Read new_tumbuka_bible Yeremiya 11 Bible Online

Yeremiya 11 - new_tumbuka_bible bible

Yeremiya 11

¹Mazgu gha FUMU ghakiza kwa Yeremiya ghakati,

²“Pulika mazgu gha phangano ili ndipo uŵaphalire ŵaYuda na awo ŵakukhara mu Yerusalemu.

³Uŵaphalire kuti FUMU, Chiuta wa Israele wakuti, ‘Ngwakutembeka munthu uyo wakureka kupulikira mazgu gha phangano ili,

⁴leneilo nkhaŵalangula ŵasekuru ŵinu, apo nkhaŵafumyanga mu charu cha Eguputo apo nkhaŵafumya mu viphyo vikuru. Nkhaŵaphalira kuti usange ŵakundipulikira na kuchita chose icho nkhuŵalangula, penepapo ndipo ŵaŵenge ŵanthu ŵane, ndipo ine nditi ndiŵenge Chiuta wawo.’

⁵Ntheura ndizamkufiska ivyo nkharapa ku ŵasekuru ŵinu, kuti, ‘Ndiŵapenge charu cha mkaka na uchi, charu icho mukukharamo sono.’ ” Penepapo ine nkhazgora nkhati, “Kuŵe ntheura FUMU.”

⁶FUMU yikati kwa ine, “Pharazga mazgu ghose agha mu misumba ya charu cha Yuda, na mu misewu ya mu Yerusalemu. Uŵaphalire kuti, ‘Pulikani mazgu gha phangano ili, na kughachita.’

⁷Pakuti kaŵirikaŵiri nkhaŵachenjezga ŵawiskemwekuru na mtima wane wose kufuma apo nkhaŵafumyiranga mu charu cha Eguputo mpaka na sono. Ine nkhatenge, ‘Pulikirani mazgu ghane.’

⁸Ndipouli kuti ŵakapulikira chara nanga nkhupwererako. Waliyose wakarondezga kunonofyeka kwa mtima wakhe uheni. Ntheura nkhaŵalanga kwakuyana na mazgu ghose gha phangano ili leneilo nkhaŵalangula kuchita, kweni kuti ŵakalichita chara.”

⁹Ntheura FUMU yikati kwa ine, “Nkhawona kuti ŵaYuda na awo ŵakukhara mu Yerusalemu ŵakundigarukira.

¹⁰Ŵanthu aŵa ŵawereraso ku maubendezi gha ŵawiskewokuru, ŵeneawo ŵakakana kundipulikira. Ŵarondezga ŵachiuta ŵanyakhe na kuŵateŵetera. ŴaIsraele na ŵaYuda, ŵaswa phangano lane ilo nkhachita na ŵawiskewokuru.

¹¹Pa chifukwa ichi FUMU yikuti, ‘Nditi ndiŵaŵike mu visuzgo ivyo ŵalije na kumanya umo ŵangaponera. Nangauli ŵangalira kwa ine, kuti nditi ndiŵapulike chara.’

¹²Ŵanthu ŵa mu misumba ya mu charu cha Yuda na ŵa mu Yerusalemu ŵati ŵarute kuya kalira ku ŵachiuta ŵeneawo ŵakuŵawochera sembe ya vyakununkhira. Kweni kuti ŵakumanya kuŵathaska chara para visuzgo vyaŵawira.

¹³Imwe ŵaYuda, ŵachiuta ŵinu mbanandi, ŵakuyana waka na misumba yinu. Majochero agho mwaghimika kocherapo vyakununkhira kwa chiuta Baala uyo wakukhozga soni, ghakuyana waka unandi nga ndi misewu ya mu Yerusalemu.

¹⁴“Ntheura iwe Yeremiya ungaŵaromberanga ŵanthu aŵa chara nesi kuŵaphepiskira nanga nkhuŵaŵeyerera. Ine kuti ndizamkuŵapulika chara apo ŵizamkulirira kwa ine para visuzgo vyaŵawira.

¹⁵Kasi wakutemweka wane wali na mazaza uli mu nyumba yane apo iyo wakuchita vya ukazuzi? Kasi virapo na nyama yakupereka ku sembe vingamanya kumuvikirirani ku soka linu? Kasi vingamanya kumusanguruskani?

¹⁶Kale FUMU yikamuchemani kuti, ‘Khuni liŵisi la maolive, la kutowa na la vipambi viweme.’ Kweni na mphomo yikuru ya chimphupuru, nditi ndiyiwoche na moto, ndipo minthavi yakhe yiti yinyeke yose.

¹⁷FUMU Mwenenkhongono zose, iyo yikamupandani mu charu nga khuni, yayowoya chiheni icho chikwiza pa imwe chifukwa cha uheni uwo mwachita imwe ŵaIsraele na ŵaYuda. Imwe mwandavya kuti ndikaripe, chifukwa mwamochera chiuta Baala sembe ya vyakununkhira.”

¹⁸FUMU yikandivumbulira ndipo nkhamanya milimo yiheni ya ŵanthu.

¹⁹Ine nkhaŵa nga ndi mwana-mberere wakuzika, uyo wakurongozgeka kuya kakomeka. Ine nkhamanya chara kuti ŵakanozgeranga chiŵembu, para ŵakayowoyanga kuti, “Tiyeni timuparanye pamoza na mazgu ghakhe, nga ndi khuni pamoza na vipambi vyakhe. Tiyeni timuwuskemo mu charu cha ŵamoyo, mwakuti zina lakhe lireke kukumbukikaso.”

²⁰Kweni imwe, Mwe FUMU Mwenenkhongono zose, mukweruzga mu urunji, mukusanda mtima na maghanoghano gha munthu. Mundirongore kuti mwawezgera nduzga, chifukwa mrandu wane ndili kuwupereka kwa imwe.

²¹Ntheura za ŵanthu ŵa mu msumba wa Anatoti, ŵeneawo ŵakukhumba kundikoma, FUMU yikandiphalira kureka kuchima mu zina lakhe mzire ŵandikome.

²²Ntheura FUMU Mwenenkhongono zose yikuti, “Nditi ndiŵalange. Ŵawukirano ŵawo ŵati ŵakomekenge mu nkhondo. Ŵana ŵawo ŵanarume na ŵanakazi ŵati ŵafwenge na njara.

²³Palije na yumoza uyo wizamkupona pakuti ndizamkuparanya ŵanthu ŵa mu msumba wa Anatoti, mu chirimika icho ndizamkuŵalangira.”