Read new_tumbuka_bible Yeremiya 18 Bible Online

Yeremiya 18 - new_tumbuka_bible bible

Yeremiya 18

¹Mazgu gha FUMU ghakiza kwa Yeremiya ghakati,

²“Ruta ku nyumba ya muwuvi, ndipo kwenekura wamkupulika mazgu ghane.”

³Ntheura nkharuta ku nyumba ya muwuvi, ndipo nkhamusanga wakuchita mlimo pa mukombero wa viŵiya.

⁴Chiŵiya chose icho wakawumbanga, para wakawona kuti chikaŵa chiheni mu mawoko ghakhe, wakachiswanga, ndipo wakawumbangaso chiŵiya chinyakhe na dongo lenelira kwakuyana na umo iyo mwenecho wakakhumbiranga.

⁵Mazgu gha FUMU ghakiza kwa ine ghakati,

⁶“Imwe ŵaIsraele, kasi ine ndingachita kwa imwe chara nga ndi umo wachitira muwuvi uyu? Nadi nga ndi umo dongo liriri mu woko la muwuvi, ntheura ndimo muliri imwe ŵaIsraele mu woko lane.” Ntheura ndimo FUMU yikuyowoyera.

⁷“Usange pa nyengo yimoza nkhuyowoya ku fuko, panji ku ufumu, kuti nditi ndiwuzgurenge na kuwubwangandula na kuwumara petu,

⁸usange fuko leneilo nkhulichenjezga likureka uheni wakhe, nditi ndisinthe mtima wane pa chiheni icho ndangunozgera kulichitira.

⁹Ndipo usange pa nyengo yimoza nkhuyowoya ku fuko, panji ku ufumu kuti nditi ndiwuzenge na kuwupanga,

¹⁰usange ukuchita uheni panthazi pa ine, kureka kupulikira mazgu ghane, nditi ndisinthe mtima wane pa uweme uwo ndangunozgera kuwuchitira.”

¹¹FUMU yikuti, “Ntheura sono uŵaphalire ŵaYuda na awo ŵakukhara mu Yerusalemu kuti, ‘Ine nkhughanaghana kumuchitirani chinthu chiheni, nkhunozgera kwimikana namwe. Ntheura waliyose wa imwe wawereko ku mendero ghakhe ghaheni ndipo wanozge mendero ghakhe na machitiro ghakhe.’

¹²Kweni iwo ŵamkuzgora kuti, ‘Ichi nchambula nchito. Ise titi tirondezgenge ivyo tikughanaghana ndipo waliyose wa ise wati wachitenge kwakuyana na kunonofyeka kwa mitima wakhe uheni.’ ”

¹³Pa chifukwa ichi, FUMU yikuti, “Fumbilirani mu mafuko gha ŵanthu, kasi ndi njani uyo wali kupulikapo cha ntheura? ŴaIsraele awo ŵali nga ndi mwali wakulangwa, ŵachita chinthu cha kuseruska chomene.

¹⁴Kasi chiwuvi chikumara pa majarawe, gha mapiri ghakusendemuka gha Lebanoni? Kasi maji ghakhe ghakuzizira, kufuma ku mapiri ghakukamuka?

¹⁵Ndipouli ŵanthu ŵane ŵandiruwa, ŵakochera vyakununkhira ŵachiuta ŵawakawaka. Ŵakukhuŵara mu nthowa zawo, inya mu misewu yakumanyikwa ya mwaka. Kweni ŵenda mu tunthowa twa kuwuwa, mu misewu yambula kulimamo.

¹⁶Charu chawo ŵachizgora kuŵa chakuseruska, charu chakujumiska kwa muyirayira. Yose uyo wakajumphangapo wakazukumanga, na kupukunya mutu.

¹⁷Nditi ndiŵambininiske panthazi pa ŵarwani ŵawo, nga ndi mphepo ya ku mafumiro gha dazi. Nditi ndiŵarazgire nkhonyoro, chisko chane chara, mu zuŵa lawo la pharaniko.”

¹⁸Sono ŵanthu ŵanyakhe ŵakati, “Tiyeni timuchitire chiŵembu Yeremiya pakuti visambizgo vya ŵasofi kuti vimarenge chara, nesi urongozgi kufuma ku ŵanthu ŵavinjeru, panji nesi mazgu gha Chiuta kufuma ku zinchimi. Iwo tiŵenge nawo ndipera. Sono zaninge, tiyeni tisange vifukwa vyakumususkira ndipo tireke kughanaghanako vya mazgu ghakhe.”

¹⁹Ntheura nkharomba nkhati, “Mwe FUMU, pulikani kuŵeya kwane, pulikani ivyo ŵarwani ŵane ŵakuyowoya.

²⁰Kasi uheni ndiwo malipiro gha uweme? Ndipouli wandijimira mbuna. Kumbukani kuti nkhimilira panthazi pinu, kuti ndiŵayowoyere uweme, mwakuti muwezgeko ukari winu kwa iwo.

²¹Ntheura mupereke ŵana ŵawo kuti ŵafwe na njara, muŵapereke kuti ŵakomeke na lupanga. Ŵawoli ŵawo nawo ŵareke kuŵa na ŵana, ndipo ŵazgoke vyokoro. Ŵafumu ŵawo ŵafwe na nthenda yakofya, ŵanyamata ŵawo nawo ŵakomeke na lupanga ku nkhondo.

²²Chitengero chipulikikwe kufuma mu nyumba zawo, para mwamabuchibuchi mwaŵatumira ŵakuskogha. Pakuti iwo ŵandijimira mbuna kuti ndiwemo, ŵandithyera vipingo kuti malundi ghane ghawiremo.

²³Ndipouli imwe, Mwe FUMU, mukumanya chiŵembu chawo chose, na umo ŵakukhumbira kundikoma. Mungaŵagowokeranga ubendezi wawo chara, nanga nkhusisita zakwananga zawo panthazi pinu. Ŵathereskeke panthazi pinu, ndipo muŵalange para imwe mwakwiya.”