Read new_tumbuka_bible Levitiko 3 Bible Online

Levitiko 3 - new_tumbuka_bible bible

Levitiko 3

¹“Usange munthu wakupereka sembe ya wenenawene kwa FUMU, sembe yakhe yiŵe ng'ombe yanarume panji yanakazi yambula kalema.

²Iyo wati waŵike mawoko ghakhe pa mutu wa ng'ombe iyo na kuyikomera pa muryango wa Chihema Chakukumaniranamo, ndipo ŵasofi ŵa mbumba ya Aroni, ŵati ŵamijire ndopa zakhe pa jochero zingirizge.

³Ndipo pa sembe ya wenenawene yira, sembe yakocha kwa FUMU, watorepo mafuta ghose agho ghabenekerera matumbo na mafuta ghose agho ghali pa vya mukati.

⁴Watoreso ziso ziŵiri pamoza na mafuta ghakhe agho ghali mu chiuno, na mafuta ghakubenekerera chiŵindi agho wati wawuskengeko pamoza na ziso.

⁵Ndipo ŵana ŵa musofi Aroni ŵavyochere vyose ivi pa jochero pachanya pa sembe yakocha iyo yili pa nkhuni za pa moto kuŵa sembe ya sungu liweme lakukondweska FUMU.

⁶“Usange munthu wakupereka mberere na mbuzi yanarume panji yanakazi kuŵa sembe ya wenenawene kwa FUMU, yikwenera kuŵa yambula kalema.

⁷Usange wakupereka mwana-mberere kuŵa sembe yakhe, wize nayo panthazi pa FUMU.

⁸Ndipo waŵike woko lakhe pa mutu wa mwana-mberere yura, na kukamukomera pa muryango wa Chihema Chakukumaniranamo ndipo ŵana ŵa musofi Aroni ŵamijire ndopa zakhe pa jochero zingirizge.

⁹Ndipo pa sembe ya wenenawene yira, sembe yakocha kwa FUMU, watorepo mafuta ghakhe, mafuta gha muchira wakhe wose pakuwudumulira musi pafupi na chiwangwa cha msana, mafuta ghose ghakubenekerera matumbo, na mafuta ghose agho ghali mu matumbo,

¹⁰ziso ziŵiri pamoza na mafuta ghakhe agho ghali mu chiuno, na mafuta ghakubenekerera chiŵindi agho wati wawuskengeko pamoza na ziso.

¹¹Sono musofi wawoche vyose ivi pa jochero kuti viŵe sembe yakocha kwa FUMU.

¹²“Usange munthu wakupereka mbuzi kuŵa sembe yakhe, wize nayo panthazi pa FUMU.

¹³Ndipo waŵike woko lakhe pa mutu wa mbuzi yira na kuyikomera panthazi pa Chihema Chakukumaniranamo. Ŵana ŵa Aroni ŵamijire ndopa zakhe pa jochero zingirizge.

¹⁴Ndipo pa sembe ya wenenawene yira, sembe yakocha kwa FUMU, watorepo mafuta ghose agho ghabenekerera matumbo, na mafuta ghose gha mu matumbo.

¹⁵Watoreso ziso ziŵiri pamoza na mafuta ghakhe agho ghali mu chiuno na mafuta agho ghabenekerera chiŵindi agho wati wawuskengeko pamoza na ziso.

¹⁶Ndipo Musofi wavyoche vyose ivi pa jochero kuti viŵe sembe yakocha ya sungu liweme lakukondweska. Mafuta ghose nga FUMU.

¹⁷Ili liŵe dango la muyirayira mu miwiro yinu yose. Paŵavye munthu wakurya mafuta panji ndopa ku malo ghose agho mwamkukharamo.”