Read new_tumbuka_bible Levitiko 4 Bible Online

Levitiko 4 - new_tumbuka_bible bible

Levitiko 4

¹FUMU yikati kwa Mozesi,

²“Yowoya ku ŵaIsraele uti, ‘Para munthu wananga kwambula kumanya ndipo wachita kalikose kakukanizgika mu marango gha FUMU, wachite ichi:

³Usange musofi wakuphakazgika ndiyo wananga ndipo wakuŵatorera ŵanthu kwananga uku, wize na nkhambako yiwukirano yambula kalema kwa FUMU kuti yiŵe sembe yakuphepiskira kwananga uko wananga.

⁴Wize na nkhambako yira pa muryango wa Chihema Chakukumaniranamo. Ndipo waŵike woko lakhe pa mutu pa nkhambako yira na kuyikoma panthazi pa FUMU.

⁵Penepapo musofi wakuphakazgika yura watorepo ndopa zinyakhe za nkhambako zira na kwiza nazo ku Chihema Chakukumaniranamo.

⁶Musofi wabizge munwe wakhe mu ndopa zira na kuzimija kankhonde na kaŵiri panthazi pa FUMU ndiposo na panthazi pa chisalu chakuchinga Malo Ghakupatulika.

⁷Ndipo musofi watorepo ndopa zinyakhe na kuziphaka ku masengwe gha jochero la vyakununkhira vya sungu liweme ilo liri panthazi pa FUMU mu Chihema Chakukumaniranamo. Ndopa zinyakhe za nkhambako wazithire pasi musi mwa jochero la sembe yakocha ilo liri pa chipata cha Chihema Chakukumaniranamo.

⁸Mafuta ghose gha nkhambako ya sembe ya zakwananga agho ghakubenekerera matumbo, na agho ghali mu matumbo wawuskeko.

⁹Wawuskekoso ziso ziŵiri pamoza na mafuta ghakhe agho ghali mu chiuno, na mafuta ghakubenekerera chiŵindi agho wati wawuskengeko pamoza na ziso.

¹⁰Ivi waviwuskemo nga ndi umo wakuwuskiramo mu ng'ombe ya sembe ya wenenawene, ndipo musofi wavyoche pa jochero la sembe yakocha.

¹¹Kweni chikumba cha nkhambako, nyama yakhe yose, mutu wakhe, malundi ghakhe, vya mukati vyakhe vyose pamoza matumbo ghakhe,

¹²nkhambako yose wayiyeghere kuwaro kwa msasa pa malo ghanyakhe ghali ghose ghakupatulika uko ŵakuthirako vyoto, ndipo pa malo gheneagho ndipo wochere pa moto wa nkhuni.’ ”

¹³“Usange mpingo wose wa Israele wananga kwambula kumanya pakuchita chimoza cha icho nchakukanizgika mu marango gha FUMU, nangauli mpingo ukumanya chara icho wananga, uli na mrandu.

¹⁴Para mpingo wamanya kwananga uko ŵachita, mpingo wize na nkhambako yiwukirano yambula kalema kuŵa sembe yakuphepiskira kwananga ndipo wize nayo pa muryango wa Chihema Chakukumaniranamo.

¹⁵Ndipo ŵararaŵarara ŵa mpingo ŵaŵikepo mawoko ghawo pa mutu wa nkhambako yira panthazi pa FUMU, ndipo ŵayikomere penepara.

¹⁶Penepapo musofi wakuphakazgika yura watorepo ndopa zinyakhe za nkhambako yira na kwiza nazo ku Chihema Chakukumaniranamo.

¹⁷Musofi wabizge munwe wakhe mu ndopa zira na kuzimija kankhonde na kaŵiri panthazi pa FUMU ndiposo na panthazi pa chisalu chakuchinga.

¹⁸Ndipo watorepo ndopa zinyakhe na kuziphaka ku masengwe gha jochero la vyakununkhira vya sungu liweme ilo liri panthazi pa FUMU mu Chihema Chakukumaniranamo. Ndopa zinyakhe za nkhambako wazithire pasi musi mwa jochero la sembe yakocha ilo liri pa muryango wa Chihema Chakukumaniranamo.

¹⁹Mafuta ghose gha nkhambako yira waghawuskeko ndipo waghawochere pa jochero.

²⁰Umu ndimo wati wachitire na nkhambako iyi nga ndi umo wakachitira na nkhambako ya sembe ya zakwananga. Musofi wati waŵaphepiskire ŵanthu ndipo ŵati ŵagowokerekenge.

²¹Sono wayitore nyama ya nkhambako yira kuwaro kwa msasa na kocha nga ndi umo wakawochera nkhambako ya pakudanga yira. Iyi ndi sembe yakuphepiskira kwananga kwa mpingo wose.”

²²“Para uyo wakuwusa wananga kwambula kumanya pakuchita icho FUMU, Chiuta wakhe wali kukanizga mu marango ghakhe, wali na mrandu.

²³Usange waphalirika kwananga uko wachita, wize na mbuzi yanarume yambula kalema kuŵa sembe yakuphepiskira kwananga kwakhe.

²⁴Ndipo waŵike woko lakhe pa mutu wa mbuzi yira na kuyikomera pa malo agho sembe yakocha yikukomekera panthazi pa FUMU. Iyi ndi sembe yakuphepiskira kwananga.

²⁵Musofi watorepo na munwe wakhe ndopa zinyakhe za mbuzi yira ya sembe yakwananga ndipo waziphake pa masengwe gha pa jochero la sembe yakocha. Ndopa zinyakhe izo zakharako wazithire pasi musi mwa jochero la sembe yakocha.

²⁶Ndipo mafuta ghakhe ghose waghawochere pa jochero nga ndi umo wakochera mafuta gha sembe ya wenenawene. Ntheura ndimo musofi wati waperekere sembe yakuphepiskira kwananga kwa ŵakuwusa ndipo wati wagowokereke.”

²⁷“Usange yumoza wa ŵanthu bweka wananga kwambula kumanya pakuchita icho FUMU yikukanizga mu marango ghakhe, wali na mrandu.

²⁸Para waphalirika kwananga uko wachita, wize na mbuzi yanakazi yambula kalema kuŵa sembe yakwananga kwakhe.

²⁹Waŵike woko lakhe pa mutu wa mbuzi ya sembe yakwananga yira na kuyikomera pa malo gha sembe yakocha.

³⁰Musofi watorepo ndopa zinyakhe na munwe wakhe na kuziphaka pa masengwe gha jochero la sembe yakocha ndipo ndopa zinyakhe izo zakharako wazithire pasi musi mwa jochero.

³¹Wawuskeko mafuta ghose nga ndi umo wakawuskirako mafuta ya sembe ya wenenawene yira ndipo musofi woche pa jochero kuŵa sembe sungu liweme lakukondweska FUMU. Ntheura musofi wati wamuphepiskire munthu uyo ndipo zakwananga zakhe ziti zigowokereke.”

³²“Usange wakwiza na mwana-mberere kuŵa sembe yakhe yakwananga, wize nayo wambula kalema.

³³Waŵike woko lakhe pa mutu wa mwana-mberere yura ndipo wakamukomere pa malo apo wakukomera sembe yakocha kuŵa sembe yakuphepiskira kwananga.

³⁴Musofi watorepo na munwe wakhe ndopa zinyakhe za sembe ya kwananga na kuziphaka pa masengwe gha jochero la sembe yakocha ndipo ndopa zinyakhe izo zakharako wazithire pasi musi mwa jochero.

³⁵Mafuta ghakhe ghose waghawuskengeko nga ndi umo wakawuskirangako mafuta gha mwana-mberere wa sembe ya wenenawene yira. Ndipo musofi wochere pa jochero pachanya pa sembe yakocha kwa FUMU. Umu ndimo musofi wati waphepiskire kwananga kwa munthu uyo wananga ndipo wati wagowokereke.”