Read new_tumbuka_bible Levitiko 25 Bible Online

Levitiko 25 - new_tumbuka_bible bible

Levitiko 25

¹FUMU yikati kwa Mozesi pa Phiri la Sinayi,

²“Yowoya ku ŵaIsraele uti, ‘Para mwamkunjira mu charu icho nkhumupani, mukachindikenge FUMU pakureka kuchilima charu mu chirimika chilichose cha chinkhonde na chiŵiri mwakuti chipumulenge.

³Pa virimika vinkhonde na chimoza mukalimenge mu minda yinu na kuphatilira makuni ghinu gha mpheska na kuvuna vipambi vyakhe.

⁴Kweni mu chirimika cha chinkhonde na chiŵiri, charu chikaŵenge na sabata yakupumula, Sabata kwa FUMU. Mu chirimika ichi, mureke kupanda nesi kuphatilira mpheska zinu.

⁵Mukareke kukorora ivyo vyamera vyekha nesi kuponthora mpheska kufuma mu makuni ghakhe ghambula kuphatilira. Ichi ndi chirimika icho charu chikwenera kupumulira kwambula kulimika.

⁶Nangauli mundalime mu chirimika cha chinkhonde na chiŵiri, ndipouli muti muŵenge na vyakurya kuti imwe, ŵazga ŵinu, ŵanchito ŵinu na ŵakupanjwa awo ŵakukhara mu charu chinu ŵarye.

⁷Viŵeto vyinu navyo, na vinyama vya mu thondo viti viŵenge na chakurya chakukwanira kufuma mu ivyo charu chapambika.’

⁸“Mukapendenge masabata ghankhonde na ghaŵiri ya virimika ndipo virimika vinkhonde na viŵiri kwandaniska kankhonde na kaŵiri gha vimirika ghara, ghati ghaŵenge virimika 49.

⁹Pa zuŵa la khumi, ilo ndi zuŵa la kuphepiskira mwezi wa chinkhonde na chiŵiri mukalizge mbata kuti yikapulikikwe mu charu chinu chose.

¹⁰Ndipo mukachipatuliske chirimika cha 50 na kupharazga kuti kuŵe wanangwa ku ŵanthu wose awo ŵakukhara mu charu. Mu chirimika cheneichi mukaŵe pa chikondwerero, ndipo waliyose wa imwe, wakawezge mphango wakugulika ku mwenecho wa pakudanga, ndipo yose uyo wakagulika kuŵa muzga, wakawerere ku charu cha ku kwakhe na ku mbumba yakhe.

¹¹Chirimika cha 50 chikaŵenge cha kukondwerera kwa imwe ndipo mukareke kuya kapanda kalikose nanga nkhuvuna ivyo vyamera vyekha nesi kuponthora mpheska kufuma mu makuni ghambula kuphatiririka.

¹²Ichi chamkuŵa chirimika cha kukondwerera virimika 50 ndipo chikaŵenge chakupatulika kwa imwe. Mukarye ivyo mwakorora mu minda yinu.

¹³“Mu chirimika ichi cha chikondwerero cha virimika 50, waliyose wa imwe wakawezge mphango ku mwenecho wa pakudanga.

¹⁴Usange ukuguliska mphango kwa munyako panji ukugula mphango kwa munyako, pareke kuŵa kulimbana.

¹⁵Mtengo wakhe uŵe wakupulikana pakuti pa mwaŵaŵiri kwakuyana na unandi wa virimika vyakukororera ivyo vyakharako pambere chikondwerero chindafike.

¹⁶Para virimika ivyo vyakharako ndi vinandi, mtengo wakhe ukaŵe ukuru, kweni para virimika vyakharako vichoko, mtengo wakhe ukaŵe uchoko, pakuti icho chikugwiriskika ndi unandi wa virimika vyakukororera.

¹⁷Mureke kuya kibirana yumoza na munyakhe pakuguliskana vinthu, kweni mopenge Chiuta. Ine ndine FUMU, Chiuta winu.

¹⁸“Ntheura mukasungilirenge marango ghane na kuchita ivyo nkhumulangulani. Ndipo muti mukharenge mu charu mu mutende.

¹⁹Penepapo charu chiti chipambikenge vipambi vyakhe ndipo imwe muti murye na kukhuta na kukhara mu mutende.

²⁰“Ndipo usange yunji wangafumba kuti, ‘Kasi tamuryachi mu chirimika cha chinkhonde na chiŵiri para tindalime nesi kuvuna?’

²¹Ine nditi ndilangule kuti muŵe na vitumbiko pa chirimika cha chinkhonde na chimoza. Ndipo charu chakumupani vuna ya kukwanira virimika vitatu.

²²Para mukupanda pa chirimika cha chinkhonde na chitatu muti muryenge ivyo mukavuna mu chirimika cha chinkhonde na chimoza, ndipo muti muŵenge na vinandi kuti muryenge mpaka mu chirimika cha chinkhonde na chinayi apo muti muvunirenge vinyakhe.

²³“Charu chireke kuguliskikirathu, pakuti nchane ndipo imwe muli ŵalendo na ŵakulimamo waka.

²⁴“Mu charu chose icho mwamkukharamo, mukazomerezge kuti mwenecho wa pakudanga wachiwombolenge.

²⁵Usange mubali wako wakavuka ndipo waguliska chigaŵa chinyakhe cha chiharo chakhe, mubali wakhe wa pafupi chomene wize na kuwombola chigaŵa cha chiharo chira icho chikaguliskika.

²⁶Usange munthu mukavu yura walije mubali wakhe uyo wangawombola chigaŵa cha chiharo chira, ndipo iyo mwenecho wasakata na kuŵa na khumbo kuti wachiwombole,

²⁷wakwenera kupima mtengo kwakuyana na virimika kufuma apo wakaguliskira chiharo chakhe na kupereka ndarama kwa uyo wakagula chiharo chira. Para wachita ntheura, ndipo watorenge chiharo chakhe.

²⁸Kweni usange wandasakate kuti wawombole chiharo chakhe penepapo chiharo chira chiti chiŵenge cha uyo wakagula kufikira pa chirimika cha kukondwerera virimika 50. Mu chirimika cheneicho, chiharo chira chiti chiŵenge chakuwombokwa ndipo chiti chiwerere ku mwenecho wa pakudanga.

²⁹“Usange munthu waguliska nyumba yakhe iyo yili mu msumba wa linga, wali na wanangwa wakuwombola nyumba yakhe yira nyengo yose mu chirimika chira kufuma apo wakaguliskira.

³⁰Usange nyumba yira yindawomboleke mu chirimika chose chira, wanangwa wakuwombolaso nyumba yira kulije. Nyumba yira iyo yili mukati mu linga la msumba, yiti yiŵenge ya uyo wakagula na ŵa mphapu yakhe ku miwiro yose ndipo nanga mpha chirimika cha kukondwera virimika 50 kuti yiwezgeke ku mwenecho wakudanga chara.

³¹Kweni nyumba zose za mu vikaya izo nzambula linga zikwenera kuwomboleka nyengo yiliyose, ndipo pa chirimika cha kukondwerera virimika 50 yikwenera kuwezgeka ku mwenecho wa pakudanga.

³²Kweni ŵaLevi pera ndiwo ŵali na wanangwa wakuwombolera mphango zawo nyengo yiliyose mu misumba iyo ŵakukharamo.

³³Ntheura mphango za ŵaLevi zingawomboleka. Izi ndi nyumba izo zaguliskika mu misumba yiliyose iyo ŵaLevi ŵakukharamo ndipo zingawezgeka mu chikondwerero cha virimika 50, chifukwa nyumba izo zili mu misumba ya ŵaLevi ndi mphango zawo mu ŵaIsraele.

³⁴Kweni charu cha mu maluhari kuzingirizga msumba, ya ŵaLevi chireke kuguliskika chara pakuti cheneichi ndi chiharo chawo kwa muyirayira.

³⁵“Usange mubali wako wakavuka ndipo wakutondeka kusanga wovwiri pa iyo yekha, umusunge ndiwe. Iyo wati wakharenge nawe nga ndi mulendo panji wakupanjwa nawe.

³⁶Ureke kupokapo chandulo kufuma kwa iyo nanga ndi vyakusazgirako, kweni umopenge Chiuta wako mwakuti mubali wako warutilire kukhara nawe.

³⁷Ureke kumubwerekeska ndarama kuti upokerepo za pachanya nesi kumupa chakurya kuti upoke chandulo.

³⁸Ine ndine FUMU, Chiuta winu, mweneuyo wakamufumyani mu charu cha Eguputo na kumupani charu cha Kanani na kuti ine ndine Chiuta winu.

³⁹“Usange mubali wako uyo ukukhara nayo wakavuka, ndipo wakajiguliska kwa iwe, ungamuteŵeteskanga mlimo nga ndi muzga.

⁴⁰Ŵakharenge nawe nga ndi uyo walembeka nchito, ndiposo nga ndi mulendo wakukhara nayo waka. Wakuteŵeterenge waka chisuke Chirimika cha kukondwerera virimika 50.

⁴¹Mu chirimika cheneichi, wati wafumengeko kwa iwe, iyo na ŵana ŵakhe ndipo wati wawerere ku mbumba yakhe na ku chiharo cha ŵawiske.

⁴²Pakuti ŵaIsraele mbateŵeti ŵane awo nkhaŵafumya mu charu cha Eguputo. Ŵareke kuguliskika nga mbazga.

⁴³Ureke kumuwusira mwa nkhaza kweni umopenge Chiuta wako.

⁴⁴Usange mukukhumba ŵazga, ŵanarume panji ŵanakazi, muŵagulenge kufuma mu ŵanthu ŵamitundu yinyakhe yeneiyo yamuzingirizgani.

⁴⁵Mungagulaso ŵazga kufuma mu ŵalendo awo mukukhara nawo mu charu chinu, ndiposo pakati pa ŵana ŵawo awo ŵababikira mu charu chinu. Ŵeneaŵa ŵanguŵa ŵinu na ŵinu.

⁴⁶Ndipo mungaŵatora ŵana ŵazga awo kuŵa chiharo cha ŵana ŵinu para imwe mwafwa. Ŵeneawo ŵati ŵateŵeterenge ŵana ŵinu pa umoyo wawo wose. Kweni mureke kuteŵeteska ŵaIsraele ŵanyinu mwa nkhaza.

⁴⁷“Usange mulendo panji uyo wakupanjwa nawe mu charu wakusambazga, apo mubali wako uyo wakukhara nawe wakavuka na kujiguliska yekha ku mulendo panji kwa mbumba ya wakupanjwa yura,

⁴⁸ntheura para wakujiguliska, wangawomboleka. Yumoza wa ŵabali ŵakhe wangamuwombola,

⁴⁹manyi ndi sibweni ŵakhe, muvyara wakhe, panji waliyose mubali wakhe wapafupi na mbumba yakhe wangamuwombola. Panji usange iyo mwenecho wasakata, wangamanya kujiwombola yekha.

⁵⁰Wakwenera kupulikana na uyo wakamugula na kupenda virimika kufuma apo wakajiguliskiranga kufikira chirimika cha kukondwera virimika 50. Mtengo wakuwomboleka kwakhe uyane na unandi wa virimika. Ndipo nyengo yose iyo wanguŵira na sekuru wakhe, yipendeke nga ndi ya munthu wa ganyu.

⁵¹Usange kwakharako virimika vinandi, wapereke mtengo wakuwombokwa kwakhe kufuma pa ndarama izo zikamugula.

⁵²Usange kwakhara virimika vichoko waka kuti mufike chirimika cha chikondwerero, wapulikane na uyo wakamugula kuti wawezgeko ndarama zakuwombolera kwakhe kwakuyana na virimika ivyo wamuteŵeteranga.

⁵³Wakwenera kukhara nga ndi wa nchito wa ng'ombe chirimika na chirimika. Ndipo wangamuwusanga mwa nkhaza apo ine nkhuwona chara.

⁵⁴Nangauli wandawomboleke chara mu nthowa zose izi, iyo na ŵana ŵakhe ŵati ŵawomboleke pa chirimika cha kukondwerera virimika 50.

⁵⁵Pakuti muIsraele wati wakhalirire kuŵa muzga chara, chifukwa ŵaIsraele mbazga ŵa FUMU, yeneiyo yikaŵafumya mu charu cha Eguputo. Ine ndine FUMU, Chiuta winu.”