Read new_tumbuka_bible Yeremiya 14 Bible Online

Yeremiya 14 - new_tumbuka_bible bible

Yeremiya 14

¹Mazgu gha FUMU agho ghakiza kwa Yeremiya kuphara na chilangalanga ndi agha:

²“Charu cha Yuda chikutengera, misumba yakhe yathika lusoko. Ŵanthu ŵakhe ŵakukunkhura pasi, ŵakutengera. Kulira kwa ŵanthu ŵa mu Yerusalemu, kwakwera chomene.

³Ŵarongozgi ŵakutuma ŵateŵeti ŵawo kuya kanegha maji. Ŵakwiza ku visimi vya maji, kweni ŵakusanga kuti mulije maji. Ntheura ŵakuwera na viŵiya vyawo vyambula kanthu. Ŵakuchita soni na kumara mahara, ndipo ŵakubisa visko vyawo.

⁴Charu chang'aruka, chifukwa vura kulije, ŵalimi ŵakuchita soni, ndipo ŵakubisa visko vyawo.

⁵Nanga ndi mphoyo mu thengere, yikusida mwana wakhe wakubabika waka, chifukwa utheka kulije.

⁶Ŵaboli nawo ŵakwimilira waka mu mapiri gha chiparamba, ŵakupungizga mphepo nga mbakambwe. Maso ghawo ghakutondeka kulaŵiska, chifukwa kulije utheka.

⁷Ŵanthu ŵakuti, ‘Nangauli ubendezi withu ukutipanikizga, chitanipo kanthu, Mwe FUMU, chifukwa cha zina linu. Pakuti tawerera nyuma chomene, tamunangirani nadi.’

⁸Imwe ndimwe chigomezgo cha ŵaIsraele, muponoski wawo mu nyengo ya visuzgo. Kasi mukuŵirachi nga ndi mulendo mu charu, nga ndi munthu wakwenda, uyo wakupanjwapo waka usiku umoza?

⁹Kasi mwaŵirachi nga ndi munthu uyo watimbanizgika, nga ndi chinkhara icho chilije na kumanya kuthaska? Ndipouli, Mwe FUMU, muli mukati mwithu, ndipo ise ndise ŵinu. Mureke kutisida.”

¹⁰Pa vya ŵanthu aŵa, FUMU yikuti, “Ŵakutemwa kuyingayinga waka, ŵakutondeka kuzizipizga. Ndicho chifukwa FUMU yikucha nawo chara. Yiti yikumbuke ubendezi wawo, na kuŵalanga chifukwa cha zakwananga zawo.”

¹¹FUMU yikati kwa ine, “Ungaromberanga ŵanthu aŵa chara kuŵakhumbira viweme.

¹²Nanga ŵaziŵizge kurya, kuti ndipulike kulira kwawo chara. Nanga ŵapereke sembe zakocha na chakupereka cha ufu, kuti nditi ndipokererenge chara. Kweni nditi ndiŵamare na nkhondo, na njara ndiposo na nthenda yakofya.”

¹³Ntheura ine nkhati, “Mwe FUMU Chiuta, nchimi zawo zikuŵaphalira ŵanthu kuti, ‘Muti mufwenge na nkhondo chara, nanga nkhuŵa na njara. Kweni wati wamupani mutende wenecho mu malo agha.’ ”

¹⁴Kweni FUMU yikandizgora yikati, “Nchimi zikuchima utesi mu zina lane. Ine kuti nkhazituma chara, nanga nkhuzilangulira, nesi kuziyowoyera. Zikumuchimirani mboniwoni za utesi kwa imwe. Zikuroska vinthu vya wakawaka ndiposo vikuyowoya vinthu vya kupusika vyakufuma mu maghanoghano ghawo.”

¹⁵Ntheura pa vya nchimi izo zikuchima mu zina lane, FUMU yikuti, “Ine kuti nkhazituma chara. Ndipouli izo zikuti, ‘Nkhondo panji njara kuti viti vizenge mu charu ichi chara.’ Nchimi izi ziti zimarenge na nkhondo na njara.

¹⁶Ŵanthu awo zikuŵachimira ŵati ŵaponyeke mu misewu ya mu Yerusalemu. Ŵawoli ŵawo, na ŵana ŵawo ŵanarume na ŵanakazi ŵati ŵafwe na njara na nkhondo mwakuti kuŵavyenge na yumoza wa kuŵasunga mu dindi. Nadi ndizamkupungulira uheni wawo pa iwo ŵenecho.”

¹⁷Ŵanthu aŵa uŵaphalire mazgu agha, uti, “Maso ghane ghalire masozi, muhanya na usiku kwambula kurekezga. Pakuti ŵanthu ŵane ŵakusoreka ŵali na vilonda vya zoza ndipo ŵatimbika chomene.

¹⁸Usange nkhuruta ku thengere, nkhuwona ŵanthu awo ŵakomeka na lupanga. Usange nkhunjira mu msumba, nkhuwona ŵanthu ŵakurwara chifukwa cha njara. Nchimi na ŵasofi ŵakuchita milimo yawo mu charu, kweni kuti ŵakumanya ivyo ŵakuchita chara.”

¹⁹Mwe FUMU, kasi ŵaYuda mwaŵakanirathu? Kasi mwaseruka na msumba wa Ziyoni? Kasi mwatitimbirachi, mwakuti tireke na kuchira? Tikagomezganga kuti tiŵenge mu mutende, kweni palije na kaweme. Tikagomezganga nyengo ya kuchizgikira, kweni kuli suzgo pera.

²⁰Mwe FUMU, ise tikuzomera ubendezi withu, na uheni wa ŵasekuru ŵithu, ise tili kumunangirani nadi.

²¹Chifukwa cha zina linu, mureke kutikana, mureke kuyuyura Yerusalemu, chizumbe cha uchindami winu. Mukumbuke phangano linu na ise, ndipo mureke kuswa phangano ili.

²²Kasi ŵalipo ŵachiuta ŵa utesi ŵa ŵamitundu, awo ŵangamanya kurokweska vura? Kasi mitambo yingamanya kurokweska vura, pa iyo yekha. Chara, kweni imwe, Mwe FUMU, Chiuta withu, ise tikugomezga mwa imwe, pakuti ndimwe mukuchita vyose ivi.