Read new_tumbuka_bible Levitiko 7 Bible Online

Levitiko 7 - new_tumbuka_bible bible

Levitiko 7

¹Ili ndi dango la Sembe yakuphepiskira majuvyo leneilo ndakupatulika nkhanira.

²Pa malo apo ŵakukomera sembe yakocha ndipo ŵakomerengeso sembe yakuphepiskira majuvyo ndipo ndopa zakhe ŵazimijire pa jochero zingirizge.

³Mafuta ghose wati waghapereke, mafuta gha muchira, mafuta agho ghali kubenekerera matumbo,

⁴ziso ziŵiri pamoza na mafuta ghakhe gha mu chiuno, ndiposo na vyose vyakudemerera ku chiŵindi viwuskikeko pamoza na ziso.

⁵Musofi woche mafuta ghose agha pa jochero kuŵa sembe yakocha kwa FUMU. Iyi ndi sembe yakuphepiskira majuvyo.

⁶Mwanarume yose wa fuko la usofi wangaryako vya sembe, kweni waryere mu malo ghakupatulika. Iyi ndi sembe yakupatulika nkhanira.

⁷Sembe yakuphekiskira majuvyo yikuyana waka na sembe yakuphepiskira kwananga. Pali dango limoza pera pa sembe izi. Musofi uyo wakupereka sembe iyi, nyama yose njakhe.

⁸Ndipo musofi uyo wakuperekera munthu sembe yakocha, chikumba cha sembe iyo chiŵe chakhe.

⁹Sembe yose ya ufu iyo yakazingika mu uvuni panji kuphikika mu chiŵiya panji pa jonjo, yiti yiŵenge ya musofi uyo wakupereka sembe iyo kwa FUMU.

¹⁰Ndipo sembe yose ya ufu wakusazgikana na mafuta panji ufu waka, yiŵenge ya ŵasofi ŵa mbumba ya Aroni, ŵagaŵane kwakuyana waka.

¹¹Dango la sembe ya wenenawene iyo munthu wangapereka kwa FUMU ndi iyi:

¹²Usange wakupereka sembe yakuwonga, wapereke pamoza na vingwa vipapati vyambula chirungo vyakusazgako mafuta, tuvingwa tupepefu twambula chirungo twakuphakako mafuta, na vingwa vipapati vya ufu wakunyiririka vyakusazgako mafuta.

¹³Pamoza na sembe ya wenenawene yakuwonga, wize na vingwa vipapati vya chirungo.

¹⁴Pa mtundu wa chakupereka chilichose watorepo chingwa chipapati chimoza na kupereka kuŵa sembe kwa FUMU. Chingwa ichi chiŵenge cha musofi uyo wakumija ndopa za sembe ya wenenawene.

¹⁵Nyama ya sembe yakhe ya wenenawene yakuwonga yiryeke pa zuŵa leneilo yikuperekekera. Ŵangarekangako nanga nkhachoko chara kufikira na mulenje.

¹⁶Usange sembe yakhe ya wenenawene nja kufiska chirapo chakhe panji ya wanangwa, yiryeke zuŵa leneilo yikuperekekera, ndipo iyo yakharako yiryeke na machero ghakhe.

¹⁷Kweni nyama yose ya sembe iyo yakharako kufika zuŵa la chitatu, yocheke pa moto.

¹⁸Usange nyama ya sembe ya wenenawene yaryeka pa zuŵa la chitatu, kuti yiti yiporerekenge chara, ndipo kuti yiti yimwandulire kanthu chara munthu uyo wapereka sembe iyo. Sembe iyi nja ukazuzi ndipo uyo waryako nyama iyi, nayo wati waŵe na mrandu.

¹⁹Nyama iyo yakhwaska chinthu cha ukazuzi, yireke kuryeka, kweni yocheke pa moto. Kuŵe nga ndi nyama yinyakhe yose, munthu uyo ngwa kuphotoka, wangarya.

²⁰Kweni usange munthu uyo ngwa kukazuzgika wakurya nyama ya sembe ya wenenawene yakuperekeka kwa FUMU, munthu uyo wati wawuskikeko mukati mu ŵabali ŵakhe.

²¹Usange munthu wakukhwaska chinthu, manyi ndi ukazuzi wa munthu panji ukazuzi wa chinyama, panji ukazuzi wa chilichose, na kurya nyama ya sembe ya wenenawene kwa FUMU, wati wawuskikemo mu ŵanthu ŵakwakhe.

²²FUMU yikati kwa Mozesi,

²³“Yowoya ku ŵaIsraele uti kwa iwo: Munthu wareke kurya mafuta gha ng'ombe panji gha mberere nanga ndi gha mbuzi.

²⁴Mafuta gha nyama iyo yafwa yekha panji gha iyo yakoreka na chikoko, ghangachitira nchito yinyakhe yose, kweni ghareke kuryeka.

²⁵Munthu yose uyo wakurya mafuta gha nyama iyo yiti yiperekeke kuŵa sembe yakocha kwa FUMU, munthu uyo wati wawuskikemo mukati mu ŵabali ŵakhe.

²⁶Ndipo kulikose uko mwamkukhara, paŵavye munthu wakurya ndopa za viyuni panji za nyama yiliyose.

²⁷Munthu waliyose uyo wati waswe dango ili pakurya ndopa za nyama yiliyose, wati wawuskikemo mukati mu ŵabali ŵakhe.”

²⁸FUMU yikati kwa Mozesi,

²⁹“Yowoya ku ŵaIsraele uti kwa iwo: Munthu uyo wakwiza na sembe ya wenenawene kwa FUMU, wize na chigaŵa chimoza cha sembe iyo kwa FUMU.

³⁰Wize nacho iyo mwenecho pa mawoko ghakhe kuŵa sembe yakocha kwa FUMU. Wize na mafuta pamoza na nganga kuti nganga ŵayizungunye kuŵa sembe yakuzungunya kwa FUMU

³¹Musofi wati woche mafuta agha pa jochero. Kweni nganga yiti yiŵenge ya Aroni na ŵana ŵakhe.

³²Musofi mumupe chigha cha maryero nga ndi phande linu kwa iyo kufumira mu sembe yinu ya wenenawene.

³³Yumoza wa ŵana ŵa Aroni uyo wakupereka ndopa na mafuta gha sembe ya wenenawene, ndiyo watore chigha cha maryero chira kuŵa phande lakhe.

³⁴Ntheura nganga yakupereka mwakuzungunya mawoko na chigha cha maryero ndavipatula kuŵa phande la musofi Aroni na ŵana ŵakhe kufuma ku sembe ya ŵaIsraele ya wenenawene kwa FUMU. Iyi ndi phande iyo ŵaIsraele ŵati ŵaperekenge ku ŵasofi muyirayira.

³⁵Iyi ndi phande la Aroni na ŵana ŵakhe kufuma ku sembe yakocha kwa FUMU, leneilo likapatulikira iwo pa zuŵa lakuphakazgikira kwawo kuŵa ŵasofi ŵakuteŵetera FUMU.”

³⁶FUMU yikalangula kuti ŵaIsraele ŵaperekenge phande ili ku ŵasofi pa zuŵa ilo wakaphakazgikira. Ili ndi phande ilo ŵaIsraele ŵati ŵaperekenge kwa muyirayira mu miwiro yawo yose.

³⁷Agha ndi marango gha sembe yakocha, sembe ya ufu, sembe yakuphepiskira kwananga, sembe yakuphepiskira majuvyo, sembe ya kuphakazgira na sembe ya wenenawene.

³⁸Ili ndi dango ilo FUMU yikalangula Mozesi pa Phiri la Sinayi pa zuŵa ilo wakalangula kuti ŵaIsraele, ŵize na sembe zawo kwa FUMU mu mapopa gha Sinayi.