Read new_tumbuka_bible Levitiko 27 Bible Online

Levitiko 27 - new_tumbuka_bible bible

Levitiko 27

¹FUMU yikati kwa Mozesi,

²“Yowoya ku ŵaIsraele uti, ‘Para munthu warapa kupereka munthu munyakhe kwa FUMU, ndipo pamanyuma wakukhumba kumuwombola,

³wakwenera kupereka ndarama zakumuwombolera izi: Mwanarume wa virimika pakati pa 20 na 60, wamuwombole na ndarama za siliva 50 kwakuyana na ndarama izo zili kupimika mu Chihema Chakupatulika.

⁴Usange ndi mwanakazi, wamuwombole na ndarama za siliva 30.

⁵Usange mwanarume ndi wa virimika pakati pa vinkhonde na 20, wamuwombole na ndarama za siliva 20. Usange ndi mwanakazi, wamuwombole na ndarama za siliva khumi.

⁶Usange ndi mwana mwanarume pakati pa mwezi umoza na virimika vinkhonde wamuwombole na ndarama za siliva zakukwana magiramu 55. Ndipo usange ndi mwanakazi wamuwombole na ndarama za siliva zakukwana magiramu 35.

⁷Usange mwanarume ngwa virimika 60 na vinyakhe vya pachanya wamuwombole na ndarama za siliva 15 ndipo usange ndi mwanakazi wamuwombole na ndarama khumi za siliva.’

⁸“Usange munthu uyo wakachita phangano ndi mukavu chomene kuti wangakwaniska kupereka mtengo uwo wapimika chara, iyo wize na munthu uyo wati wawombolekenge kwa musofi mweneuyo wati wapime mtengo uwo munthu uyo wangalipira.

⁹“Usange munthu wakapangana kupereka chiŵeto mwa ivyo ndi vyakuzomerezgeka kuŵa sembe kwa FUMU, chakuŵeta icho nchakupatulika.

¹⁰Wareke kuharizgirapo chakuŵeta panji kusinthiskana na chinyakhe. Chiweme na chiheni, panji chiheni na chiweme. Usange wasinthiska ipo ziŵiri wuwo viŵe vyakupatulika.

¹¹Usange munthu wakapangana kupereka chiŵeto icho nchambula kuphotoka mwa ivyo kuti vingazomerezgeka chara kuŵa sembe kwa FUMU, penepapo munthu yura wize na chiŵeto chira kwa musofi.

¹²Ndipo musofi ndiyo wapime mtengo wakuyana na uweme wakhe panji uheni wakhe. Mtengo uwo musofi wati wapime wamkuŵa weneuwo.

¹³Kweni para wakukhumba kuchiwombola chiŵeto chira, wasazgirepo pa mtengo ura chigaŵa chimoza. Mu vigaŵa vinkhonde vya mtengo wakhe.

¹⁴“Usange munthu wakupatulika nyumba yakhe kuti yiŵe yakupatulika kwa FUMU, musofi wakayiwone usange njiweme panji njiheni, ndipo mtengo uwo wati wapime wamkuŵa weneuwo.

¹⁵Ndipo usange munthu uyo wakupereka nyumba yira, wakukhumba kuyiwombola, wasazgirepo pa mtengo ura chigaŵa chimoza mu vigaŵa vinkhonde vya mtengo wakhe ndipo nyumba yira yamkuŵa yakhe.

¹⁶“Usange munthu wakupereka kwa FUMU chigaŵa cha munda uwo nchiharo chakhe, mtengo wakhe uyane na homeri wa mbuto ya nyauti ndipo mtengo wakhe uŵe ndarama za siliva zakukwana 50.

¹⁷Usange wakupereka kwa FUMU munda wakhe, para chamara waka chirimika cha kukondwera virimika 50, mtengo uwo wapima wamkuŵa weneuwo.

¹⁸Kweni usange wakupereka pamanyuma pa chirimika cha kukondwera, penepapo musofi wamkupenda mtengo wa ndarama za munda ura kwakuyana na virimika ivyo yakharako kufikira ku chirimika chakukondwera, wamkuwuskako mtengo wakhe.

¹⁹Usange munthu uyo wakupereka munda ura kwa FUMU, wakukhumba kuwombola wasazgirepo chigaŵa chimoza mu vigaŵa vinkhonde vya mtengo wakhe, ndipo munda ura wamkuŵa wakhe.

²⁰Kweni usange wakukhumba chara kuwombola munda ura panji wawuguliska ku munthu munyakhe, munda ura ungawomboleka chara.

²¹Usange munda ura undawomboleke mpaka mu chirimika chakukondwera virimika 50, uti uŵenge wakupatulika, nga ndi munda uwo wapereka kwa FUMU. Ndipo uti uŵenge chiharo cha ŵasofi.

²²“Usange wakupereka kwa FUMU munda uwo wakagula weneuwo kuti ngwa chigaŵa cha chiharo chakhe chara,

²³musofi wapime mtengo wa munda ura kwakuyana na virimika ivyo vyakharako kufikira pa chirimika cha kukondwerera virimika 50, ndipo pa zuŵa lenelira, munthu yura wamkupereka ndarama izo zapimika kuŵa chinthu chakupatulika kwa FUMU.

²⁴Kufikira pa chikondwerero virimika 50, munda ura wamkuwerera ku mwenecho wa pakudanga uyo wakawuguliska mweneuyo munda ura nchiharo chakhe.

²⁵Mtengo uliwose uti upimike kwakuyana na ndarama zakupimikira ku Chihema Chakupatulika.

²⁶“Paŵavye munthu na yumoza wakupereka mwana wakudanga kubabika wa chakuŵeta kwa FUMU, pakuti mweneuyo ndi wa FUMU kale, manyi waŵe wa ng'ombe panji wa mberere.

²⁷Usange chiŵeto nchambula kuphotoka wachiwombole pa mtengo uwo musofi wapima na kusazgirapo chigaŵa chimoza mu vigaŵa vinkhonde vya mtengo wakhe. Usange chindawomboleke, chiguliskike kunyakhe pa mtengo weneuwo wapima musofi.

²⁸“Kweni chakupereka chilichose icho munthu wapereka kwa FUMU kufuma mu ivyo wali navyo, manyi ndi munthu, chiŵeto panji munda uwo nchiharo chakhe chireke kuguliskika panji kuwombola. Chose icho chaperekeka nchakupatulika nkhanira kwa FUMU.

²⁹Munthu waliyose uyo waperekeka kwa FUMU chifukwa cha mlimo wakupatulika wakwenera kuwomboleka chara, kweni kukomeka.

³⁰“Chigaŵa chimoza cha vigaŵa khumi, cha mbuto ya mu munda panji vipambi vya makuni ndi vya FUMU. Cha ntheura nchakupatulika kwa FUMU.

³¹Usange munthu waliyose wakukhumba kuwombola chigaŵa chimoza cha vigaŵa khumi, wasazgirepo chigaŵa chimoza cha vigaŵa vinkhonde vya mtengo wakhe.

³²Chimoza cha viŵeto khumi chilichose icho muliska wati wachikhwaskenge na ndodo yakhe pakuchipenda manyi ndi ng'ombe panji mberere panji mbuzi chiti chiŵe chakupatulika kwa FUMU.

³³Mwenecho wareke kuŵika viŵeto vyakhe mwakuti chiŵeto chiweme panji chiheni chisankhike panji nesi kusinthiskana na chinyakhe. Usange wangachita ntheura, vyose viŵiri wuwo ivyo vyasinthiskana viti viŵenge vyakupatulika. Vya ntheura kuti vingawomboleka chara.

³⁴“Agha ndi marango gheneagho FUMU yikapereka kwa Mozesi pa Phiri la Sinayi kuti waŵaphalire ŵaIsraele.”