Read new_tumbuka_bible Levitiko 6 Bible Online

Levitiko 6 - new_tumbuka_bible bible

Levitiko 6

¹FUMU yikati kwa Mozesi,

²“Usange munthu yunji wananga ndipo waŵa wambula kugomezgeka kwa FUMU pakupusika muzengezgani wakhe pa icho wakamusungiska, panji chikhole, panji kumwibira, panji kumupusikira,

³panji wasanga icho chikazgeŵa ndipo wateterapo utesi, ndipo wakurapa mwakupusika mu chimoza cha vinthu ivyo ŵanthu ŵakuchita na kwanangirapo.

⁴Para wananga pa ivi wali na mrandu ndipo walipirepo pa icho wakamwibira muzengezgani wakhe, panji icho wakatora mwakupusika, icho wakamusungiska ndipo pa icho chikazgeŵa ndipo wakachisanga,

⁵panji chinthu chinyakhe icho wakachitirapo chirapo mwakupusika. Wawezgerepo vyose ivi na kusazgirapo chigaŵa chimoza cha vinkhonde na kupereka ku mwenecho pa zuŵa ilo wasangikira kuti wali na mrandu.

⁶Ndipo wize na mberere na mbuzi yanarume yambula kalema kufuma ku mskambo wakhe kwa musofi kuŵa sembe kwa FUMU yakuphepiskira majuvyo ghakhe. Mtengo wa mberere iyo upimike kwakuyana waka na mtengo wa sembe yakuphepiskira majuvyo.

⁷Ntheura ndimo musofi wati waphepiskire munthu yura panthazi pa FUMU ndipo wati wagowokerekenge pa chinthu chose icho wakachita chakumutorera majuvyo.”

⁸FUMU yikati kwa Mozesi,

⁹“Umulangure Aroni na ŵana ŵakhe kuti, ‘Ili ndi dango la sembe yakocha pa moto. Sembe yakocha yiti yiŵenge pa moto usiku wose kufikira na mulenje ndipo moto wa pa jochero uŵe wakugolera waka, kwambula kuzimwa.

¹⁰Musofi wavware munjilira wakhe wa bafuta na kabunthu wakhe wa bafuta, ndipo wati wawuskepo pa jochero vyoto vya moto wa sembe yakocha na kuviŵika pa mphepete pa jochero.

¹¹Penepapo wavure munjilira ura, na kuvwara vinyakhe ndipo wayeghera vyoto vira ku malo ghakupatulika kuwaro kwa msasa.

¹²Ndipo moto wa pa jochero ugolere waka, kwambula kuzimwa. Musofi wasonkhengepo nkhuni mulenje uliwose na kuŵikapo sembe yakocha penepapo ndiposo wocherengepo mafuta ya wenenawene.

¹³Moto ukwenera kurutilira kugolera pa jochero. Ungazimwanga chara.’ ”

¹⁴Dango la sembe ya ufu ndi ili: Musofi wa mbumba ya Aroni ndiyo wati wize na sembe ya ufu kwa FUMU panthazi pa jochero.

¹⁵Sono yumoza wa ŵasofi watorepo ufu wakunyiririka wa sembe ya ufu yira pamoza na mafuta ghakhe na vyakununkhira, ivyo vili pachanya pa ufu vyakukwana chikufi na kocha pa jochero kuŵa phande la chikumbusko pa jochero, kupereka sungu liweme lakukondweska FUMU.

¹⁶Ndipo Aroni na ŵana ŵakhe ŵarye ufu uwo wakharako kweni warye wambula chirungo mu malo ghakupatulika. Ŵaryerenge pa baraza la Chihema Chakukumaniranamo.

¹⁷Pakuphika ufu uwu, ŵareke kusazgako chirungo. Ndaŵapa ŵasofi kuŵa phande lawo la sembe yakocha. Sembe iyi njakupatulika nkhanira nga ndi umo yiliri sembe ya kwananga na sembe yakuphepiskira majuvyo.

¹⁸Mwana mwanarume yose wa mu mbumba ya Aroni waryengeko vya sembe yakocha iyi kwa FUMU, nga ndi umo kuli kulangulukira kwa muyirayira mu miwiro yinu yose. Yose uyo wakuvikhwaska, wati waŵenge wakupatulika.

¹⁹FUMU yikati kwa Mozesi,

²⁰“Sembe iyo ŵasofi ŵa mbumba ya Aroni ŵati ŵaperekenge kwa FUMU mu zuŵa ilo ŵaphakazgikirenge ndi iyi: ufu uweme wakukwana chigaŵa cha khumi cha debe kuŵa sembe ya ufu wakunyiririka yakuperekeka muyirayira, hafu wakhe ŵapereke na mulenje ndipo hafu munyakhe ŵapereke ku mise.

²¹Yiti yinozgeke na mafuta pa jonjo ndipo wize nayo yakusazgasazga makora mu tuvingwa twakunozgeka twakuyana waka wa sembe ya ufu, ndipo muyipereke kuŵa sembe ya sungu liweme lakukondweska FUMU.

²²Sono musofi wa mbumba ya Aroni uyo waphakazgika, ndiyo wapereke kwa FUMU. Ili ndi dango ilo limikika kwa muyirayira. Sembe ya ufu yocheke yose.

²³Sembe yose ya ufu iyo musofi wakupereka yochekenge yose. Yikwenera kuryeka chara.”

²⁴FUMU yikati kwa Mozesi,

²⁵“Yowoya kwa Aroni na ŵana ŵakhe kuti, ‘Dango la sembe yakuphepiskira kwananga ndi ili: Sembe yakuphepiskira kwananga yikomeke panthazi pa FUMU pa malo agho sembe yakocha yikukomekera. Iyi ndi sembe yakupatulika nkhanira.

²⁶Musofi uyo wakuŵaperekera ŵanthu sembe iyi ya kwananga, ŵaryengeko nyama iyi. Waryerenge ku malo ghakupatulika, mu baraza la Chihema Chakukumaniranamo.

²⁷Yose uyo wati wakhwaske nyama iyi waŵenge wakupatulika, ndipo usange ndopa zakhe zanthonyera pa laya, laya ilo lichapikire mu malo ghakupatulika.

²⁸Ndipo chiŵiya icho ŵaphikirapo nyama iyi ŵachiswe. Usange nchiŵiya cha mkuŵa muchikwenthe na kuchisuka na maji.

²⁹Mwanarume yose wa fuko la usofi waryeko nyama iyi. Iyi ndi sembe yakupatulika nkhanira.

³⁰Kweni ŵareke kurya nyama ya sembe yakuphepiskira kwananga iyo ndopa zakhe ŵiza nazo mu Chihema Chakukumaniranamo mu Malo Ghakupatulika. Nyama yose yocheke pa moto.’ ”