Read new_tumbuka_bible Yeremiya 10 Bible Online

Yeremiya 10 - new_tumbuka_bible bible

Yeremiya 10

¹Imwe ŵaIsraele, pulikani mazgu agho FUMU yikuyowoya kwa imwe.

²FUMU yikuti, “Mungasambiranga makhaliro gha ŵamitundu chara, nesi kuthika lusoko na vimanyikwiro vya kuchanya, nangauli ŵamitundu ŵakuthika navyo lusoko.

³Pakuti maluso gha ŵanthu aŵa nga wakawaka. Iwo ŵakutema khuni mu thengere, ndipo musiri wakuliŵajaŵaja na mbavi.

⁴Ŵakulitozga khuni lira na siliva na golide, ŵakulikhozga pakulikhoma na mizumali, kuti lireke kuwa.

⁵Vikozgo ivi vili nga ndi vyakofyera, mu munda wa vinkhaka, pakuti ivyo kuti vikuyowoya chara. Ivi vikwenera kuviyegha, pakuti vingayenda vyekha chara. Mureke kopa ivyo, pakuti vingamuchitirani kanthu kaheni chara, nesi kuchita kalikose kaweme.”

⁶Kulije na yumoza wakuyana imwe, Mwe FUMU, Imwe ndimwe ŵakuru, ndipo zina linu nda nkhongono zikuru.

⁷Kasi ndi njani uyo wangareka kumuchindikani imwe, Mwe Karonga wa mafuko? Pakuti kumuchindikani ndiko kukumwenererani. Mukati mu ŵavinjeru wose mu mafuko, na mu maufumu ghawo ghose, mulije na yumoza wakuyana na imwe.

⁸Wose mbazereza ndiposo nvindere, visambizgo vya vikozgo nvyawakawaka.

⁹Siliva la kufura kunozgera vikozgo, likufumira ku charu cha Tarishishi, ndipo golide likufumira ku charu cha Ufazi. Vikozgo vyawo ndi mlimo wa ŵasiri na ŵafuzi. Ŵakuvivwarika vyakururupira na vichesamu, ndipo vyose ndi mlimo wa zinkhwantha.

¹⁰Kweni FUMU ndiyo Chiuta wa unenesko, Iyo ndiyo Chiuta wamoyo ndiposo Karonga wa muyirayira. Para wakaripa, charu chikutenthema, ndipo ŵamitundu kuti ŵangamanya chara, kuzizipizga ukari wakhe.

¹¹Ukayowoye ntheura ku ŵanthu ŵara, “Ŵachiuta aŵa ŵeneawo kuti ŵakalenga mtambo na charu cha pasi chara, ŵizamkumara mu charu, kuti ŵizamkuŵakoso palipose chara.”

¹²“FUMU ndiyo yikalenga charu na nkhongono zakhe, ndiyo yikimika vinthu vyose na vinjeru vyakhe, ndipo ndiyo yikatandazga mitambo na umanyi wakhe.

¹³Para yikuyowoya, maji ya ku mlengalenga ghakududumira, ndiyo yikukwezga nyathutwe, kufuma ku mphererekezgo za charu. Yikumwetuska ŵaleza ŵa vura, yikuputiska mphepo kufuma uko yikuyisunga.

¹⁴Munthu yose ndi muzereza na wambula mahara, mufuzi yose wakukhozgeka soni na ŵangoza ŵakhe. Vikozgo vyakhe ndi vya utesi, vilije na muvuchi.

¹⁵Ndi vya wakawaka, ndi mlimo wakupusika waka, pa zuŵa la weruzgi vyamkumara petu.

¹⁶Chiuta uyo ndi phande la Yakhobe, kuti wakuyana na ivyo chara. Iyo ndiyo wali kulenga vinthu vyose, Israele ndi fuko ilo iyo wali kusankha, zina lakhe ndi FUMU Mwenenkhongono zose.”

¹⁷Imwe ŵanthu ŵa mu Yerusalemu wunganyani katundu winu, mwaŵeneimwe mwazingirizgika na ŵarwani.

¹⁸Pakuti FUMU yikuti, “Pa nyengo iyi ndiŵaponyenge kutali, ŵanthu awo ŵakukhara mu charu ichi. Nditi ndiŵaŵike mu visuzgo, mwakuti ŵapulike.”

¹⁹Ŵanthu ŵa mu Yerusalemu ŵakuti, “Soka kwa ise chifukwa cha kupwetekeka kwithu, chilonda chithu ncha zoza. Kweni kale tikati ichi nchilango chithu, tikwenera kuzizipizga waka.

²⁰Mahema ghithu ghapankhuka, vingwe vyakhe vyose vyadumuka. Ŵana ŵithu ŵatichimbira, ndipo ŵalikoso chara. Palije na yumoza wakutovwira kuzengaso msasa withu, panyakhe uyo wangaŵikapo salu zakuchinga.”

²¹Kweni Yeremiya wakati, Ŵarongozgi mbazereza, ŵalije kuyipenja FUMU. Pa chifukwa ichi vinthu vikaŵaŵira makora chara, ndipo mberere zawo zose zambininika.

²²Pulikani, kukwiza mphwepwerezgo, chivulupi chikuru kufuma ku charu cha ku mpoto, yikwiza kuti yiparanye misumba ya charu cha Yuda, kuyizgora kuŵa mapopa ghakukharamo ŵakambwe.

²³Mwe FUMU, ine nkhumanya kuti umoyo wa munthu ngwakhe chara, na kutiso munthu walije kumanya, kujirongozga yekha.

²⁴Mwe FUMU, mundichenye kweni mu urunji. Mureke kundichenya para mwakaripa mzire ndimare petu.

²⁵Pungulirani ukari winu pa mitundu iyo kuti yikumumanyani chara, pa ŵanthu awo kuti ŵakusopa zina linu chara. Iwo ŵali kukoma ŵa mphapu ya Yakhobe. Iwo ŵali kuŵamara petu, ndipo ŵali kupankhura malo ghawo ghakukharamo.