Read new_tumbuka_bible Yeremiya 19 Bible Online

Yeremiya 19 - new_tumbuka_bible bible

Yeremiya 19

¹FUMU yikati kwa ine, “Ruta, ukagule chiŵiya cha dongo kwa muwuvi. Utore ŵararaŵarara ŵanji ŵa ŵanthu ndiposo na ŵasofi.

²Mwendere ku Dambo la Hinomu pafupi na Chipata cha Madengere. Kwenekura ukapharazge mazgu agho nkhukuphalira.

³Ukapharazge kuti, ‘Imwe ŵakaronga ŵa charu Yuda, na imwe mukukhara mu Yerusalemu, pulikani mazgu gha FUMU. FUMU Mwenenkhongono zose, Chiuta wa Israele wakuti: Nditi ndikhizgire chinthu chiheni pa malo agha mwakuti yose uyo wapulikenge wati wachiruke.

⁴Pakuti ŵanthu ŵandisida na kukazuzga malo agha. Ŵocherapo vyakununkhira ku ŵachiuta ŵanyakhe ŵeneawo nanga ndiwo, panji ŵawiskewokuru nesi ŵakaronga ŵa charu cha Yuda kuti ŵakaŵamanya chara. Ndiposo pa malo gheneghano ŵathiskirapo ndopa za ŵanthu ŵambula mrandu.

⁵Ŵazenga malo gha pachanya ghakusoperako Baala, na kuperekerapo ŵana ŵawo kuŵa sembe zakocha pa moto kwa Baala. Ine kuti nkhaŵalangula kuchita ivi chara panji nesi kuvighanaghanako.’

⁶Ntheura FUMU yikuti, ‘Mazuŵa ghakwiza apo malo ghano ghizamkuchemekaso Tofeti chara, nesi Dambo la Hinomu, kweni kuti Dambo la Kukomeramo.

⁷Ndipo mu malo agha ndizamkutimbanizga ivyo ŵaYuda na awo ŵakukhara mu Yerusalemu ŵanozgera kuchita. Ndizamkuŵapereka ku nkhondo kuti ŵakomeke na ŵarwani ŵawo, kuŵa mu mawoko gha awo ŵakupenja umoyo wawo. Vitanda vyawo vizamkuŵa chakurya cha viyuni vya mudera na cha vikoko vya mu thengere.

⁸Ndamkuwuzgora msumba uwu kuŵa wakuseruska, uwo ŵanthu ŵakujuma nawo. Waliyose uyo wakujumphapo wamkuseruskika na kujuma chifukwa cha kupankhuka kwakhe kose.

⁹Ndizamkuchita kuti ŵarye ŵana ŵawo. Ŵizamkuryana ŵekha pera pa nyengo yakofya iyi apo ŵizamkujarizgika na ŵarwani ŵawo, ŵeneawo ŵakupenja umoyo wawo.’ ”

¹⁰Penepapo iwe ukaswe chiŵiya chira panthazi pa ŵanthu awo waruta nawo.

¹¹Ndipo ukati kwa iwo, “FUMU Mwenenkhongono zose yikuti: Ntheura ndimo nditi ndichitirenge na ŵanthu aŵa na msumba uwu, nga ndi umo muwuvi ŵakuswera chiŵiya kuti chireke na kunozgekaso. Pakuti ŵakufwa ŵizamkuŵasunganga ku Tofeti mpaka kwizakaŵavye malo.

¹²FUMU yikuti: Ntheura ndimo ndizamkuchitira na malo agha na ŵanthu awo ŵakukhara mwenemumo. Msumba weneuwo ndizamkuwuzgora nga ndi Tofeti.

¹³Nyumba za mu Yerusalemu na nyumba za ufumu za mu charu cha Yuda zamkukazuzgika nga za ku Tofeti, chifukwa pa mitenje ya nyumba zakhe ŵakocherangapo vyakununkhira ku nyenyezi za kuchanya, na kupungulirapo sembe za vyakumwa ku ŵachiuta ŵanyakhe.”

¹⁴Penepapo Yeremiya wakawerako ku Tofeti uko FUMU yikamutuma kuya kachima. Iyo wakiza kimilira pa baraza la Nyumba ya Chiuta ndipo wakayowoya ku ŵanthu wose ŵakati,

¹⁵“FUMU Mwenenkhongono zose, Chiuta wa Israele wakuti, ‘Nditi ndikhizgire pa msumba uwu na pa mizi iyo yazingirizga msumba uwu viheni vyose ivyo nkhayowoya kuti viŵengeko, chifukwa ŵanthu ŵanonofya mitima yawo ndiposo ŵakukana kupulika ivyo nkhuyowoya.’ ”