Read new_tumbuka_bible Yeremiya 16 Bible Online

Yeremiya 16 - new_tumbuka_bible bible

Yeremiya 16

¹Mazgu gha FUMU ghakiza kwa ine ghakati,

²“Ungatoranga mwanakazi mu charu ichi chara, nesi kuŵa na ŵana ŵanarume panji ŵanakazi.

³Pa vya ŵana ŵanarume na ŵana ŵanakazi ŵeneawo ŵakubabika mu charu ichi na pa vya ŵanyinawo awo ŵakubaba ŵana aŵa mu charu ichi, FUMU yikuti,

⁴Iwo ŵati ŵafwenge na nthenda zakofya. Ŵanthu kuti ŵati ŵaŵatengerere chara, nesi kuŵasunga mu dindi. Ŵati ŵaŵenge nga mbulongwe pa charu. Ŵati ŵamare na nkhondo ndiposo na njara. Vitanda vyawo viti viŵenge chakurya cha viyuni vya mudera na vikoko vya mu thengere.”

⁵Pakuti FUMU yikuti, “Unganjiranga mu nyumba ya chitengero chara, nesi kurutako kuya katengera nanga nkhupembuzga awo ŵakutengera. Pakuti ndawuskako chimango chane ku ŵanthu aŵa pamoza na chisungusungu chane na chiwuravi chane. Ntheura ndimo FUMU yikuyowoyera.

⁶Wose ŵakuru na ŵachoko ŵati ŵafwenge mu charu ichi. Nyifwa zawo kuti zisungikenge mu dindi chara ndipo ŵizamkuŵatengerera chara. Palije uyo wamkujichekacheka panji kumeta masisi kurongora chitima.

⁷Kuŵavye munthu na yumoza wakupereka chakurya kwa uyo wakutengera kuti wamusanguruske, nanga ndi chakumwa kwa uyo wiske panji nyina ndiyo ŵafwa kuti waŵasanguruske.”

⁸FUMU yikuti “Unganjiranga mu nyumba ya chiphikiro chara, na kukhara nawo kuti urye nawo na kumwa nawo pamoza.

⁹Pakuti FUMU Mwenenkhongono zose, Chiuta wa Israele wakuti, ‘Nditi ndichetamiske mazgu gha kusangwa, gha kukondwa, gha mwene-nthengwa, na gha mutengwa pa malo agha, mu nyengo yinu imwe ukuwona.’ ”

¹⁰“Para ukuŵaphalira ŵanthu aŵa mazgu agha, ŵati ŵakufumbe kuti, ‘Kasi nchifukwa uli FUMU yapereka chinthu cha ntheura, chikuru na chiheni kwa ise? Kasi tachita chiheni uli? Kasi nkhwananga uli uko tachitira FUMU, Chiuta withu?’

¹¹Ntheura iwe ukaŵazgore kuti, ‘Nchifukwa chakuti ŵawiskemwe ŵakandireka ine. Ŵakarondezga ŵachiuta ŵanyakhe, ndipo ŵaŵateŵetera na kuŵasopa. Ŵakandireka ine ndipo kuti ŵakasungilira dango lane chara.’ ” Ntheura ndimo FUMU yikuyowoyera.

¹²“Kweni imwe mwananga chomene kuruska ŵawiskemwe pakuti, wonani, waliyose wa imwe wakurondezga kunonofyeka kwa mtima wakhe uheni pakukana kundipulikira ine.

¹³Pa chifukwa ichi nditi ndimufumyani mu charu ichi na kuya kamuŵikani ku charu icho imwe na ŵawiskemwe mulije kuchimanya. Kwenekuko mwakuteŵetera ŵachiuta ŵanyakhe muhanya na usiku, pakuti nditi ndiŵe na lusungu na imwe chara.”

¹⁴FUMU yikuti, “Ntheura, wonani, mazuŵa ghakwiza apo kwamkuyowoyeka chara kuti, ‘Nkhurapira mwa FUMU yeneiyo yikafumiska ŵaIsraele mu charu cha Eguputo.’

¹⁵Kweni kwizamkuyowoyeka kuti, ‘Nkhurapira mwa FUMU yeneiyo yikafumya ŵaIsraele kufuma ku mpoto, na ku vyaru vyose ivyo yikaŵachimbizgiramo.’ Pakuti ndamkuŵawezgeraso mu charu icho nkhaŵapa ŵawiskewokuru ŵawo.”

¹⁶FUMU yikuti, “Wonani nditi nditume ŵarwani ŵanandi awo ŵali nga ŵarovi kuti ŵaŵakore. Pamanyuma ndamkutuma ŵarwani awo ŵali nga ndi ŵachiŵinda kuti ŵaŵapenjerere mu mapiri ghose, mu tumapiri, na mu zimphanji.

¹⁷Ine nkhuwona mendero ghawo ghose. Kuti ngakubisika kwa ine chara nesi ubendezi wawo kuti ngwa kubisika kwa ine chara.

¹⁸Nditi ndiŵalange kaŵiri chifukwa cha ubendezi na kwananga kwawo pakuti ŵakazuzga charu chane na vikozgo vyambula umoyo na vya ukazuzi. Chiharo chane ŵachizuzga na vikozgo vyawo vyakuseruska.”

¹⁹Mwe FUMU, nkhongono zane na linga lane, ndimwe mphanji yane mu nyengo ya suzgo. Kwa imwe mafuko ghose ghati ghizenge, kufumira ku mphererekezgo za charu. Iwo ŵizamkuti, “Ŵasekuru ŵithu ŵalije kuhara kalikose, kweni ŵachiuta ngoza, awo ndi vikozgo vyawakawaka vyambula chandulo.

²⁰Kasi munthu wangamanya kujichitira yekha ŵachiuta? Inya, kweni ŵakuŵa ŵachiuta chara.”

²¹FUMU yikuti, “Ntheura nditi ndiŵamanyiske, pa nyengo iyi nditi ndiŵasambizge kamoza pera, kuti ŵamanye nkhongono yane na mankharo ghane. Penepapo ŵati ŵamanyenge, kuti zina lane ndine FUMU.”