Read new_tumbuka_bible Yeremiya 15 Bible Online

Yeremiya 15 - new_tumbuka_bible bible

Yeremiya 15

¹Penepapo FUMU yikati kwa ine, Nanga Mozesi na Samuele ŵangimilira panthazi pane kuŵaŵeyerera ŵanthu aŵa, ine kuti ndingaŵalengera lusungu chara. Ŵawuskapo panthazi pane, ŵareke ŵarutenge!

²Para ŵakukufumba kuti, “Kasi tirutenge nkhu?” Iwe uŵaphalire kuti FUMU yikuti, “Awo ŵapimikira kufwa na nthenda yakofya, ŵafwenge na nthenda yakofya, awo ŵapimikira kufwa na nkhondo ŵafwenge na nkhondo, awo ŵapimikira kufwa na njara ŵafwenge na njara, ndipo awo ŵapimikira kuruta ku umikori, warutenge ku umikori.”

³FUMU yikuti, “Nditi ndiŵatumire vinthu vinayi vyakukoma: nkhondo, ncheŵe zakuŵaruma, viyuni vya mudera na vikoko vya mu charu kuti viŵarye na kuŵamara.

⁴Nditi ndiŵazgore kuŵa chinthu chakuseruska ku maufumu ghose gha mu charu cha pasi, chifukwa cha icho wakachita Manase, mwana wa Hezekiya, karonga wa charu cha Yuda mu Yerusalemu.”

⁵FUMU yikuti, “Imwe ŵa mu Yerusalemu, kasi ndi njani uyo wangaŵa na chiwuravi na imwe? Ndi njani uyo wati wamutengereraninge imwe? Ndi njani uyo wati wapatuke, kwiza kamufumbani za umoyo winu.”

⁶FUMU yikuti, “Imwe mwandipata ine, ndipo mukurutilira kuwerera nyuma. Ntheura ndawuska woko lane kuti ndimumarani, ine vyalema kugowoka kaŵirikaŵiri.

⁷Nditi ndiŵapete na lupetero, kuŵafumiska mu misumba ya charu. Ndaŵazgora iwo kuŵa ŵakufwirwa pakuti ndaŵaparanya. Iwo ŵalije kureka nthowa zawo ziheni.

⁸Ndasazgirako unandi wa vyokoro vyawo, kuruska muchenga mu mphepete mwa nyanja. Nkhakoma ŵanyamata, ndipo nkhachitiska kuti ŵanyinawo ŵasuzgike. Mwamabuchibuchi ndaŵakhizgira vyakuŵinya na chofyo chikuru.

⁹Uyo wakababa ŵana ŵankhonde na ŵaŵiri, wakakomwa na kuthika lusoko. Dazi likumunjilira apo kukaŵa kuchali muhanya. Wati wakhozgeke soni na kulengeskeka. Awo ŵakharako ŵamoyo nditi ndiŵapereke ku ŵarwani ŵawo, kuti ŵakomeke la lupanga.” Ntheura ndimo FUMU yikuyowoyera.

¹⁰Soka kwa ine, mwe amama, pakuti mukandibaba ine, munthu uyo ŵanthu wakutemwa kumususka na kwambana nayo mu charu chose cha pasi. Ine ndilije kumutewuliskapo kanthu munthu, nanga ndine kuti ndili kutewulapo kanthu kwa munthu chara. Ndipouli ŵanthu wose ŵakunditemba.

¹¹Kweni FUMU yikazgora, yikati, “Nditi ndikuthaske kuti vinthu vikuŵire makora. Nadi ŵarwani ŵako ŵati ŵaŵeyerere kwa iwe mu nyengo ya visuzgo na ya vyakuŵinya.

¹²Kasi munthu wangamanya kuphyora chisulo, chomenechomene chisulo chakufumira ku mpoto chakusazgikana na mkuŵa?

¹³“Chifukwa cha zakwananga zinu mu charu chinu chose, nditi ndipereke chuma chinu na usambazi winu kuti viskogheke kwambula kupokapo kanthu.

¹⁴Nditi ndimuzgorani kuti muteŵetere ŵarwani ŵinu mu charu icho imwe kuti mukuchimanya chara. Nadi ukari wane uli nga ndi moto wakugolera ndipo ugolerenge kwa muyirayira.”

¹⁵Ntheura ine nkhati, “Mwe FUMU, imwe ndimwe mukumanya. Mundikumbuke na kundovwira, muwezgere nduzga pa awo ŵakundizikizga. Mukuzizipizga kwinu, mureke kunditaya, manyani kuti ine nkhutombozgeka chifukwa cha imwe.

¹⁶Para nkhapulikanga mazgu ghinu, nkhaghapokerera nga chakurya. Mazgu ghinu ghakazgoka kuŵa chimwemwe kwa ine, na ghakukondweska mtima wane. Pakuti ine ndine winu na winu, Mwe FUMU, Chiuta Mwenenkhongono zose.

¹⁷Ine kuti nkhakharamo mu ungano wa awo ŵakuhoya chara nanga nkhukondwera pamoza nawo. Nkhakhara pa ndekha, chifukwa mazaza ghinu ghakaŵa pa ine, ndipo mukandizuzga na ukari.

¹⁸Kasi nchifukwa uli vyakuŵinya vyane vikumara chara? Chilonda chane kuti chikuchizgika chara nesi kupora. Kasi muŵenge kwa ine nga ndi kamronga kakupusika, ako maji ghakhe ghakukamuka?”

¹⁹Ntheura FUMU yikuti, “Usange ukuwerera kwa ine nditi ndikupokerere, ndipo uti unditeŵeterenge ine. Usange ukuyowoya ivyo nvyakuzirwa, vyawaka chara, uti uŵenge wakundiyowoyera ine. Iwo ŵati ŵizenge kwa iwe, kweni iwe kuti uzgokerengeso kwa iwo chara.

²⁰Nditi ndikuzgore iwe kuŵa wakukhora, nga ndi linga la mkuŵa. Iwo ŵati ŵarwe nawe, kweni kuti ŵakuthereskenge chara, pakuti ine ndili pamoza nawe kuti ndikuponoske na kukuthaska. Ntheura ndimo FUMU yikuyowoyera.

²¹Nditi ndikuthaskenge ku ŵanthu ŵaheni, ndipo nditi ndikuwombolenge ku ŵanthu ŵankhaza.”