Read new_tumbuka_bible Yeremiya 12 Bible Online

Yeremiya 12 - new_tumbuka_bible bible

Yeremiya 12

¹Mwe FUMU, ndimwe ŵarunji ndipera, nanga ine ndingasuskana namwe. Ndipouli nditi ndimudandaulirani za mrandu wane panthazi pinu. Kasi nchifukwa uli ŵanthu ŵaheni vinthu vikuŵayendera makora? Kasi nchifukwa uli ŵaryarya ŵakukhara makora?

²Imwe ndimwe mukuŵapanda ndipo ŵakujintha misisi. Iwo ŵakukura na kupambika vipambi. Ŵakutemwa kuyowoya vya imwe, ndipouli mitima yawo yili kutali na imwe.

³Kweni imwe, Mwe FUMU mukundimanya ine, mukundiwona ndipo mukuyezga kuti mtima wane uli na imwe. Muŵaguzire kuwaro nga ndi mberere na mbuzi zakuya kakomeka, muŵapatule kulindirira zuŵa la kukomekera.

⁴Kasi charu chiti chiŵenge chakomira mpaka pauli, ndipo utheka uŵenge wakufota mu minda yose mpaka pauli? Vinyama na viyuni vikufwa waka, chifukwa cha uheni wa ŵanthu, awo ŵakukhara mwenemumo. Iwo ŵakuti, “Chiuta wati wawonenge chara umaliro withu.”

⁵FUMU yikati, “Usange uli kupharizganapo na ŵanthu kwenda pasi, ndipo wakakuvuska kasi ungapharizgana uli na mahachi? Usange ukukhuŵara mu charu umo muli makora ghene, kasi wamkuchintha uli mu matundu gha Yorodani?

⁶Nanga ndi ŵana ŵanyako na ŵa mu mbumba yakwako, nawoso ŵakukuchitira mu upusikizgi. Iwo mbakupulikana nkhanira kuti ŵimikane nawe. Ureke kuŵagomezga, nanga ŵangakuyowoyera mazgu ghaweme.”

⁷Ndaŵapata ŵanthu ŵane, ndalireka fuko ilo nkhalisankha. Nditi ndimupereke wakutemweka wa pa mtima wane, mu mawoko gha ŵarwani ŵakhe.

⁸Ŵanthu awo nkhaŵasankha ŵazgoka kwa ine nga ndi nkharamu mu thengere. Ŵakundibangulira mwa ukari. Pa chifukwa ichi nkhuŵatinkha.

⁹Kwa ine ŵanthu ŵane ŵakusankhika ŵali nga ndi twana twa chimbwe,[3] uto twazingirizgika na makhuŵi. Viyuni ivyo vikurya nyama, vikutuwukira na kutuzinga kwete. Rutani mukawunganye vinyama vyose vya mu thengere, mwize navyo kuti vizakarye.

¹⁰Ŵarongozgi ŵanandi ŵananga munda wane wa mpheska, ŵakandirizgira pasi munda wane. Ŵawuzgora munda wane uweme, kuŵa mapopa ghambula kanthu.

¹¹Ŵawuzgora kuŵa mayiyi, pakuŵa mayiyi, ukutengerera kwa ine. Charu chose chazgoka mayiyi, kweni kulije na uyo wakupwererako.

¹²Ŵakukoma ŵizamo, mu malo ghose gha pachanya gha mu chiparamba. Pakuti nkhondo ya FUMU yikukoma, kufuma ku mphaka yimoza kuya kafika ku mphaka yinyakhe. Palije na yumoza uyo wali mu mutende.

¹³Ŵanthu ŵane ŵapanda tirigu, kweni ŵavuna minga, ŵajivuska kweni ŵandurapo kalikose chara. Ŵati ŵakhozgekenge soni na ivyo ŵavuna, chifukwa cha ukari wakofya wa FUMU.

¹⁴Pa vya vyaru vyose viheni ivyo vyazingirizga ŵaIsraele vyeneivyo vili kuphanga charu icho yili kuŵapa ŵaIsraele, FUMU yikuti, “Nditi ndiŵauskemo mu charu chawo ndipo nditi ndiŵathaske ŵaYuda mukati mwawo.

¹⁵Para ndaŵawuskamo, nditi ndiŵe na chiwuravi na iwo na kuwezgeraso fuko lirilose ku malo ghakhe na ghakhe na ku charu chakhe na chakhe.

¹⁶Ndipo usange ŵangasambira mendero gha ŵanthu ŵane na phamphu na kurapa mu zina lane kuti, ‘Nkhurapira mwa FUMU,’ nga ndi umo iwo ŵakasambizgira ŵanthu ŵane kurapira mu zina la chiuta Baala, penepapo ndipo ŵati ŵakhazikike mukati mu ŵanthu ŵane.

¹⁷Kweni usange fuko lirilose liti lireke kupulikira, nditi ndiliwuskemo nkhanira na kulimara petu.” Ntheura ndimo FUMU yikuyowoyera.