Read new_tumbuka_bible Levitiko 2 Bible Online

Levitiko 2 - new_tumbuka_bible bible

Levitiko 2

¹“Para munthu wakwiza na chakupereka cha ku munda kwa FUMU, chakupereka icho chiŵe cha ufu wakunyiririka. Wathireko mafuta na kuŵikapo vyakununkhira pachanya pakhe.

²Ufu uwu wize nawo kwa ŵasofi ŵa mbumba ya Aroni. Yumoza watapepo ufu kuzura woko lakhe pamoza na mafuta na vyakununkhira vyose, ndipo ivi waviwoche kuŵa phande la chikumbusko chakhe pa jochero, kuŵa sembe yakocha pa moto, ya sungu liweme kwa FUMU.

³Ndipo sembe ya ufu iyo yakharako yiŵenge ya Aroni na ŵana ŵakhe. Ichi ndi chigaŵa chakupatulika nkhanira cha sembe yakocha kwa FUMU.

⁴“Para munthu wakwiza na chakupereka cha ku munda chakuphikika mu uvuni, chakupereka icho chiŵe cha vingwa vipapati vyambula chirungo, vya ufu wakunyiririka wakusazgako mafuta, panji tuvingwa tupepefu twambula chirungo twakuphakako mafuta.

⁵“Para munthu wakwiza na chakupereka cha ku munda chakuphikika pa jonjo, chakupereka icho chiŵe cha ufu wakunyiririka wambula chirungo wakusazgako mafuta.

⁶Udumure chakupereka icho tuchokotuchoko na kuthirapo mafuta. Iyi ndi sembe ya ufu.

⁷“Usange chakupereka chako cha ku munda nchakuphika pa chiŵiya, chakupereka icho chiŵe cha ufu wakunyiririka chakuphikika na mafuta.

⁸Sembe ya ufu iyo yanozgeka na vinthu ivi, wize nayo kwa FUMU, ndipo wapereke kwa musofi, uyo wati wize nayo ku jochero.

⁹Musofi wati watorepo pa sembe ya ufu yira kuŵa phande lakhe la chikumbusko na kupereka pa jochero kuŵa sembe yakocha, ya sungu liweme kwa FUMU.

¹⁰Sembe ya ufu iyo yakharako yiŵenge ya Aroni na ŵana ŵakhe. Ichi ndi chigaŵa chakupatulika nkhanira cha sembe yakocha kwa FUMU.

¹¹“Chakupereka chose cha ufu icho mukwiza nacho kwa FUMU chireke kuŵa na chirungo, pakuti mukwenera kupereka chara kwa FUMU sembe yakocha pa moto iyo yili na chirungo panji uchi.

¹²Mukizenge na vipambi vyakudanga kucha kwa FUMU, kweni mureke kuya kapereka pa jochero kuŵa sembe ya sungu liweme kwa FUMU.

¹³Chakupereka chako chose cha ufu chikarungikenge na muchere. Ungarekanga muchere pa chakupereka chako, pakuti ndi phangano pakati pa iwe na FUMU yako. Uthirengepo muchere pa vyakupereka vyose vya ufu.

¹⁴Usange ukupereka kwa FUMU sembe ya ufu wa vipambi vyakudanga, uperekenge sembe ya ufu wa mbuto yiphya, yakufuma mu visasuni vyakukhoma, yeneiyo yakazingika pa moto na kuska.

¹⁵Ndipo uŵikepo mafuta na vyakununkhira. Ichi ndi chakupereka cha ufu.

¹⁶Musofi woche phande la chikumbusko cha sembe yira ya ufu, mafuta, ndiposo na vyakununkhira, kuŵa sembe yakocha, ya sungu liweme kwa FUMU.