Read new_tumbuka_bible Levitiko 19 Bible Online

Levitiko 19 - new_tumbuka_bible bible

Levitiko 19

¹FUMU yikati kwa Mozesi,

²“Uwuphalire mpingo wose na ŵaIsraele kuti, ‘Muŵenge ŵatuŵa, pakuti ine FUMU, Chiuta winu ndili mutuŵa.

³Munthu waliyose wa imwe wakwenera kuchindika ŵanyina na ŵawiske ndipo wasungilirenge maSabata ghane. Ine ndine FUMU, Chiuta winu.’ ”

⁴“Mureke kuwerera ku vikozgo panji nesi kujipangira ŵachiuta ngoza ŵakusongonora kufuma ku visulo. Ine ndine FUMU, Chiuta winu.

⁵“Para mwakomera FUMU sembe ya ku wenenawene, muyipereke mwakuti yiŵe yakuperekeka.

⁶Nyama yeneiyo yiti yiryekenge zuŵa leneilo yakomekera panji la machero ghakhe ndipo yose iyo yakharako kufikira zuŵa la chitatu yocheke na moto.

⁷Usange yingaryeka pa zuŵa la chitatu, ndiko kuti nzakukazuzgika. Sembe yira kuti yitipokerekenge chara.

⁸Munthu waliyose uyo wati warye nyama iyo wati waŵe na mrandu chifukwa wakazuzga icho nchakupatulika kwa FUMU. Munthu uyo wati wawuskikemo mukati mu ŵanthu ŵa kwakhe.

⁹“Para mukuvuna vya mu minda yinu, mureke kuya kavuna na mu mphepete mwa munda, nanga nkhuvuluramo para mwavunamo kale.

¹⁰Mureke kuya katora vyose vya munda winu wa mpheska, nesi kusona izo zawa pasi. Muŵarekere ŵakavu na ŵakupanjwa mukati mwinu. Ine ndine FUMU, Chiuta winu.

¹¹“Mungibanga nanga nkhupusika nesi kuteterana utesi.

¹²Mureke kurapira mu zina lane kwa utesi kuti mukazuzge waka zina la Chiuta winu. Ine ndine FUMU, Chiuta winu.

¹³“Mureke kuzgerera muzengezgani wako nanga nkhumwibira. Mureke kusunga malipiro gha munthu waganyu usiku wose mpaka na mulenje.

¹⁴Mungatembanga munthu wakumangwa makutu, nanga nkhuŵika chikhuŵazgo panthazi pa ŵa chiburumutira. Kweni mopenge Chiuta winu. Ine ndine FUMU.

¹⁵“Mureke kubendezga urunji para mukweruzga. Mureke kweruzga pakurumba chisko pakati pa mukavu na wakuzirwa, kweni mweruzgenge muzengezgani winu mu urunji.

¹⁶Mureke kuŵa ŵamwendanato mukati mu ŵanthu ŵakwinu. Mureke kuchita chilichose icho chingakomeska muzengezgani winu. Ine ndine FUMU.

¹⁷“Mureke kutinkha mubali winu mu mtima, kweni mudumbiskanenge nayo muzengezgani winu, mzire musangane mu kwananga kwakhe.

¹⁸Mureke kuwezgera nduzga nesi kurutilira kukwiyira ŵanthu ŵa kwinu, kweni mutemwenge ŵazengezgani ŵinu nga ndi umo mukujitemwera mwaŵene. Ine ndine FUMU.

¹⁹“Musungenge marango ghane. Mungazomerezganga kuti viŵeto vyinu vikwerane na vya mtundu unyakhe. Mungapandanga mbuto za mitundu yiŵiri mu munda winu. Mureke kuvwara malaya ghakupangika na salu za mitundu yiŵiri.

²⁰“Usange mwanarume wagonana na mwanakazi muzga uyo wali kujalirika na munthu munyakhe, kweni wandawomboleke panji kupika wanangwa wakhe, wose ŵaŵiri ŵalangike. Kweni kuŵakoma chara chifukwa mwanakazi kuti ndi mwanangwa chara.

²¹Kweni mwanarume yura wize na mberere yanarume ku muryango wa Chihema Chakukumaniranamo kuti yiŵe sembe yakuphepiskira majuvyo ghakhe kwa FUMU.

²²Ndipo na mberere yanarume yakuphepiskira majuvyo yira, musofi wamuphepiskira munthu yura panthazi pa FUMU ndipo kwananga kwakhe kuti kugowokereke.

²³“Para mwayakanjira mu charu cha Kanani ndipo mwayakapanda makuni gha mitundumitundu gha vipambi, vipambi ivyo vikaŵa vya kukanizgika. Vikaŵa vya kukanizgika kwa imwe kwa virimika vitatu, mureke kuvirya pa nyengo yose iyi.

²⁴Mu chirimika cha chinayi, vipambi vyose vyamkuŵa vyakupatulika, sembe yakuwongera FUMU.

²⁵Kweni mu chirimika cha chinkhonde mukaryenge vipambi vyakhe. Para mwamkuchita ntheura, makuni gha vipambi ghati ghapambike vinandi chomene. Ine ndine FUMU, Chiuta winu.

²⁶“Mungaryanga nyama iyo yichali na ndopa mukati mwakhe. Mungawukwanga panji kuchita maula.

²⁷Mungametanga mitu yinu mu mphepete zingirizge, nanga nkhuŵeta mwembe winu mu mphepete.

²⁸Mungajichekanga mathupi ghinu chifukwa cha ŵakufwa nesi kujitema simbo. Ine ndine FUMU.

²⁹“Ungakazuzganga mwana wako mwanakazi pakumuzgora kuti waŵe muzaghali, mzire charu chinjire mu uzaghali na kuzure na ubendezi.

³⁰Musungenge mazuŵa ghane gha Sabata na kuchindika malo ghane ghakupatulika. Ine ndine FUMU.

³¹“Mureke kuya katora urongozgi ku ŵawukwi na ku ŵamayere pakuti, pakuchita ntheura, muti mujikazuzge na iwo. Ine ndine FUMU, Chiuta winu.

³²“Perekani nchindi ku ŵambuha na ŵachekuru pakuchita ntheura, ndiko kuti mukumopa Chiuta winu. Ine ndine FUMU.

³³“Para mulendo wakukhara namwe mu charu chinu, mureke kumusuzga.

³⁴Mulendo uyo wakukhara namwe mu mutorenge nga ndi mwenecharu. Mu mutemwenge nga ndi umo mukujitemwera mwaŵene. Pakuti namwe kukaŵa ŵalendo mu charu cha Eguputo. Ine ndine FUMU, Chiuta winu.

³⁵“Munganangiskanga pakweruzga mirandu ndipo mweso winu wakupimira utali wa vinthu, uzitu wa vinthu, panji unandi wakhe, ureke kuŵa wakupusika.

³⁶Miyeso yinu ya kupimira, miyeso ya uzitu ndiposo na miyeso ya vya mafuta na vinyo, viŵenge vya unenesko. Ine ndine FUMU, Chiuta winu uyo wakamufumyani mu charu cha Eguputo.

³⁷Musungilirenge marango ghane yose na kuchita ivyo nkhumulangulirani. Ine ndine FUMU.”