Read new_tumbuka_bible Levitiko 24 Bible Online

Levitiko 24 - new_tumbuka_bible bible

Levitiko 24

¹FUMU yikati kwa Mozesi,

²“Uŵalangure ŵaIsraele kuti ŵizenge na mafuta ghaweme gha nyali ghakwengeka kufuma ku vipambi vya olive, mwakuti ungweru wakugolera kwa nyali uŵengeko nyengo zose mu Chihema.

³Mise yiliyose Aroni wakozgenge nyali izi kuti zigolerenge usiku wose mpaka na mulenje mukati mwa Chihema Chakukumaniranamo kuwaro kwa chisalu chakuchinga Bokosi la Phangano. Ili liŵenge dango la muyirayira mu miwiro yinu yose.

⁴Aroni wati wakozgenge nyali izi pa chakuŵikapo nyali cha golide mwenecho kuti zigolere nyengo yose panthazi pa FUMU.

⁵“Mutore ufu wakunyiririka ndipo muphike vingwa vipapati 12. Chingwa chipapati chimoza chiphikike na ufu wakukwana makilogiramu ghaŵiri.

⁶Mutundandike mu mizere yiŵiri pa thebulu la golide mwenecho panthazi pa FUMU. Mzere umoza uŵe na vingwa vipapati vinkhonde na chimoza.

⁷Pa mzere uliwose, muŵikepo vyakununkhira viweme kuŵa nga ndi chakurya cha chikumbusko cha sembe yakocha kwa FUMU mu malo gha chingwa.

⁸Sabata na sabata, Aroni watundandikenge vingwa vipapati vira nyengo yose panthazi pa FUMU mu malo mwa ŵaIsraele nga ndi phangano la muyirayira.

⁹Sembe iyi yikaŵenge ya Aroni na ŵana ŵakhe ndipo ŵakaryenge mu malo ghakupatulika pakuti ichi nchigaŵa chakupatulika nkhanira kwa iwo chakufumira mu sembe yakocha kwa FUMU. Ili ndi dango lakwimikika kwa muyirayira.”

¹⁰Zuŵa linyakhe munthu yunji uyo nyina wakaŵa muIsraele ndipo wiske wakaŵa muEguputo wakaruta ku ŵaIsraele na kuwuska zawe pakati pa iyo na muIsraele mu msasa.

¹¹Munthu yura uyo nyina wakaŵa muIsraele ndipo wiske muEguputo wakatuka zina la FUMU na kulitemba. Ntheura wakiza nayo kwa Mozesi. Zina la nyina likaŵa Shelomiti mwana wa Dibiri wa fuko la Dani.

¹²Ŵakamuŵika mu gadi yisuke FUMU yipereke udumuliro wakhe.

¹³Penepapo FUMU yikati kwa Mozesi,

¹⁴“Umutore munthu wakutemba uyo na kuruta nayo kuwaro kwa msasa. Wose awo ŵakamupulika wakutemba, waŵikepo mawoko ghawo pa mutu wakhe, ndipo mpingo wose umudine na mawe.

¹⁵Uŵaphalire ŵaIsraele kuti, ‘Munthu yose uyo wakutemba Chiuta wakhe, mrandu wa nyifwa yakhe uti uŵenge pa iyomwene.

¹⁶Yose uyo wakutuka zina la FUMU wati wakomekenge. Mpingo wose umudine na mawe. Manyi ndi mulendo panji mwenecharu wakwenera kukomeka para watuka zina la FUMU.’ ”

¹⁷“Munthu yose uyo wakoma munthu nayo wakwenera kukomeka.

¹⁸Munthu uyo wakoma chakuŵeta cha munthu munyakhe, walipirepo chakuŵeta chinyakhe chamoyo.”

¹⁹“Para munthu wapundura muzengezgani wakhe, nayoso kumuchitikire nga ndi umo iyo wachitira.

²⁰Usange waphyora chiwangwa, nayo chakhe chiphyoke, jiso na jiso, jino na jino. Nga ndi umo wapundulira munyakhe, nayo wapundukwe.

²¹Munthu yose uyo wakoma chakuŵeta cha munyakhe, walipirepo na chakuŵeta, kweni uyo wakoma munthu, nayoso wakwenera kukomeka.

²²Mukwenera kuŵa na dango limoza pera, ku mulendo na mwenecharu. Ine ndine FUMU, Chiuta winu.”

²³Penepapo Mozesi wakaŵaphalira ŵaIsraele, ndipo iwo ŵakamutora na kumufumiska munthu wakutemba yura kuwaro kwa msasa na kumudina na mawe. Ntheura ŵaIsraele ŵakachita nga ndi umo FUMU yikalangulira Mozesi.