Read new_tumbuka_bible Levitiko 9 Bible Online

Levitiko 9 - new_tumbuka_bible bible

Levitiko 9

¹Pa zuŵa la chinkhonde na chitatu, Mozesi wakachema Aroni na ŵana ŵakhe ndiposo na ŵararaŵarara ŵa ŵaIsraele.

²Iyo wakati kwa Aroni, “Utore kankhambako kuti kaŵe sembe yakuphepiskira kwananga kwako na mberere yanarume kuŵa sembe yakocha. Vyose viŵiri ivi viŵe vyambula kalema ndipo uvipereke panthazi pa FUMU.

³Ntheura uŵaphalire ŵaIsraele kuti, ‘Torani pepe kuŵa sembe yakuphepiskira kwananga. Mutoreso kankhambako na mwana-mberere, vyose vyambula kalema vya chirimika chimoza kuŵa sembe yakocha.

⁴Mutoreso nkhambako na mberere yanarume kuŵa sembe ya wenenawene ndipo muvipereke panthazi pa FUMU pamoza na sembe ya ufu wakusazgikana na mafuta. Pakuti muhanya uno FUMU yiti yiwoneke kwa imwe.’ ”

⁵Vyose ivyo Mozesi wakalangula ŵaIsraele wakiza navyo panthazi pa Chihema Chakukumaniranamo, ndipo mpingo wose ukasenderera kufupi na kwimilira panthazi pa FUMU.

⁶Ntheura Mozesi wakati, “Ichi ndicho FUMU yili kumulangulirani kuti muchitenge kuti uchindami wa FUMU umuwonekerani.”

⁷Ndipo wakati kwa Aroni, “Senderera kufupi na jochero na kupereka sembe yakuphepiskira kwananga na sembe yako yakocha kuti uphepiske kwananga kwako na kwa ŵanthu. Upereke sembe za ŵanthu na kuŵaphepiskira nga ndi umo FUMU yikalangulira.”

⁸Ntheura Aroni wakasenderera kufupi na jochero ndipo wakakoma kankhambako kara kuŵa sembe yakuphepiskira kwananga kwa iyomwene.

⁹Ndipo Ŵana ŵa Aroni ŵakiza na ndopa kwa iyo ndipo wakabizga munwe wakhe mu ndopa zira na kuziphaka pa masengwe gha jochero. Ndopa izo zikakharako wakazithira musi mwa jochero lira.

¹⁰Mafuta ziso, na mafuta gha ku chiŵindi ivyo vikufuma ku sembe yakuphepiskira kwananga wakocha pa jochero nga ndi umo FUMU yikalangulira Mozesi.

¹¹Nyama yakhe na chikumba chakhe woche pa moto kuwaro kwa msasa.

¹²Aroni wakakomaso sembe yakocha ndipo ŵana ŵakhe ŵakiza na ndopa kwa iyo. Sono iyo wakamijira jochero lira zingirizge.

¹³Ŵakamupa mathuŵi gha nyama ya sembe yira yakocha ndiposo na mutu wakhe ndipo wakocha pa jochero.

¹⁴Ndipo wakasuka matumbo na malundi ghakhe na kocha pa jochero pamoza na sembe yakocha yira.

¹⁵Sono Aroni wakiza na sembe izo ŵanthu ŵakati ŵapereke. Wakatora mbuzi yakuphepiskira kwananga kwa ŵanthu ndipo wakayikoma na kuyipereka kuŵa sembe nga ndi umo wakachitira na sembe yakuphepiskira kwananga kwakhe.

¹⁶Ndipo wakizaso na sembe yakocha na kuyipereka kwakuyana na dango.

¹⁷Wakaperekaso sembe ya ufu iyo wakiza nayo pa chikufi cha woko lakhe na kocha pa jochero pamoza na sembe yakocha ya mulenje.

¹⁸Wakakomaso nkhambako na mberere yanarume yira kuŵa sembe ya wenenawene ya ŵanthu. Ŵana ŵa Aroni ŵakiza na ndopa kwa iyo ndipo iyo wakamijira pa jochero lira zingirizge.

¹⁹Mafuta gha nkhambako na gha mberere yanarume, mafuta gha muchira, mafuta ghakubenekerera matumbo, ziso ziŵiri na mafuta gha ku chiŵindi,

²⁰wakaviŵika pachanya pa zinganga ndipo Aroni wakocha mafuta ghara pa jochero.

²¹Kweni zinganga na chigha cha maryero Aroni wakavizungunya kuŵa sembe yakuzungunya panthazi pa FUMU, nga ndi umo Mozesi wakalangulira.

²²Aroni wakakwezga mawoko ghakhe ku ŵanthu na kuŵatumbika. Ŵakakhira kufuma apo wakaperekanga sembe yakuphepiskira kwananga, sembe yakocha, na sembe ya wenenawene.

²³Penepapo Mozesi na Aroni ŵakanjira mu Chihema Chakukumaniranamo. Ŵakati wafuma, ŵakaŵatumbika ŵanthu ndipo uchindami wa FUMU ukawoneka ku ŵanthu wose.

²⁴Moto ukiza kufuma panthazi pa FUMU na kumyangura sembe yakocha na agho ghakaŵa pa jochero. Ŵanthu ŵakati wawona moto ura, wose ŵakachemerezga, na kuwa kavunama.