Read new_tumbuka_bible Levitiko 5 Bible Online

Levitiko 5 - new_tumbuka_bible bible

Levitiko 5

¹“Usange munthu wachemeka ku mphara ya mirandu, na kumurapizga kuti waŵe kaboni pa icho wachiwona panji wakuchimanya, kweni wakureka kuyowoya, wali na mrandu.”

²“Usange munthu kwambula kumanya wakhwaska chilichose chambula kuphotoka manyi nchitanda cha nyama yambula kuphotoka, panji cha chakuŵeta chakukazuzgika chakuskugha pa maji, panji chakukhwaŵa chilichose chakukazuzgika, iyo nayo wajikazuzga ndipo wali na mrandu.”

³“Panji usange munthu kwambula kumanya wakhwaska chinthu cha ukazuzi icho chikufuma mu thupi la munthu, nanga ungaŵa ukazuzi wa mtundu uli uwo ukumukazuzga munthu ndipo ulije kumanyikwa kwa iyo, kweni para wamanyikwa na iyo, wali na mrandu.”

⁴“Panji usange munthu wakurapa mwaluŵiro kuti wachite uheni panji uweme, kurapa kulikose kwa mwaluŵiro uko munthu wangachita kwambula kumanya, sono para wamanya wali na mrandu pa chilichose cha ivi.”

⁵“Para munthu wali na mrandu wa chilichose cha ivi, wazomere kwananga uko wachita.

⁶Ndipo wize na sembe ya kwananga kwakhe kwa FUMU chifukwa cha kwananga uko wachita. Wize na mwana-mberere mwanakazi panji mbuzi yanakazi kuŵa sembe ya kwananga, ndipo musofi wamuphepiskire kwananga kwakhe.”

⁷“Kweni usange walije mwana-mberere panji mbuzi, wize na nkhunda ziŵiri panji viwunda viŵiri kuŵa sembe yakuphepiskira majuvyo ghakhe kwa FUMU. Chimoza cha ivi chiŵe sembe ya kwananga ndipo chinyakhe chiŵe sembe yakocha.

⁸Wize nazo kwa musofi uyo pakudanga wati wapereke yimoza kuŵa sembe ya kwananga pakunyongorora mutu wakhe, kweni kwambula kuwuskako mutu.

⁹Ndipo ndopa zinyakhe za sembe yakwananga wamijire mu mphepete mwa jochero. Ndopa zinyakhe izo zakharako wazithire pasi musi mwa jochero. Iyi ndi sembe yakuphepiskira kwananga.

¹⁰Ndipo musofi yura wati wapereke ya chiŵiri yira kuŵa sembe yakocha kwakuyana na languro. Musofi wati wamuphepiskire munthu yura pa zakwananga izo wali kuchita ndipo wati wagowokerekenge.”

¹¹“Kweni usange walije nkhunda ziŵiri panji viwunda viŵiri, wize na ufu wakunyiririka wakukwana chigaŵa cha khumi cha debe kuŵa sembe ya zakwananga zakhe. Wareke kuthirako mafuta panji vyakununkhira pakuti iyi ndi sembe yakuphepiskira kwananga.

¹²Wize na ufu ura kwa musofi ndipo musofi watorepo wakuzura chikufi kuŵa phande la chikumbusko na kuwuwocha ufu ura pa jochero nga ndi sembe yakocha kwa FUMU. Iyi ndi sembe yakuphepiskira kwananga.

¹³Ntheura ndimo musofi wati waphepiskire kwananga kulikose kwa munthu uko wali kuchita ndipo wati wagowokerekenge. Ufu uwo wakharako uti uŵenge wa musofi kwakuyana na umo sembe ya ufu yikuchitikira.”

¹⁴FUMU yikati kwa Mozesi,

¹⁵“Usange munthu wali na mrandu wakupusika ndipo wakwanangira mu kuwura kumanya pakureka kurondezga marango gha vinthu vyakupatulikira FUMU, iyo wize nayo kwa FUMU mberere yanarume yambula kalema, yakufumira mu mskambo wakhe, kuŵa seme ya mphepiska ya zakwananga, ya mtengo wakupimika na iwe mu ndarama za siliva, kwakuyana na ndarama izo zikuperekeka mu malo ghakupatulika. Ndi sembe ya zakwananga.

¹⁶Ndiposo walipirepo chinthu icho wananga mu vinthu vyakupatulika, ndipo wasazgirepo chigaŵa chimoza cha vinkhonde na kuchipereka ku musofi. Ndipo musofi wamuphepiskire na mberere yanarume ya sembe ya zakwananga, ndipo wati wagowokereke.”

¹⁷“Usange munthu wakuchita kwananga, pa chimoza cha vinthu vyeneivyo FUMU yili kulayizga kuti vireke kuchitika, nanga iyo wangaŵavye na kumanya, ndipouli wali na mrandu wati wavimyanthe pa uheni wakhe.

¹⁸Watore mberere yanarume yambula kalema kufuma mu mskambo wakhe ndipo wize nayo ku musofi. Yiŵe ya mtengo wakupimika na iwe pa sembe ya zakwananga ndipo musofi wamuphepiskire masovyo agho wakachitira mu kuwura kumanya, ndipo wati wagowokereke.

¹⁹Iyi ndi sembe yakuphepiskira majuvyo, chifukwa munthu uyo wali na mrandu panthazi pa FUMU.”