Read new_tumbuka_bible Levitiko 26 Bible Online

Levitiko 26 - new_tumbuka_bible bible

Levitiko 26

¹FUMU yikati, Mureke kujipangira ŵachiuta ngoza panji chikozgo chakuŵaja, panji kujimikira mawe ghakupatulika, panji kujimikira chikozgo cha libwe mu charu chinu na kuchikozganiska na kanthu kalikose kuti muchigwadirenge. Ine ndine FUMU, Chiuta winu.

²Musungenge maSabata na kuchindika malo ghane ghakupatulika. Ine ndine FUMU.

³“Usange mukurondezga marango na kuchita ivyo nkhumulangulani,

⁴nditi ndimupani vura pa nyengo yakwenerera. Charu chiti chipambikenge vyakurya vinandi ndipo makuni nagho ghati ghapambikenge vipambi vinandi.

⁵Muti muŵenge na vyakurya vinandi chomene mwakuti pa nyengo yakuti muponthore vipambi mwamkuvunanga, pa nyengo yakuti mupande mwamkuponthora vipambi. Muti muŵenge na vinandi kuti murye ndipo muti mukharenge mu mutende mu charu chinu.

⁶“Ndamkuŵika mutende mu charu ndipo muti mugomezge kwambula na kofyeka na munthu waliyose. Vikoko vyose vikari mu charu chinu, nditi ndivichimbizgire kutali ndipo kwamkuŵa nkhondo mu charu chinu chara.

⁷Muti muŵa chimbizge ŵarwani ŵinu ndipo muti muŵathereske na lupanga panthazi pinu.

⁸Ŵankhonde ŵa imwe ŵati ŵachimbizge ŵarwani 100, ndipo ŵanthu 100 ŵa imwe ŵati ŵachimbizge ŵarwani 10,000. Ŵarwani ŵinu muti muŵathereske na lupanga panthazi pinu.

⁹Nditi ndimulaŵiskani na uchizi pakumubabiskani ŵana kuti mwandane. Ndipo nditi ndikhozge phangano lane pa imwe.

¹⁰Muti muryenge vyakurya vya chomba ndipo ivi mwizamkuvifumyamo kuti murongemo viphya.

¹¹Nditi ndikharenge namwe mu Chihema Chakupatulika ndipo mtima wane kuti useruskikenge na imwe chara.

¹²Nditi ndiŵenge namwe, ndipo nditi ndiŵenge Chiuta winu, imwe muti muŵenge ŵanthu ŵane.

¹³Ine ndine FUMU, Chiuta winu mweneuyo wakamufumyani mu charu cha Eguputo kuti mureke kuŵa ŵazga ŵawo. Ndaphyora goliwoli linu kuti mwendenge mwakunyoroka.”

¹⁴FUMU yikati, “Usange mwamkureka kundipulikira ndiposo na kureka kurondezga marango ghose agha,

¹⁵ndipo usange mukukana marango ghane, kutinkha ivyo nkhumulangulirani, kureka kupulikira marango ghane ghose panji kuswa phangano lane,

¹⁶ine nditi ndimuchitirani ichi: nditi ndikhizgire pa imwe chofyo mwa mabuchibuchi, nthenda ya kughandiska, kuthukira kwa mu thupi uko kukupereka chisi mu maso na kunanga umoyo wa munthu. Muti mupandenge mbuto zinu, kweni kuti muti mukolorenge chara chifukwa ŵarwani ŵinu ndiwo ŵizamkurya.

¹⁷Ndamkwimikana namwe mwakuti mwamkukomeka na ŵarwani ŵinu, ndipo awo ŵakumutinkhani ndiwo ŵamkumuwusani. Mwamkuchimbira kwambula kuti kuli munthu wakumuchimbizgani.

¹⁸“Usange mulije kundipulikira ndipera, nditi ndimulanganiso kankhonde na kaŵiri chifukwa cha kwananga kwinu.

¹⁹Nditi ndiswe nkhongono izo mukujikuzga nazo. Vura kuti yirokwenge chara, chifukwa mtambo uti womirenge nga chisulo ndipo charu cha pasi chiŵe chomizo nga ndi chisulo cha mkuŵa.

²⁰Ndipo nkhongono zinu zamkutayika pa waka pakuti charu chithu chiti chiŵenge na vyakurya chara, nanga ndi makuni ghinu kuti ghapambikenge vipambi chara.

²¹“Usange mukwenda kwakupambana nane na kukana kundipulikira, ndamkwandaniska nthenda zakofya kankhonde na kaŵiri kwakuyana na zakwananga zinu.

²²Ndamkutuma vikoko vikari mukati mwinu vyeneivyo vyamkukoma ŵana ŵinu na ng'ombe zinu mwakuti unandi winu uchepe. Ntheura nthowa zinu zamkuŵa zakuwuwa.

²³“Usange mundawerere kwa ine pamanyuma pa vilengo ivi, kweni mukurutilira kupambana nane mu kendero kinu ndipera,

²⁴ine naneso nditi ndipambane namwe mu kendero kinu ndipo ndamkumulangani kwakuruska kankhonde na kaŵiri chifukwa cha zakwananga zinu.

²⁵Ndamkumutumirani nkhondo kuti yimulangani chifukwa chakuswa phangano lane. Usange mukuwungana mu misumba yinu, nditi ndimutumirani vilengo vya nthenda zambula kuchizgika mukati mwinu na kumuperekani mu mawoko gha ŵarwani ŵinu.

²⁶Nditi ndichefyenge chakurya chinu cha zuŵa na zuŵa mwakuti ŵanakazi khumi ŵamkuphika pa chipembo chimoza na kumugaŵirani pachokopachoko. Ntheura muti muryenge kweni kuti muti mukhutenge chara.

²⁷“Nanga ndi ntheura, usange murekenge kundipulikira, kweni mupambanenge nane mu mendero ghinu,

²⁸nane, mu ukari wane, nditi ndipambane namwe na kumulangani kankhonde na kaŵiri kwakuruska chomene chifukwa cha zakwananga zinu.

²⁹Njara yamkuŵa yikuru mu charu chinu mwakuti mwamkurya ŵana ŵinu ŵanarume na ŵanakazi.

³⁰Ndizamkupankhura malo ghinu gha pachanya ghakusoperako na kubwangandulira pasi majochero gha vyakununkhira. Ndamkutaya vitanda vya mathupi ghinu pachanya pa vitanda vya ŵangoza ŵinu. Ndipo ndizamkuseruskika na imwe.

³¹Ndamkupasura misumba yinu na kuzgora malo ghinu ghakupatulika kuŵa mahami, ndipo ndamkondwera na sungu liweme la sembe zinu chara.

³²Ndamkunanga charu mwakuti ŵarwani ŵinu awo ŵizamkukhara mu charu icho ŵamkukhara mu charu ŵamkuzizwa na kunangika kwakhe.

³³Ndamkwiza na nkhondo pa imwe na kumumbininiskirani mukati mu mafuko ghanyakhe. Charu chinu chamkuzgoka mahami ndipo misumba yinu yamkupankhuka.

³⁴Ntheura charu chamkukoroka na virimika vya kupumula ivyo imwe kuti mukachipanga chara, chiti chikharenge chekha na kupumula apo imwe muchali mu charu cha uzga cha ŵarwani ŵinu.

³⁵Pa nyengo yose apo charu chiti chiŵenge chambula ŵanthu, chiti chipumulenge pakuti chikapumulanga chara apo imwe mukakharanga mwenemumo.

³⁶“Kweni na awo ŵakharako ŵamoyo mu vyaru vya ŵarwani ŵawo ŵati ŵaŵenge na wofi ukuru mwakuti nanga ndi kamphomezi ka kuwa kwa hamba lakuwuruka nako kamkuwofya. Iwo ŵamkuchimbira nga ndi para wakuchimbira nkhondo, na kuwa pasi apo palije na yumoza wakuŵachimbizga.

³⁷Ŵati ŵawiranenge nga ndi para wakuchimbira nkhondo apo palije na yumoza wamkuŵa chimbizga. Ndipo ŵamkuŵavye nkhongono za kwimikana na ŵarwani ŵawo.

³⁸Muti mumarenge petu mukati mu ŵamitundu yinyakhe na kusungika mu charu cha ŵarwani ŵinu.

³⁹Imwe mwakharako ŵamoyo mu vyaru vya ŵarwani ŵinu, muti muvundirenge mwenemumo chifukwa cha zakwananga zinu na cha zakwananga za ŵawiskewokuru.

⁴⁰“Kweni usange ŵati ŵazomerenge zakwananga zawo na za ŵawiskewo, chifukwa cha uryarya wawo uwo ŵakandichitira na mendero ghawo ghakupambana nane,

⁴¹ivyo vikachitiska kuti ine nane ndipambane nawo mu mendero ghawo na kuŵatuma mu charu cha ŵarwani nawo. Ntheura usange ŵareka kuŵa na mitima yinonono ndipo ŵajiyuyura na kuzomera kulangika chifukwa cha zakwananga zawo,

⁴²penepapo ndizamkukumbuka phangano lane ilo nkhachita na Yakhobe Yisake, na Abrahamu ndipo na phangano lane la charu.

⁴³Kweni ŵanthu ŵamkufumamo danga mu charu, mwakuti chikondwerere virimika vyakupumulira chifukwa chamkuŵa chekha chambula iwo. Ŵanthu ŵamkulangika chifukwa cha zakwananga zawo, pakuti ŵakapepura marango ghane na kuseruskika na vilayizgo vyane.

⁴⁴Kweni nanga vingaŵa ntheura kuti ŵanthu ŵali ku charu cha ŵarwani ŵawo, ine kuti nditi ndiŵatayenge chara, nanga nkhuŵatinkha. Kuti ndiŵamare petu na kuswa phangano lane na iwo chara. Pakuti ine ndine FUMU, Chiuta wawo.

⁴⁵Kweni pakuŵa na uchizi na iwo, nditi ndikumbuke phangano lane ilo nkhachita na ŵasekuru ŵawo awo nkhaŵafumya mu charu cha Eguputo uku ŵamitundu yinyakhe ŵakuwona mwakuti ndiŵe Chiuta wawo. Ine ndine FUMU.

⁴⁶“Agha ndigho marango na vilayizgo gheneagho FUMU yikachita pakati pa iyo na ŵaIsraele pa Phiri la Sinayi kwizira mwa Mozesi.”