Read new_tumbuka_bible Levitiko 18 Bible Online

Levitiko 18 - new_tumbuka_bible bible

Levitiko 18

¹FUMU yikati kwa Mozesi,

²“Yowoya ku ŵaIsraele uti, ‘Ine ndine FUMU, Chiuta winu.

³Mureke kuchita ivyo ŵanthu ŵa ku Eguputo ŵakachitanga uko mukakharanga kale, nesi kuchita ivyo ŵanthu ŵa ku Kanani ŵakuchita ku ŵeneawo nkhumutoreraniko. Mureke kurondezga maluso ghawo.

⁴Mukwenera kupulikira marango ghane na kuchita ivyo nkhamulangulani. Ine ndine FUMU, Chiuta winu.

⁵Ntheura muchitenge ivyo nkhumulangulani na kupulikira marango ghane, pakuti munthu uyo wakughapulikira wati waŵenge wamoyo. Ine ndine FUMU.’ ”

⁶“ ‘Paŵavye munthu na yumoza mwa imwe uyo wati wagonane na yose uyo ndi mubali wakhe nkhanirankhanira. Ine FUMU ndine ndayowoya.

⁷Ureke kukhozga soni ŵawuso pakugonana na ŵanyoko. Ŵeneaŵa mbanyoko. Ureke kugonana nawo.

⁸Ureke kugonana na muwoli wa ŵawuso. Kuchita ntheura nkhukhozga soni ŵawuso.

⁹Ureke kugonana na mudumbu wako, mwana mwanakazi wa ŵawuso panji mwana mwanakazi wa ŵanyoko, wakubabiwira pa kaya panji kunyakhe.

¹⁰Ureke kugonana na muzukuru wako mwanakazi uyo wababika na mwana wako mwanarume, panji mwana wako mwanakazi. Ncha soni kuchita ntheura, chifukwa ŵeneaŵa ndi ndopa zako.

¹¹Ureke kugonana na mwana mwanakazi wa muwoli wa ŵawuso uyo ŵawuso ŵali kubaba, chifukwa uyu nayo ndi mudumbu wako.

¹²Ureke kugonana na mudumbu wa ŵawuso pakuti ŵeneaŵa ndi ndopa yimoza na ŵawuso.

¹³Ureke kugonana na mukuru panji munung'una wa ŵanyoko, pakuti ŵeneaŵa ndi ndopa yimoza na ŵanyoko.

¹⁴Ureke kugonana na muwoli wa ŵana ŵanyawo ŵa ŵawuso chifukwa nawo mbanyoko.

¹⁵Ureke kugonana na mukamwana wako pakuti ndi muwoli wa mwana wako. Ureke kugonana nayo.

¹⁶Ureke kugonana na muwoli wa mukuru panji munung'una wako pakuti uyu ndi mulamu wako.

¹⁷Ureke kugonana na mwanakazi ndiposo na mwana wakhe mwanakazi, nesi kugonana na mwana mwanakazi wakubabika na mwana wakhe mwanarume panji mwanakazi. Pakuti wose aŵa ndi ndopa yimoza. Kuchita ntheura nchiheni chomene.

¹⁸Ureke kutora munung'una panji mukuru wa muwoli wako kuŵa muwoli wako na kugonana nayo apo muwoli wako wachali wa moyo.’ ”

¹⁹“ ‘Ureke kugonana na mwanakazi para wali ku mwezi.

²⁰Ureke kugonana na muwoli wa muzengezgani wako mzire ujikazuzge nayo.

²¹Paŵavye munthu na yumoza wakupereka mwana wakhe kuŵa sembe yakocha kwa chiuta Moleki. Pakuti kuchita ntheura nkhwanangira zina la Chiuta wako. Ine ndine FUMU.

²²Paŵavye munthu na yumoza wakugonana na mwanarume munyakhe nga ndi para wakugonana na mwanakazi, kuchita ichi mbukazuzi.

²³Paŵavye munthu na yumoza wakugonana na chinyama chilichose wajikazuzge nacho. Mwanakazi nayo wareke kujipereka ku chinyama chilichose kuti wagonane nacho. Kuchita ntheura nako mbukazuzi.’ ”

²⁴“ ‘Mureke kujikazuzga na vinthu vyeneivi chifukwa umu ndimo mafuko agho nkhughachimbizga panthazi pinu ghakajikazuzgira.

²⁵Ndipo charu nacho chikakazuzgika. Ntheura nkhalanga charu chifukwa cha uheni uwo ŵanthu ŵakukhara mwenemumo ŵakachita, ndipo charu chikaŵakana.

²⁶Kweni imwe musunge marango ghane na kuchita ivyo nkhumulangulirani. Mureke kuchita chilichose cha ukazuzi, manyi ndimwe ŵenecharu, panji mulendo uyo wakupanjwa mukati mwinu.

²⁷Pakuti vya ukazuzi vyose ivi ndivyo ŵakachitanga ŵanthu awo ŵakakharanga mu charu icho imwe mukurutako ndipo charu chikakazuzgika.

²⁸Usange muti mukazuzge charu, charu chiti chimuwukurani nga ndi umo chikawukulira mafuko agho ghakaŵamo pambere imwe mundize.

²⁹Munthu waliyose uyo wakuchita nanga nchimoza cha maukazuzi agha, wati wawuskikemo mukati mu ŵanthu ŵakwawo.’ ”

³⁰“ ‘Ntheura sungilirani marango ghane pakureka kuchita vya ukazuzi ivyo ŵanthu awo wakakharangamo pambere imwe wakachitanga. Mureke kujikazuzga na vyeneivi. Ine ndine FUMU, Chiuta wako.’ ”