamijire ndopa pa jochero la FUMU pa muryango wa Chihema Chakukumaniranamo, na kocha mafuta kuti ghapereke sungu liweme lakukondweska FUMU.

⁷Ntheura ŵaIsraele wakwenera kureka kukomera viŵeto vyawo kuŵa sembe ku vikozgo vya mbuzi vyeneivyo ŵachita navyo uzaghali. ŴaIsraele wakwenera kusunga dango ili kwa muyirayira mu miwiro yawo yose.

⁸Uŵaphalire ŵaIsraele kuti munthu waliyose, manyi ndi muIsraele panji uyo wakupanjwa mukati mwawo, mweneuyo wakupereka sembe yakocha mburuma panji sembe yakukoma,

⁹usange wakwiza nayo chara ku muryango wa Chihema Chakukumaniranamo kuŵa sembe kwa FUMU, munthu uyo wati wawuskikemo mukati mu ŵanthu ŵakwawo.

¹⁰MuIsraele waliyose, nanga ndi mulendo uyo wakupanjwa mukati mwinu, usange wakurya nyama iyo yichali na ndopa mukati mwakhe, nditi ndimikane nayo munthu uyo ndipo nditi ndimuwuskemo mukati mu ŵanthu ŵakwawo.

¹¹Pakuti umoyo wa chilengiwa chilichose uli mu ndopa ndipo ndazipereka kwa imwe kuti muphepiskirenge kwananga kwinu pa jochero. Pakuti ndopa ndizo zikuwuskako kwananga chifukwa cha umoyo uwo uli mu ndopa.

¹²Ndicho chifukwa ndaŵaphalira ŵaIsraele nanga mba ulendo awo wakupanjwa mukati mwinu kuti ŵareke kurya nyama iyo yichali na ndopa mukati mwakhe.

¹³MuIsraele waliyose nanga ndi mulendo uyo wakupanjwa mukati mu ŵaIsraele, usange waŵamba nyama panji chiyuni icho chikuryeka, wati wathiske ndopa zakhe pasi na kuziwundira na dongo.

¹⁴Pakuti umoyo wa chilengiwa chose uli mu ndopa. Ndicho chifukwa ndayowoya ku ŵaIsraele kuti wareke kurya nyama iyo yichali na ndopa mukati mwakhe ndipo waliyose uyo wati warye, wati wawuskikemo.

¹⁵MuIsraele waliyose nanga ndi mulendo uyo wakupanjwa mukati mwinu panji mwenecharu, usange wakurya nyama iyo yafwa yekha panji yakomeka na chikoko, wakwenera kuchapa vyakuvwara vyakhe na kugeza na maji. Ndipouli wati waŵenge wakukazuzgika mpaka mise, ndipo pamanyuma wati waŵenge wakutozgeka.

¹⁶Kweni usange wakuchapa vyakuvwara vyakhe chara na kugeza na maji, wati wayeghe kwananga kwakhe.