Read new_tumbuka_bible Levitiko 21 Bible Online

Levitiko 21 - new_tumbuka_bible bible

Levitiko 21

¹FUMU yikati kwa Mozesi, “Uŵaphalire ŵasofi, ŵa mbumba ya Aroni, uti, ‘Paŵavye na yumoza wa imwe wakujikazuzga pakukhwaska chitanda cha yumoza wa mubali wakhe uyo wafwa.’

²Kweni wangakhwaska chitanda cha ŵabali ŵakhe ŵeneŵene awo ndi ŵanyina, ŵawiske, mwana wakhe mwanarume, mudumbu wakhe munung'una panji mukuru wakhe,

³panji mudumbu wakhe uyo ngwa kulangwa, mweneuyo wakukhara mu nyumba yakhe, pakuti wandatengwe. Chifukwa cha uyu wakajikazuzga.

⁴Wareke kujikazuzga na kujifipiska na nyifwa ya munthu uyo watorerana nayo mu mbumba yimoza.

⁵“Ŵasofi ŵareke kumeta mutendezero ku mitu yawo panji kudumulira mwembe wawo, nesi kujicheka mu mathupi chifukwa cha ŵakufwa.

⁶Ŵaŵenge ŵakupatulika kwa ine Chiuta wawo ndipo ŵareke kukazuzga zina la Chiuta wawo. Pakuti iwo ndiwo ŵakupereka sembe yakocha pa moto kwa FUMU icho nchakurya chakuperekeka kwa Chiuta wawo. Ntheura ŵaŵenge ŵakupatulika.

⁷Ŵasofi ŵareke kutora mwanakazi uyo ndi muzaghali panji uyo wali kukazuzgika, nanga nkhutora mwanakazi uyo wali kusuzulika na mufumu wakhe. Pakuti musofi ngwa kupatulika kwa ine Chiuta wakhe.

⁸Mumupatuliske, pakuti ndiyo wakupereka chakurya cha Chiuta winu. Waŵenge wakupatulika kwa imwe, pakuti ine FUMU, ndamweneine nkhumupatuliskani, ndili mutuŵa.

⁹Usange mwana mwanakazi wa musofi wakujikazuzga pakuchita uzaghali, wakukazuzga ŵawiske ndipo wakwenera kocheka pa moto.

¹⁰“Musofi mukuru uyo ngwa pachanya pa ŵanyakhe mweneuyo ŵali kumuphakazga pa mutu na mafuta ndiposo wali kupatuliskika kuti wavwarenge vyakuvwara vya usofi wareke kureka sisi lakhe kuti liŵe lambula kupesa nanga nkhuparura vyakuvwara vyakhe chifukwa cha ŵakufwa.

¹¹Wareke kunjiramo mose umo muli chitanda mzire wajikazuzge, manyi chiŵe chitanda cha ŵawiske panji ŵanyina.

¹²Wareke kufumamo nesi kukazuzga Chihema Chakupatulika cha Chiuta wakhe. Pakuti wali kupatuliskika na mafuta ghakuphakazgira gha Chiuta wakhe. Ine ndine FUMU.

¹³Watore mwanakazi uyo ngwa kulangwa.

¹⁴Wareke kutora mwanakazi uyo ndi chokoro, panji uyo wali kusuzulika na mufumu wakhe, nesi uyo wali kujikazuzga na uzaghali, kweni watore mwanakazi wakulangwa kufuma mu ŵanthu ŵakwakhe.

¹⁵Watore ntheura mwakuti wareke kunjizga mtundu unyakhe wambula kupatulika mukati mu ŵana ŵakhe. Ine ndine FUMU, mweneuyo wakumupatuliska.”

¹⁶FUMU yikati kwa Mozesi,

¹⁷“Yowoya kwa Aroni uti, ‘Paŵavye na yumoza wa mphapu yako mu miwiro yose uyo wali na kalema, wati wize na kupereka chakurya chakuperekeka kwa Chiuta wakhe.

¹⁸Munthu waliyose uyo ngwa kalema wareke kwiza pafupi, manyi ndi wa chiburumutira panji wakupunduka lundi panji wakupunduka chisko, panji wambula kulengeka makora mu viŵaro vinyakhe,

¹⁹panji munthu uyo ngwa kuphyoka lundi panji woko,

²⁰panji munthu wa lununda pa msana panji wa musinkhu ufupi, panji wa jiso la sanga, panji wa mphere, panji wa chipere, panji wakuphwanyika mavwaro.

²¹Waliyose wa mphapu ya musofi Aroni uyo wali na kalema, wareke kwiza pafupi na kupereka sembe yakocha pa moto kwa FUMU. Pakuti wali na kalema, wangizanga chara kufupi kuya kapereka chakurya chakuperekeka kwa Chiuta wakhe.

²²Kweni munthu uyo wangamanya kurya chakurya chakuperekeka kwa Chiuta wakhe, chakupatulika nkhanira ndiposo na chakurya chinyakhe chakupatulika.

²³Kweni wareke kwiza pafupi na chisalu chakuchinga panji jochero, chifukwa wali na kalema, mwakuti wareke kukazuzga malo ghane ghakupatulika. Pakuti Ine ndine FUMU yeneiyo yikaŵa patula ŵasofi.’ ”

²⁴Ntheura Mozesi wakaphalira Aroni, ŵana ŵakhe, ndiposo ŵaIsraele vinthu vyose ivi.