Read new_tumbuka_bible Levitiko 20 Bible Online

Levitiko 20 - new_tumbuka_bible bible

Levitiko 20

¹FUMU yikati kwa Mozesi,

²“Uŵaphalire ŵaIsraele uti, ‘MuIsraele waliyose panji mulendo uyo wakukhara mukati mwinu, para wakupereka mwana wakhe kwa chiuta ngoza Moleki, wakwenera kukomeka na mpingo wose pakumudinya na mawe.

³Munthu wa ntheura nditi ndimikane nayo na kumuwuskamo mukati mu ŵanthu ŵakhwakhe chifukwa wapereka mwana wakhe kwa chiuta ngoza Moleki. Ndipo wakazuzga malo ghane ghakupatulika na kukazuzga zina lane lituŵa.

⁴Kweni usange ŵanthu ŵakuzerezga kureka kumukoma chifukwa chakupereka mwana wakhe kwa Moleki,

⁵Ine nditi ndimikane nayo munthu uyo na mbumba yakhe ndipo nditi ndimuwuskemo mukati mu ŵanthu ŵakwakhe, iyo na wose awo ŵakumurondezga pakuchita uzaghali wakumurondezga Moleki.’ ”

⁶“ ‘Usange munthu waliyose wakuruta ku ŵawukwi na ku ŵamayere na kujikazuzga nawo, nditi ndimikane nayo mukati mu ŵanthu ŵa kwakhe.

⁷Ntheura mujipatuliske ndipo muŵenge ŵatuŵa, pakuti ine ndine FUMU, Chiuta winu.

⁸Musungilirenge marango ghane na kughachita. Ine ndine FUMU, yeneiyo yikumupatuliskani.’ ”

⁹“ ‘Usange munthu waliyose wakutemba ŵawiske panji ŵanyina, wakwenereka kukomeka. Mrandu wa nyifwa yawo wamkuŵa pa iyo mwenecho pakuti watemba ŵapapi ŵakhe.’ ”

¹⁰“ ‘Usange mwanarume waliyose wagonana na muwoli wa muzengezgani wakhe wose ŵaŵiri mwanarume na mwanakazi ŵakwenera kukomeka.

¹¹Usange mwanarume waliyose wagonana na muwoli wa ŵawiske, ndiko kuti wavura ŵawiske. Wose ŵaŵiri, ŵakwenera kukomeka. Mrandu wa nyifwa yawo wamkuŵa pa iwo ŵenecho.

¹²Usange mwanarume waliyose wagonana na mukamwana wakhe, wose ŵaŵiri ŵakwenera kukomeka, pakuti ŵachita cha ukazuzi chomene. Mrandu wa nyifwa yawo wamkuŵa pa iwo ŵenecho.

¹³Usange mwanarume wakugonana na mwanarume munyakhe nga ndi umo wangachitira na mwanakazi, wose ŵaŵiri ŵachita chinthu cha ukazuzi, ndipo ŵakwenera kukomeka. Mrandu wa nyifwa yawo wamkuŵa pa iwo ŵenecho.

¹⁴Usange mwanarume wakutora mwanakazi pamoza na nyina wa mwanakazi, wananga chomene. Wose ŵatatu ŵakwenera kocheka pa moto mwakuti kureke kuŵamo kwananga kwa ntheura mukati mwinu.

¹⁵Usange mwanarume waliyose wagonana na chinyama wakwenera kukomeka, ndipo chinyama nacho chikwenera kukomeka.

¹⁶Usange mwanakazi wakusenderera ku chinyama kuti wagonane nacho, mukome mwanakazi uyo na chinyama wuwo. Mrandu wa nyifwa yawo wamkuŵa wa iwo ŵenecho.’ ”

¹⁷“ ‘Usange mwanarume watora mudumbu wakhe, uyo ndi mwana mwanakazi wa ŵawiske, panji mwana mwanakazi wa ŵanyina na kugonana nayo, wose ŵaŵiri ŵakwenera kuwuskikako panthazi pa ŵanthu ŵa ku kwawo. Iyo wachita chithu cha soni chomene pakuvura mudumbu wakhe ndipo wakwenera kukomeka.

¹⁸Usange mwanarume wagonana na mwanakazi apo wali ku mwezi, na kuvura nkhule yakhe, waŵika pakweru chisimi cha ndopa zakhe, ndiposo mwanakazi nayo waŵika pakweru chisimi cha ndopa zakhe. Wose ŵaŵiri ŵakwenera kuwuskikamo mukati mwa ŵanthu ŵa ku kwawo.’ ”

¹⁹“ ‘Ureke kugonana na mwanakazi uyo ndi munung'una wa ŵanyoko, panji mudumbu wa ŵawuso, pakuti kuchita ntheura nkhuvura nkhule ya mubali wako uyo ndi ndopa yimoza na iwe. Wose ŵaŵiri ŵakwenera kulangika chifukwa cha uheni uwu.

²⁰Usange munthu wakugonana na muwoli wa sibweni wakhe, ndiko kuti wavura sibweni wakhe. Wose ŵaŵiri ŵakwenera kulangika, ŵati ŵaŵenge ŵambula mwana.

²¹Usange mwanarume waliyose wakutora mwanakazi wa munung'una wakhe panji mukuru wakhe, wachita chinthu cha ukazuzi chomene pakuvura mubali wakhe, ndipo ŵati ŵaŵe na mwana chara.’ ”

²²“ ‘Ntheura sungilirani marango ghane na kuchita vyose ivyo nkhumulangulirani mwakuti charu icho mukurutako kuya kakhara chireke kumuwukirani.

²³Mureke kuya kakhara kwakuyana na maluso gha mafuko agho nditi ndichimbizge panthazi pinu. Iwo ŵakuchita vinandi ivyo nvya ukazuzi. Ntheura nkhaseruskika na iwo.

²⁴Kweni nkhawona kuti mwamkuhara charu chawo, ndipo nda chipereka kwa imwe kuti chiŵe chinu charu cha mkaka na uchi. Ine ndine FUMU, Chiuta winu mweneuyo nkhamupatulaniko ku ŵamitundu.

²⁵Ntheura mupambaniskenge pakati pa nyama zambula kuphotoka na zakuphotoka, pakati pa viyuni vyambula kuphotoka na vyakuphotoka. Mureke kujikazuzga pakurya vinyama panji viyuni, panji kalikose ako kazura pa charu, vyeneivyo ndamupatulirani imwe kuti muvipime kuŵa vyambula kuphotoka.

²⁶Muŵenge ŵatuŵa kwa ine, pakuti ine FUMU ndili mutuŵa, ndipo ndamupatulaniko ku ŵamitundu.

²⁷Mwanarume waliyose panji mwanakazi uyo ndi muwukwi panji ngwamayere wakwenera kukomeka pakudinyika na mawe. Mrandu wa nyifwa yakhe uti uŵenge pa iyo yekha.’ ”