Read new_tumbuka_bible Levitiko 22 Bible Online

Levitiko 22 - new_tumbuka_bible bible

Levitiko 22

¹FUMU yikati kwa Mozesi,

²“Umuphalire Aroni na ŵana ŵakhe kuti ŵachindikenge vinthu vyakupatulika ivyo ŵaIsraele ŵakupereka kwa ine mwakuti ŵareke kukazuzga zina lane lituŵa. Ine ndine FUMU.

³Ku miwiro yinu yose, usange yumoza wakusenderera ku vinthu vyakupatulika, vyeneivyo ŵaIsraele ŵakupatuliskira ku mlimo wa FUMU, penepapo munthu uyo ngwambula kuphotoka, wa ntheura wawuskikengepo panthazi pane. Ine ndine FUMU.”

⁴“ ‘Munthu waliyose wa mphapu ya Aroni uyo wali na vyoni panji wali na nthenda yakusurura mafira ku mavwaro ghakhe wareke kuryako vinthu vyakupatulika mpaka watozgeke danga. Musofi waliyose wati waŵe wakukazuzgika usange wakukhwaska chinthu icho chakhwaskika na ŵanarume,

⁵panji wakhwaska chinthu icho chikukhwaŵa, cheneicho chingamanya kumukazuzga, panji wakhwaske munthu uyo wangamwambizga ukazuzi wakhe wa mtundu uliwose.

⁶Musofi uyo wakukhwaska vya ntheura wati waŵenge wakukazuzgika mpaka na mise, ndipo wareke kuryako chilichose icho nchakupatulika wasuke wageze mu thupi na maji.

⁷Para dazi lanjira, ndipo wati waŵenge wakutozgeka. Ntheura ndipo wangaryangako vinthu vyakupatulika pakuti vyeneivyo ndi chakurya chakhe.

⁸Wareke kurya chinyama chilichose icho chafwa chekha, panji icho chaliwa na chikoko, mzire wajikazuzge na icho. Ine ndine FUMU.

⁹Ŵasofi ŵakwenera kusungilira marango ghane agho ndaŵapa, mwakuti ŵareke kwananga ndipo ŵafwe chifukwa chakureka kupulikira marango ghane. Ine FUMU ndine ndili kuŵapatuliska.’ ”

¹⁰“ ‘Wa pa dera pa ŵa mphapu ya musofi, wareke kuryako icho nchakupatulika. Mulendo wa musofi, panji wanchito wakhe wareke kuryako chinthu chakupatulika.

¹¹Kweni muzga wa musofi uyo wali kugulika na ndarama panji uyo wali kubabika mu nyumba ya musofi ndimo ŵangaryako chakurya icho musofi wakupokera.

¹²Usange mwana mwanakazi wa musofi watorana na munthu bweka, uyo kuti ndi musofi chara, wareke kuryako chilichose cha vinthu ivyo nvyakupatulika.

¹³Kweni usange mwana mwanakazi wa musofi ndi chokoro, panji wasuzulika ndipo walije mwana, wawerere ku ŵawiske. Wati wakhare pa ŵawiske nga ndi umo wakakhaliranga pa wanichi wakhe ndipo wangaryako chakurya cha ŵawiske. Ndipouli munthu bweka, uyo kuti ndi musofi chara, wareke kuryako.’ ”

¹⁴“ ‘Usange munthu waliyose wakuryako chinthu icho nchakupatulika kwambula kumanya, wati wasazgirepo chigaŵa chimoza cha vigaŵa vinkhonde cha mtengo wa chinthu chakupatulika chira, na kupereka chinthu chakupatulika chira kwa musofi.

¹⁵Ŵasofi wareke kukazuzga vinthu vyakupatulika ivyo ŵaIsraele ŵakupereka kwa FUMU,

¹⁶mwa ntheura ŵakuŵanjizga ŵaIsraele mu kwananga na mu mrandu, pakuŵazomerezga kuti ŵaryeko vinthu vyakupatulika. Ine ndine FUMU yeneiyo yikaŵapatuliska ŵasofi.’ ”

¹⁷FUMU yikati kwa Mozesi,

¹⁸“Yowoya kwa Aroni na ŵana ŵakhe ndiposo na ku ŵaIsraele wose uti, ‘Usange yumoza wa imwe, panji mulendo uyo wakukhara mukati mwinu, wakupereka sembe yakhe yakocha manyi nja kufiska chirapo panji yakuperekera mu wanangwa kwa FUMU,

¹⁹sembe iyo yikwenera kuŵa yanarume yambula kalema, manyi ndi nkhambako, mberere panji mbuzi.

²⁰Mureke kupereka chiŵeto icho ncha kalema mzire chireke kupokerereka.

²¹Usange munthu waliyose wakupereka kufuŵa mu ng'ombe, mberere, panji mbuzi kuŵa sembe ya wenenawene kwa FUMU kuti wafiske chirapo chakhe panji yakuperekeka mu wanangwa yikwenera kuŵa yakufikapo na yambula kalema kuti yipokerereke.

²²Mungaperekanga kwa FUMU chiŵeto chilichose icho nchakufwa maso panji nchakuphyoka panji nchakupunduka, panji cha chilonda chakufuma mafira, panji cha kunyenyera panji cha mphere. Mureke kupereka viŵeto ivi pa jochero kuŵa sembe yakocha.

²³Ungapereka nkhambako, panji mwana-mberere uyo wali na chiŵaro chinyakhe chitali panji chifupi kuŵa sembe ya mu wanangwa. Kweni usange yikuperekeka kufiska phangano, kuti yingapokerereka chara.

²⁴Mungaperekanga kwa FUMU chiŵeto icho mavwaro ghakhe ngakupwetekeka, panji kung'anyika, panji kudumuka. Mureke kupereka cha ntheura nesi kukomera mu charu chinu kuŵa sembe.’ ”

²⁵“ ‘Mureke kupereka chiŵeto chilichose cha ntheura icho chafuma kwa mulendo kuti chiŵe sembe ya chakurya kwa Chiuta winu. Chiŵeto cha ntheura kuti chipokererekenge chara chifukwa chili na chilema ndipo ndi ncha kupunduka.’ ”

²⁶FUMU yikati kwa Mozesi,

²⁷“Usange nkhambako, panji mberere, panji mbuzi yababika, yikwenera kukhara na nyina mazuŵa ghankhonde na ghaŵiri, ndipo kwamba pa zuŵa la chinkhonde na chitatu na ghanyakhe gha munthazi yiti yipokererekenge kuŵa sembe yakocha kwa FUMU.

²⁸Mureke kukoma ng'ombe panji mberere pamoza na mwana wakhe pa zuŵa limoza.

²⁹Para mukupereka sembe yakuwongera FUMU, mukwenera kuyipereka mu nthowa yiweme kuti muŵe ŵakupokerereka.

³⁰Nyama iyo yikwenera kuryeka zuŵa leneliro, ndipo yireke kukharako mpaka na machero. Ine ndine FUMU.”

³¹“Ntheura sono sungilirani marango ghane na kugharondezga. Ine ndine FUMU.

³²Mureke kukazuzga zina lane lituŵa, kweni nditi ndimanyikwe na ŵaIsraele kuti ndili mutuŵa. Ine ndine FUMU yeneiyo yikumupatuliskani.

³³Ndipo ndine ine nkhamufumiskani mu Eguputo kuti ndiŵe Chiuta winu. Ine ndine FUMU.”