Read new_tumbuka_bible Yeremiya 13 Bible Online

Yeremiya 13 - new_tumbuka_bible bible

Yeremiya 13

¹FUMU yikati kwa ine, “Ruta ukagule nkhwamba ya salu ya bafuta, na kuvwara mu luwunda lwako, kweni ungayibizganga mu maji chara.”

²Ntheura nkhayakagula nkhwamba nga ndi umo FUMU yikandilangulira ndipo nkhavwara mu luwunda lwane.

³Mazgu gha FUMU ghakiza kwa ine kachiŵiri ghakati,

⁴“Tora nkhwamba iyo wagula, yeneiyo wavwara mu luwunda lwako ndipo ruta ku mronga wa Perata, ukayibise kwenekura mu mphanji ya jarawe.”

⁵Ntheura nkharuta ndipo nkhayibisa ku mronga wa Perata nga ndi umo FUMU yikandilangulira.

⁶Ghakati ghajumphapo mazuŵa ghanandi, FUMU yikati kwa ine, “Wuka, rutaso ku mronga wa Perata na kukatora nkhwamba iyo nkhakulangula kuti ubise.”

⁷Ntheura ine nkharuta ku mronga wa Perata, ndipo nkhati ndajima, nkhatora nkhwamba yira pa malo apo nkhabisa. Kweni nkhasanga kuti nkhwamba njakunangika, kuti yingaŵaso na nchito chara.

⁸Penepapo mazgu gha FUMU ghakiza kwa ine kuti,

⁹“FUMU yikuti, ntheura ndimo ndizamkunangira vyose ivyo ŵaYuda na ŵa mu Yerusalemu ŵakuthumbwiramo.

¹⁰Ŵanthu ŵaheni aŵa ŵeneawo ŵakukana kupulikira mazgu ghane na kurondezga kunonofyeka kwa mitima yawo yiheni ndiposo na ŵachiuta ŵanyakhe, kuŵateŵetera na kuŵalambira, ŵati ŵaŵenge nga ndi nkhwamba iyi, yeneiyo kuti yingaŵaso na nchito chara.

¹¹Nga ndi umo lamba lukukhozgera chakuvwara mu chiuno, ntheura ndimo nkhanozgera ŵaIsraele na ŵaYuda kuti ŵademerere kwa ine kuti wose ŵaŵenge ŵanthu ŵane mwakuti ŵizakatumbike zina lane na kulichindika. Kweni iwo ŵalije kupulikira.” Ntheura ndimo FUMU yikuyowoyera.

¹²“Ukaŵaphalire ŵanthu mazgu agha kuti FUMU, Chiuta wa Israele wakuti, ‘Mu chiŵiya chilichose cha vinyo ŵazuzgemo vinyo.’ Sono iwo ŵizamkuti kwa iwe, ‘Ise tikumanya makora ghene kuti mu chiŵiya chilichose ŵazuzgengemo vinyo.’

¹³Iwe ukaŵazgore kuti, FUMU yikuti, ‘Nditi ndiŵamweske vinyo ŵanthu wose ŵa mu charu ichi mpaka ŵaroŵere nkhanira: Ŵakaronga awo ŵakuhalira chizumbe cha Davide, ŵasofi, nchimi, na wose awo ŵakukhara mu Yerusalemu.

¹⁴Nditi ndiŵabwanyizge nga ndi viŵiya yumoza ku munyakhe, kubwanyizga ŵawiskewo na ŵana ŵawo. Kuti ndiŵenge na lusungu na iwo chara, nesi kuŵa na chitima na iwo, panji kuŵa nawo na chiwuravi, kuti ndireke kuŵamara petu.’ ” Ntheura ndimo FUMU yikuyowoyera.

¹⁵Pulikani ndipo mutegherezge, mungathumbwanga chara pakuti FUMU ndiyo yayowoya.

¹⁶Chindikani FUMU, Chiuta winu, pambere wandatume mdima, pambere malundi ghinu ghandakhuŵare, mu mapiri umo mdima wayambako. Imwe mukupenja ungweru, kweni iyo wakuwuzgora kuŵa mdima, na kuwusintha kuŵa chisi chikuru.

¹⁷Kweni usange murekenge kupulikira, nditi ndimulirirani mu ubende, chifukwa cha kujikuzga kwinu. Nditi ndilire chomene, ndipo masozi ghizamkuthika mu maso ghane, pakuti ŵanthu ŵa FUMU ŵati ŵatorekere ku umikori.

¹⁸Umuphalire karonga na ŵanyina kuti, “Fumanipo pa vizumbe vyinu, pakuti mphumphu za uchindami winu, zawa kufuma ku mitu yinu.

¹⁹Misumba ya ku mwera yajarika, ndipo palije na yumoza uyo wangayijula. ŴaYuda ŵatorekera ku umikori, nadi wose ŵayorekera ku umikori.

²⁰“Inuska maso ghako uwone, awo ŵakwiza kufumira ku mpoto. Kasi zili nkhu mberere izo zikapika kwa iwe, mskambo uwo ukathumbwanga nawo?

²¹Kasi wizamkuchita uli, para awo ukaŵazgowera kuti mbabwezi ŵako, ndiwo ŵakukuthereska na kukuwusa iwe? Asi vyakuŵinya viti vikukore, nga ndi vya mwanakazi pa nyengo ya kubaba?

²²Usange ungajifumba kuti, ‘Chifukwa uli vinthu ivi vyandiwira?’ Nchifukwa cha unandi wa maubendezi ghako, kuti ŵakabenekura vyakuvwara vyako na kukukorerera.

²³Kasi muEtiyopiya wangasintha chikumba chakhe, panji kasi nyalubwe wangasintha maŵanga ghakhe? Usange ndi ntheura, namwe mungachita uweme chara, mwaŵeneimwe mwazgoŵera kuchita uheni.

²⁴Nditi ndimuchupurani nga ndi mwerero uwo ukuputwa na mphepo ya mu chiparamba.

²⁵Ichi ndicho chakugaŵikira, phande ilo ndakugaŵira iwe, chifukwa mwandiruwa ine, na kugomezga mu ŵachiuta ŵa utesi.” Ntheura ndimo FUMU yikuyowoyera.

²⁶“Ine nditi ndikubenekule vyakuvwara, uku iwe ukulaŵiska mwakuti soni zako ziwonekere pakweru.

²⁷Ndaghawona maukazuzi ghako, mauleŵe na maulamphalampha ghako, ndiposo na mauzaghali ghako, gheneagho ukuchita ku thengere pa malo ghapachanya ghakusoperako. Soka kwa imwe ŵa mu Yerusalemu, kasi kumutorerani nyengo uli, kuti muŵe ŵakutozgeka?”