Read new_tumbuka_bible Yeremiya 1 Bible Online

Yeremiya 1 - new_tumbuka_bible bible

Yeremiya 1

¹Agha ndi mazgu gha nchimi Yeremiya, mwana wa Hilikiya wa mbumba ya usofi, mu msumba wa Anatoti, mu charu cha Benjamini.

²Mazgu gha FUMU ghakiza kwa Yeremiya mu chirimika cha 13 cha kuwusa kwa Yosiya, mwana wa Amoni karonga wa charu cha Yuda.

³Mazgu gha FUMU ghakizaso kwa iyo mu mazuŵa gha kuwusa kwa Yehoyiyakimu, mwana wa Yosiya, karonga wa charu cha Yuda. Ghakizaso mu mazuŵa gha kuwusa kwa Zedekiya, mwana wa Yosiya, karonga wa charu cha Yuda, mpaka mu mwezi wa chinkhonde wa chirimika cha 11, pa nyengo iyo ŵanthu ŵa mu Yerusalemu ŵakayorekera ku umikori.

⁴Mazgu gha FUMU ghakiza kwa ine ghakati,

⁵“Pambere ndindakulenge mu nthumbo ya ŵanyoko, ine nkhakumanya. Pambere undababike, ine nkhakupatula. Nkhakwimika kuŵa nchimi, ku ŵamitundu.”

⁶Ntheura ine nkhati, “Awe, imwe FUMU Chiuta! Wonani, ine kuti nkhumanya kuyowoya chara, pakuti ndichali mwana muchoko.”

⁷Kweni FUMU yikati kwa ine, “Ureke kuyowoya kuti, ‘Ine ndichali mwana muchoko.’ Iwe wamkuruta ku wose awo ndamkukutumako, ndipo wamkuyowoya chilichose icho ndamkukulangula.

⁸Ureke kopa iwo, pakuti ine ndili nawe kuti ndikuthaske.” Ntheura ndimo FUMU yikuyowoyera.

⁹Penepapo FUMU yikanyoroska woko lakhe, na kukhwaska mlomo wane, ndipo yikandiphalira kuti, “Wona, ndaŵika mazgu ghane mu mlomo wako.

¹⁰Muhanya uno ndakwimika iwe kuti uŵe na mazaza pa mafuko na pa maufumu, kuti uzgure na kubwangandula, kuti uwiskire pasi na kuparanya, kuti uzenge na kupanda.”

¹¹Mazgu gha FUMU ghakiza kwa ine ghakati, “Yeremiya, kasi ukuwona vichi?” Ine nkhazgora nkhati, “Nkhuwona munthavi wa khuni la alimondi.”

¹²Penepapo FUMU yikati kwa ine, “Wawona makora. Ichi chikung'anamula kuti nkhulaŵisiska kuti mazgu ghane ghakufiskika nadi.”

¹³Mazgu gha FUMU ghakiza kwa ine kachiŵiri ghakati, “Kasi ukuwona vichi?” Ine nkhazgora nkhati, “Nkhuwona chiŵiya cha maji ghakuŵira, chasendemukira ku mwera.”

¹⁴Penepapo FUMU yikati kwa ine, “Kufumira ku dera la ku mpoto ndiko kwizirenge chinthu chiheni icho chiti chiŵawire ŵanthu wose awo ŵakukhara mu charu ichi.”

¹⁵Ntheura FUMU yikuti, “Wona, nditi ndicheme mafuko ghose gha maufumu gha ku mpoto. Ŵakaronga ŵawo ŵizamkwiza, ndipo waliyose wizamkwimika chizumbe chakhe pa muryango wa vipata vya Yerusalemu. Ŵizamkuzingirizga malinga ghakhe ghose, ndiposo na misumba yose ya mu charu cha Yuda.

¹⁶Ndizamkuphara weruzgi wane wakususka ŵanthu ŵane chifukwa cha uheni wawo wose pakundireka ine. Ŵakaperekanga vyakununkhira ku ŵachiuta ŵanyakhe, na kusopa vikozgo ivyo ŵakanozga na mawoko ghawo.

¹⁷Kweni iwe Yeremiya, vwara zikhore. Wuka ukaŵaphalire vyose ivyo nkhukulangula. Ureke kopa iwo, mzire ndikofye panthazi pawo.

¹⁸Muhanya uno ine ndakukhozga iwe nga ndi msumba wa malinga, mzati wa chisulo, ndiposo na viliŵa vya mkuŵa, kwimikana na charu chose, ŵakaronga ŵa charu cha Yuda, nduna, ŵasofi ŵakhe ndiposo na ŵanthu ŵanyakhe wose ŵa mu charu.

¹⁹Ŵamkurwa nawe, kweni kuti ŵamkukutonda chara pakuti ine ndili nawe ndipo ndizamkukuthaska.” Ntheura ndimo FUMU yikuyowoyera.