Read new_tumbuka_bible Levitiko 8 Bible Online

Levitiko 8 - new_tumbuka_bible bible

Levitiko 8

¹FUMU yikati kwa Mozesi,

²“Tora Aroni na ŵana ŵakhe, vyakuvwara vyawo vya usofi, mafuta ghakuphakazgira, nkhambako yakuphepiskira kwananga, mberere zanarume ziŵiri na chidunga cha vingwa vyambula chirungo

³Ndipo uwunganye mpingo wose wa Israele pa muryango wa Chihema Chakukumaniranamo.”

⁴Mozesi wakachita nga ndi umo FUMU yikamulangulira. Mpingo wose ukawunganya pa muryango wa Chihema Chakukumaniranamo.

⁵Iyo wakati ku mpingo wose, “Ichi ndicho FUMU yalangula kuti chichitike.”

⁶Ntheura wakiza na Aroni na ŵana ŵakhe panthazi pawo ndipo wakaŵageziska na maji.

⁷Ndipo wakamuvwarika Aroni laya na kumukaka na lamba mu chiuno mwakhe. Wakamuvwarikaso munjilira, efodi na chakuvwara cha pa chifuŵa, ndipo wakamukaka na lamba wakusoneka mwa unkhwantha mu chiuno mwakhe.

⁸Wakamuvwarika chakuvwara cha pa chifuŵa na kuŵika mawe gha Urimu na Tumimu pa icho.

⁹Wakamuvwarikaso Aroni chilemba ku mutu wakhe ndipo pachanya pa chilemba ichi, ku maso wakaŵika kambale ka golide, mphumphu yakupatulika, nga ndi umo FUMU yikalangulira Mozesi.

¹⁰Sono Mozesi wakatora mafuta ghakuphakazgira na kuphakazga Chihema Chakukumaniranamo na vyose ivyo vikaŵa mwenemumo na kuvipatula.

¹¹Wakamija mafuta ghanyakhe pa jochero kankhonde na kaŵiri, na kuphakazga jochero, viteŵetero vyakhe vyose, beseni, na chakukharapo chakhe kuti viŵe vyakupatulika.

¹²Mafuta ghanyakhe wakaghapungulira pa mutu wa Aroni na kumuphakazga kuti wamupatule.

¹³Penepapo Mozesi wakiza na ŵana ŵa Aroni panthazi pa mpingo na kuŵavwarika malaya ghawo. Wakaŵakaka malamba mu viwuno vyawo ndiposo tuvisoti mu mitu nga ndi umo FUMU yikalangula Mozesi.

¹⁴Penepapo Mozesi wakiza na nkhambako yakuphepiskira kwananga ndipo Aroni na ŵana ŵakhe ŵakaŵikapo mawoko ghawo pa mutu wa nkhambako yira.

¹⁵Mozesi wakakoma nkhambako yira ndipo wakatorapo ndopa zinyakhe na munwe wakhe na kuphaka masengwe gha jochero zingirizge kuti walitozge. Wakathira ndopa zinyakhe izo zikakharako musi mwa jochero. Mwa ntheura wakalipatula mwakuti wocherepo sembe yakuphepiskira kwananga.

¹⁶Mozesi wakatoraso mafuta ghose ghakubenekerera matumbo, mafuta ghakudemerera ku chiŵindi, ziso ziŵiri pamoza na mafuta ghawo ndipo wakavyocha pa jochero.

¹⁷Kweni nkhambako yira pamoza na chikumba chakhe, nyama yakhe na matumbo ghakhe wakocha pa moto kuwaro kwa msasa nga ndi umo FUMU yikalangulira Mozesi.

¹⁸Sono Mozesi wakapereka mberere yanarume kuŵa sembe yakocha ndipo Aroni na ŵana ŵakhe ŵakaŵikapo mawoko ghawo pa mutu wa mberere yanarume yira.

¹⁹Ndipo Mozesi wakayikoma na kumija ndopa zakhe kuzingirizga jochero.

²⁰Wakati wayidumula mberere yanarume yira mathuŵimathuŵi, wakocha mutu wakhe, mathuŵi ghara na mafuta ghakhe pa jochero.

²¹Wasuka vya mukati na malundi ghakhe na maji ndipo wakocha pa jochero. Ndipo wakochaso mberere yanarume yose yira pa jochero kuti yiŵe sembe yakocha ya sungu liweme lakukondweska FUMU nga ndi umo wakalangulira Mozesi.

²²Pamanyuma, Mozesi wakiza na mberere yanarume yinyakhe yakupatuliskira ŵasofi. Ndipo Aroni na ŵana ŵakhe ŵakaŵika mawoko ghawo pa mutu wa mberere yira.

²³Mozesi wakayikoma mberere yira ndipo wakatorapo ndopa zinyakhe na kuphaka pa munjilira ku songo kwa khutu la maryero la Aroni, na ku munwe kwa woko lakhe la maryero ndiposo na pa chigunwe cha kalundi kamaryero.

²⁴Wakizaso na ŵana ŵa Aroni panthazi pa mpingo ndipo wakaŵaphaka ndopa pa munjilira ku songo kwa makutu ghawo gha maryero, na ku minwe ya mawoko ghawo gha maryero ndiposo na vigunwe vya malundi ghawo gha maryero. Ntheura Mozesi wakamijira ndopa kuzingirira jochero.

²⁵Ndipo wakatora mafuta ghakhe, mafuta gha muchira na mafuta ya ku matumbo, mafuta gha ku chiŵindi, ziso ziŵiri pamoza na mafuta ghawo, ndiposo na chigha cha ku maryero.

²⁶Ndipo kufuma mu chidunga cha vingwa vyambula chirungo icho chikaŵa panthazi pa FUMU, wakatorapo chingwa chipapati chambula chirungo chimoza, chingwa chipapati chimoza chakusazgako mafuta, ndiposo na kachingwa kapepefu kamoza ndipo wakaviŵika pa mafuta na pa chigha cha ku maryero.

²⁷Wakaviŵika vyose ivi mu mawoko gha Aroni na ŵana ŵakhe ndipo wakavizungunya kuŵa sembe yakuzungunya panthazi pa FUMU.

²⁸Sono Mozesi wakavitoraso kufuma mu mawoko ghawo na kocha pa jochero pamoza na sembe yakocha pa moto kuŵa sembe yakupatuliskira, sungu liweme, sembe yakuperekeka kwa FUMU na moto.

²⁹Mozesi wakatoraso nganga na kuyizungunya kuŵa sembe yakuzungunya panthazi pa FUMU. Iyi ndiyo yikaŵa phande la iyo Mozesi kufuma ku mberere yanarume yakupatuliskira nga ndi umo FUMU yikalangulira.

³⁰Mozesi wakatorapo mafuta ghakuphakazgira na ndopa izo zikaŵa pa jochero ndipo wakamijira pa Aroni na pa vyakuvwara vyakhe ndiposo na pa ŵana ŵakhe na pa vyakuvwara vyawo. Ntheura wakamupatula Aroni na vyakuvwara vyakhe ndiposo ŵana ŵakhe na vyakuvwara vyawo.

³¹Mozesi wakati kwa Aroni na ŵana ŵakhe, “Muphike nyama iyi pa muryango wa Chihema Chakukumaniranamo, ndipo muryere penepapo pamoza na chingwa icho chili mu chidunga chakupatuliskira nga ndi umo nkhayowoyerea kuti, ‘Aroni na ŵana ŵakhe ndiwo warye vyeneivi.’

³²Nyama panji vingwa ivyo vyakharako muvyoche pa moto.

³³Ndipo pa mazuŵa ghankhonde na ghaŵiri mureke kufumapo pa muryango wa Chihema Chakukumaniranamo mpaka mumarizge mazuŵa ghakupatuliskira kwinu pakuti kupatuliskira kwinu kuti kumutoreraninge mazuŵa ghankhonde na ghaŵiri.

³⁴Icho chachitika muhanya uno ndi FUMU iyo yili kulangula kuti mwa ntheura ndimo chichitikirenge pakumuphepiskirani imwe.

³⁵Mukwenera kukhara pa muryango wa Chihema Chakukumaniranamo kwa mazuŵa ghankhonde na ghaŵiri muhanya na usiku na kuchita icho FUMU yili kulangula kuti mureke kufwa. Ichi ndicho FUMU yili kundilangula.”

³⁶Aroni na ŵana ŵakhe wakachita vyose ivyo FUMU yikalangula Mozesi.