Read new_tumbuka_bible Levitiko 23 Bible Online

Levitiko 23 - new_tumbuka_bible bible

Levitiko 23

¹FUMU yikati kwa Mozesi,

²“Yowoya ku ŵaIsraele uti, ‘Viphikiro vyakwimikika vya FUMU, vyeneivyo nvyane, ivyo imwe mukwenera kuvipharazga nga ndi maungano ghakupatulika gha visopo, ndi ivi.

³Pali mazuŵa ghankhonde na limoza agho mukwenera kuchitira milimo yinu, kweni pa zuŵa la chinkhonde na chiŵiri ndi Sabata lakupumulira, zuŵa la ungano wakupatulika wa visopo. Mureke kuchita mlimo uliwose pa zuŵa ili. Kulikose uko mwakuŵa, ili ndi sabata kwa FUMU.’

⁴Viphikiro vyakwimikika vya FUMU, ivyo ndi maungano ghakupatulika gha visopo, vyeneivyo mukwenera kukondwerera mu nyengo zakhe ndi ivi.

⁵“Pa zuŵa la 14 la mwezi wakudanga, ku mise kwakhe, ndi zuŵa la Paska la FUMU.

⁶Pa zuŵa la 15 la mwezi weneuwu wakudanga ndi chiphikiro cha Chingwa chambula chirungo cha FUMU. Mazuŵa ghankhonde na ghaŵiri muryenge vingwa vyambula chirungo.

⁷Pa zuŵa lakudanga mukaŵenge na ungano wakupatulika wa visopo ndipo mureke kuchita mlimo uliwose unonono.

⁸Kweni pa mazuŵa ghankhonde na ghaŵiri muperekenge sembe yakocha kwa FUMU. Zuŵa la chinkhonde na chiŵiri ndi zuŵa la ungano wakupatulika wa visopo. Mureke kuchita mlimo unonono.”

⁹FUMU yikati kwa Mozesi,

¹⁰“Yowoya ku ŵaIsraele kuti para mwamkunjira mu charu icho nditi ndimupani, ndipo para mwaya kavuna vyakurya vya mwenemura, mukizenge na mphundwe ya vipambi vyakwamba kucha vya vuna yinu na kupereka kwa musofi.

¹¹Iyo wati wazungunye mphundwe yira panthazi pa FUMU mwakuti kuti muŵe ŵamapokerereko. Na machero ghakhe para lajumpha sabata, musofi wamkuyizungunya mphundwe yira.

¹²Pa zuŵa lakuperekera mphundwe yira, muperekeso kwa FUMU mwana-mberere mwanarume wa chirimika chimoza wambula kalema kuti waŵe sembe yakocha.

¹³Pamoza na sembe iyi, mukaperekeso sembe ya ufu uweme ufu wakunyiririka wakukwana vigaŵa viŵiri mu vigaŵa khumi vya debe wakusazgikana na mafuta kuti yiŵe sembe yakocha ya sungu liweme kwa FUMU. Muperekeso pamoza na sembe iyi ya chakumwa cha vinyo wakukwana lita yimoza.

¹⁴Mureke kurya chingwa, panji tirigu wakukazinga, panji wakuphika zuŵa ili lindafike pambere mundapereke sembe iyi kwa Chiuta winu. Ili ndi dango la muyirayira mu miwiro yinu yose kose uko mwamkukhara.”

¹⁵“Kwamba pa zuŵa ilo likurondezga Sabata, leneilo mukizira na mphundwe ya sembe yakuzungunya kwa FUMU, mupende masabata gha mphumphu ghankhonde na ghaŵiri.

¹⁶Pa zuŵa la 50 kwamba pa zuŵa lakurondezgapo pa sabata la chinkhonde na chiŵiri ndipo penepapo mukaperekenge kwa FUMU sembe ya ufu wa mbuto yiphya.

¹⁷Mukizenge na vingwa viŵiri kufuma mu zinyumba zinu kuti viŵe sembe yakuzungunya kwa FUMU. Vipangike na ufu wakunyiririka wakukwana vigaŵa viŵiri mu vigaŵa khumi vya debe ndipo viphikike na chirungo na kuperekeka kwa FUMU nga ndi vipambi vyakudanga.

¹⁸Ndipo pamoza na chingwa, mpingo wose upereke ŵana-mberere ŵankhonde na ŵaŵiri, wose ŵa chirimika chimoza, nkhambako yimoza, na mberere zanarume ziŵiri, ndipo vyose ivi viŵe vyambula kalema. Ndipo viperekeke kuŵa sembe yakocha kwa FUMU pamoza na sembe ya ufu, na ya vyakumwa kuti viŵe sungu liweme lakukondweska kwa FUMU.

¹⁹Muperekeso pepe yumoza kuŵa sembe ya zakwananga na ŵana-mberere ŵanarume ŵaŵiri ŵa chirimika chimoza kuŵa sembe ya wenenawene.

²⁰Musofi wati wapereke vingwa vya vipambi vyakudanga kuphya vira pamoza na ŵana-mberere ŵaŵiri ŵara kuŵa sembe yakuzungunya kwa FUMU. Zeneizi ndi sembe zakupatulika kwa FUMU kuti ziŵenge za ŵasofi.

²¹Ndipo pa zuŵa leneilo mukapharazge kuti kuŵenge ungano wakupatulika wa visopo. Mureke kuchita mlimo unonono. Ili ndi dango la muyirayira mu miwiro yinu yose uko mwamkukhara.

²²“Para mukuvuna vya mu minda yinu, mureke kuya kavuna na mu mphepete mwa munda, nanga nkhuvuluramo para mwavunamo. Mukaŵa rekererenge ŵakavu na ŵalendo. Ine ndine FUMU, Chiuta winu.”

²³FUMU yikati kwa Mozesi,

²⁴“Yowoya ku ŵaIsraele uti, ‘Pa zuŵa lakudanga la mwezi wa chinkhonde na chiŵiri, mukwenera kuŵa na zuŵa la kupumulira, zuŵa la chikumbusko lakupharazgika na kulira kwa zimbata ndiposo na zuŵa la ungano wakupatulika wa visopo.

²⁵Mlimo uliwose unonono ureke kuchitika pa zuŵa ili kweni muperekenge sembe yakocha kwa FUMU.’ ”

²⁶ FUMU yikati kwa Mozesi,

²⁷“Pa zuŵa la khumi la mwezi wenewura wa chinkhonde na chiŵiri ndi zuŵa lakuphepiskira. Yamkuŵa kwa imwe nyengo ungano wakupatulika wa visopo, ndipo imwe mwamkujilanga na kuziŵizga kurya na kupereka sembe yakocha kwa FUMU.

²⁸Mureke kuchita mlimo uliwose pa zuŵa ili pakuti ndi zuŵa la kuphepiskira panthazi pa FUMU, Chiuta winu.

²⁹Munthu waliyose uyo wamkureka kuziŵizga kurya pa zuŵa leneilo, wamkuwuskikamo mukati mu ŵanthu ŵakwakhe.

³⁰Ndipo waliyose uyo wamkuchita mlimo pa zuŵa leneilo, nditi ndimumare petu mukati mu ŵanthu ŵa kwakhe.

³¹Mureke kuchita mlimo uliwose pa zuŵa ili. Ili ndi dango la muyirayira mu miwiro yinu yose kose uko mwamkukhara.

³²Kwamba na mise wa zuŵa la khumi la mwezi weneuwu, likaŵe nga ndi zuŵa likuru la sabata la kupumulira kwinu ndipo mureke kurya kalikose pa zuŵa ili.”

³³ FUMU yikati kwa Mozesi,

³⁴“Yowoya ku ŵaIsraele uti, ‘Kwamba pa zuŵa la 15 la mwezi wenewura wa chinkhonde na chiŵiri, chiphikiro cha misasa cha kuchindikira FUMU chikambikenge na kurutilira mpaka mazuŵa ghakhe ghankhonde na ghaŵiri.

³⁵Pa zuŵa lakudanga mukaŵenge na ungano wakupatulika wa visopo ndipo mukareke kuchita mlimo unonono.

³⁶Pa mazuŵa ghankhonde na ghaŵiri, mukaperekenge sembe zakocha kwa FUMU ndipo pa zuŵa la chinkhonde na chitatu mukaŵenge na ungano wakupatulika wa visopo na kupereka sembe yakocha kwa FUMU. Uwu ndi ungano wakuzirwa. Mureke kuchita mlimo unonono.’ ”

³⁷(“ ‘Vyeneivi ndi viphikiro ivyo vili kwimikika kuti muchindikirenge FUMU, vyeneivyo mukwenera kuvipharazga nga ndi nyengo ya ungano wakupatulika wa visopo na kwiza na sembe zakupereka kwa FUMU na moto. Sembe yakocha, sembe ya ufu, sembe ya wenenawene, sembe ya vyakumwa, yiliyose pa zuŵa lakhe na lakhe.

³⁸Viphikiro ivi ndi vya kusazgirako waka ku maSabata gha FUMU, na vyawanangwa vyinu ivyo mukupereka pakufiska mapangano ghinu, na ivyo mukuperekera mu wanangwa kwa FUMU.’ ”)

³⁹“ ‘Kwamba pa zuŵa la 15 la mwezi wa chinkhonde na chiŵiri, mwati mwakorora vya mu minda yinu, chiphikiro cha misasa cha kuchindikira FUMU chikambenge na kurutilira mpaka mazuŵa ghanyakhe ghankhonde na ghaŵiri. Zuŵa lakudanga la mazuŵa ghankhonde na ghaŵiri likaŵenge zuŵa likuru lakupumulira ndipo zuŵa la chinkhonde na chitatu nalo likaŵenge zuŵa likuru la kupumulira.

⁴⁰Pa zuŵa lakudanga mukatore vipambi viweme kufuma mu makuni ghinu, minthavi ya makuni gha mikama, na gha katope mu mphepete mwa kamronga ndipo mukambenge chiphikiro ichi cha kuchindikira FUMU, Chiuta winu kwa mazuŵa ghankhonde na ghaŵiri.

⁴¹Mukaŵenge na chiphikiro ichi cha kuchindikira FUMU kwa mazuŵa ghankhonde na ghaŵiri mu chirimika. Ili ndi dango la muyirayira mu miwiro yinu yose. Mukaŵenge na chiphikiro ichi mu mwezi wa chinkhonde na chiŵiri.

⁴²Mose imwe muli ŵenecharu mu Israele mukakharanga mu misasa kwa mazuŵa ghankhonde na ghaŵiri pa nyengo ya chiphikiro ichi.

⁴³Muchite ichi mwakuti ŵa mphapu zinu ŵamanyenge kuti ine nkhaŵakhariska ŵaIsraele mu misasa apo nkhati ndaŵafumya mu charu cha Eguputo. Ine ndine FUMU, Chiuta winu.’ ”

⁴⁴Umu ndimo Mozesi wakaŵaphalira ŵaIsraele viphikiro vyakwimikika vya FUMU.