Read new_tumbuka_bible Yeremiya 17 Bible Online

Yeremiya 17 - new_tumbuka_bible bible

Yeremiya 17

¹FUMU yikuti, “Imwe ŵaYuda, kwananga kwinu kwalembeka na chisulo. Kwazongeka na chakulembera cha libwe linonono la dayimondi mu mtima yinu na pa masengwe gha majochero ghinu.

²Nanga ŵangaŵa ŵana ŵawo ŵakusunga majochero ghawo na vikozgo vyawo vya Ashera ivyo vili musi mu khuni lose lakutandazga minthavi yakhe, pa tumapiri tutalitutali,

³na mu mapiri gha mu charu chose. Chuma chinu na usambazi winu pa malo gha pachanya ghakusoperako nditi ndivipereke nga vya kuskogha chifukwa cha kwananga kwinu uko kukuchitika mu charu chinu chose.

⁴Muti mutayenge charu icho nkhamupani kuŵa chiharo chinu. Nditi ndimuzgorani kuti muteŵetere ŵarwani ŵinu mu charu icho imwe kuti mukuchimanya chara. Nadi ukari wane uli nga ndi moto wakugolera ndipo ugolerenge kwa muyirayira.”

⁵FUMU yikuti, “Ngwakutembeka uyo wakugomezga munthu munyakhe, mweneuyo wakweghamira kwa munthu kuti wamovwire, kweni mtima wakhe wafumako ku FUMU yakhe.

⁶Iyo wali nga ndi chivwati cha mu chiparamba, kuti wati wawonenge kanthu kaweme chara. Wati wakharenge mu malo gha chinkhamwa mu mapopa, mu charu cha muchere chambula kukharamo ŵanthu.

⁷“Ngwakutumbikika munthu uyo wakugomezga FUMU, mweneuyo chigomezgo chakhe chili mwa FUMU.

⁸Wali nga ndi khuni, ilo lapandika mu mphepete mwa maji, ilo likuthazira misisi yakhe ku maji. Kuti likopa chara para kuli chithukivu, pakuti mahamba ghakhe ghakuŵa ghakubiriŵira nyengo yose. Kuti likwenjerwa chara mu chirimika cha chilangalanga, ndipo likurekapo chara kupambika vipambi.

⁹“Mtima wa munthu ngwa upusikizgi kuruska vinthu vyose, ndipo ngwa kubendera chomene. Kasi ndi njani uyo wangawumanya?

¹⁰Kweni ine FUMU nkhusanda mtima wa munthu, nkhuyezga maghanoghano ghakhe. Nkhumuchitira munthu waliyose, kwakuyana na mendero ghakhe, kwakuyana na vipambi vya milimo yakhe.”

¹¹Munthu uyo wakusambazga mu nthowa yiheni, wakuyana waka na nkhwali iyo yikufukatira ŵana, ŵeneawo kuti yikakonkhomora chara. Mukati mu mazuŵa gha umoyo wakhe, usambazi uti umarenge ndipo pa umaliro wati waŵenge wakupusa.

¹²Chizumbe cha uchindami, icho chikakwezgeka kufuma ku mutendeko ndicho malo ghithu ghakupatulika.

¹³Mwe FUMU, chigomezgo cha ŵaIsraele, wose awo ŵakumurekani imwe, ŵati ŵakhozgeke soni. Awo ŵakufumako kwa imwe, ŵati ŵamarenge mu charu. Pakuti ŵayisida FUMU, iyo ndi mbwiwi ya maji gha umoyo.

¹⁴Mwe FUMU, mundichizge, ndipo nditi ndichizgikenge nadi. Mundiponoske, ndipo nditi ndiponoskeke nadi, pakuti imwe ndimwe nkhumurumbani.

¹⁵Iwo ŵakundifumba ŵakuti, “Kasi mazgu gha FUMU ghali nkhu? Rekani ghize sono.”

¹⁶Ine kuti nkhukana kuŵa muliska winu chara.[4] Mukumanya kuti zuŵa na zuŵa ine kuti nkhuŵakhumbira soka chara. Vyose ivyo nkhayowoya imwe mukuvimanya.

¹⁷Mwe FUMU, mureke kundofya. Imwe ndimwe mphanji yane mu zuŵa la suzgo.

¹⁸Awo ŵakundizikizga ŵakhozgeke soni, kweni ine ndireke kukhozgeka soni. Ŵarekani ŵathike lusoko ndiwo, kweni ine ndireke kuthika lusoko Torerani pa iwo zuŵa la suzgo, muŵaparanye na kuŵamara petu.

¹⁹FUMU yikati kwa ine, “Ruta ukimilire pa Chipata cha Ŵanthu apo ŵakaronga ŵa charu cha Yuda ŵakunjirira na kufumira. Uruteso na mu vipata vyose vya mu Yerusalemu.

²⁰Ukayowoye kuti, ‘Pulikani mazgu gha FUMU imwe ŵakaronga na ŵaYuda, na imwe mose mukukhara charu cha Yuda na mu Yerusalemu, mwaŵeneimwe mukunjirira pa vipata ivi.

²¹FUMU yikuti: Chenjerani na umoyo winu, ndipo mureke kuyegha katundu pa zuŵa la Sabata nanga nkhunjira nayo pa vipata vya mu Yerusalemu.

²²Mungayeghanga katundu kufuma nayo mu nyumba zinu pa zuŵa la Sabata chara, nanga nkhuchita mlimo uliwose. Kweni musungenge zuŵa la Sabata kuŵa lakupatulika nga ndi umo nkhalangulira ŵawiskemwekuru.’

²³Ndipouli, kuti ŵakapulikira chara nesi kutegherezga, kweni ŵakanonofya mitima yawo mwakuti ŵareke kupulika na kupokerera chisambizgo chane.”

²⁴FUMU yikuti, “Kweni usange imwe mukupulikira ine na kureka kunjira na katundu winu pa vipata vya mu msumba uwu pa zuŵa la Sabata, ndiposo mukusunga zuŵa la Sabata pakulipatula na kureka kuchita mlimo pa zuŵa leneili,

²⁵ntheura ŵakaronga awo ŵakuhara chizumbe cha Davide, ŵati ŵanjire mu msumba uwu uku ŵakwera pa magareta na pa mahachi, iwo pamoza na nduna zawo ndiposo na ŵaYuda na awo ŵakukhara mu Yerusalemu. Msumba uwu uti uŵenge na ŵanthu kwa muyirayira.

²⁶Ŵanthu ŵizamkufumira ku misumba ya charu cha Yuda na mu vikaya kuzingirizga Yerusalemu, ku charu cha Benjamini, ku vyaru vya vidika, ku charu cha mapiri na ku charu cha ku mwera, uku ŵayegha sembe zakocha mburuma, sembe yakukoma, sembe ya ufu, sembe ya vyakununkhira ndiposo na sembe za kuwonga kuruta nazo ku Nyumba ya FUMU.

²⁷Kweni usange imwe mukureka kupulikira ine pakusunga zuŵa la Sabata kuŵa lakupatulika, ndipo mukureka mukuyegha katundu na kunjira nayo pa vipata vya Yerusalemu pa zuŵa la Sabata, penepapo ndamkocha vipata vyakhe. Moto wamkumyangura nyumba za ufumu mu Yerusalemu, ndipo kuti wamkuzimyika chara.”