Read new_tumbuka_bible Yeremiya 2 Bible Online

Yeremiya 2 - new_tumbuka_bible bible

Yeremiya 2

¹Mazgu gha FUMU ghakiza kwa ine ghakati,

²“Ruta, ukapharazge ku ŵa mu Yerusalemu uku ŵakupulika. Iwe ukati, FUMU yikuti, ‘Nkhukumbuka kugomezgeka kwako kwa mu uwukirano wako, na kutemwa kwako uko kukaŵa nga ndi mwali, uyo wakuya ku nthengwa, na umo ukandirondezgera mu mapopa, mu charu chambula kupandamo kalikose.

³Iwe Israele ukaŵa wakupatulika kwa FUMU, ukaŵa nga ndi vipambi vyakudanga kucha vya vuna yakhe. Wose awo ŵakaryangako vipambi vyakhe, ŵakaŵanga na mrandu ndipo uheni ukizanga pa iwo.’ ” Ntheura ndimo FUMU yikuyowoyera.

⁴Pulikani mazgu gha FUMU, imwe ŵa mbumba ya Yakhobe ndiposo na imwe mose ŵaIsraele.

⁵FUMU yikuti, “Kasi mbuheni uli uwo ŵasekuru ŵinu ŵakasanga mwa ine, kuti ŵaŵe kutali na ine? Iwo ŵakarondezga vyawakawaka, ndipo wakazgoka kuŵa ŵawakawaka?

⁶Iwo kuti ŵakafumba chara kuti, ‘Kasi FUMU yili nkhu, iyo yikatifumya mu charu cha Eguputo, FUMU iyo yikatirongozga mu mapopa, mu charu cha chiparamba na zimbuna, charu cha chinkhamwa na cha chisi chikuru, charu icho na yumoza wakuporotamo, kwenekuko kukukhara na munthu chara?’

⁷Ine nkhiza namwe mu charu cha vyakuzara, kuti muryenge vipambi vyakhe viweme. Kweni para imwe mukati mwizamo, mukachikazuzga charu chane.

⁸Ŵasofi ŵakafumba chara kuti, ‘Kasi FUMU yili nkhu?’ Awo ŵakamanya marango kuti ŵakandimanya ine chara. Awo ŵakuwusa vyaru ŵakandigarukira. Nchimi zikachima mu zina la Baala, ndipo zikarondezga ŵachiuta ŵawakawaka.”

⁹“Pa chifukwa ichi ndichali kumupani mrandu, nditi ndisuske na ŵazukuru ŵinu wuwo.” Ntheura ndimo FUMU yikuyowoyera.

¹⁰“Sono yambukirani ku virwa vya ku Kitimu,[1] ku manjiliro gha dazi, mukawone, panji tumani munthu ku charu cha Kedara, ku mafumiro gha dazi, na kupenjerera chomene. Mwamkuwona kuti vinthu vya ntheura, vilije kuchitikapo na kale.

¹¹Kasi liriko fuko ilo liri kusinthapo ŵachiuta ŵakhe, nangauli kuti mbachiuta ŵeneŵene chara? Kweni ŵanthu ŵane ŵasinthiska Chiuta wa uchindami, na chikozgo icho nchawakawaka.

¹²Zizwani na cheneichi, imwe mitambo, ndipo chirukani na kuyangazuka.” Ntheura ndimo FUMU yikuyowoyera.

¹³“Pakuti ŵanthu ŵane ŵachita mauheni ghaŵiri: ŵandireka ine, mbwiwi ya maji gha umoyo, ŵajijimira ŵekha visimi, visimi vyakusweka ivyo vingasunga maji chara.”

¹⁴FUMU yikuti, “Kasi Israele ndi muzga, panji kasi wakababiwira mu nyumba nga ndi muteŵeti? Kasi nchifukwa uli ŵakumuskogha?

¹⁵Ŵarwani ŵamubangulira na kumuwurumira, nga ndi nkharamu. Iwo ŵazgora charu chakhe kuŵa mapopa, misumba yakhe kuŵa mahami, ghambula ŵanthu.

¹⁶Nawoso ŵanthu ŵa ku Memufisi na ŵa ku Tapanesi, misumba ya ku Eguputo, ŵaŵazgora ŵanthu ŵakhe kuŵa ŵazga.

¹⁷Asi vinthu ivi wajitorera pa iwe wekha, pakureka FUMU, Chiuta wako, para wakakurongozganga mu nthowa yiweme?

¹⁸Kasi sono uli na chandulo uli kuruta ku Eguputo, kuya kamwa maji gha mu mronga wa Nayelo? Panji kasi uli na chandulo uli kuruta ku charu cha Asiriya, kuya kamwa maji gha mu mronga wa Yufurate?

¹⁹Uheni wako ndiwo uti ukulange, kuwerera nyuma kwako ndiko kuti kukususke. Manyani na kupanikizga kuti nchinthu chiheni na chakuŵaŵa, kureka FUMU, Chiuta wako. Iwe kuti ukopa ine chara.” Ntheura ndimo FUMU, Chiuta Mwenenkhongono zose wakuyowoyera.

²⁰FUMU yikuti, “Pakuti kale ukaphyora goliwoli lako, na kubanthura vikondo vyako. Iwe ukati, ‘Ndimuteŵeteraninge chara.’ Nadi, pa phiri lose litali, na musi mu khuni lose lakutandazga minthavi yakhe, ukajikamanga kuchita uzaghali.

²¹Ndipouli nkhakupanda iwe nga ndi mpheska yiweme chomene. Mu kaŵiro kako kose ukaŵa nga ndi mbuto yakugomezgeka. Kasi sono wazgokerachi kuŵa mpheska yiheni, na kuŵa nga ndi ya mu thengere?

²²Nanga ugezere derere la nyoronyoro, panji sopo yinandi, ndipouli banga la uheni wako, lichali kuwoneka panthazi pane.” Ntheura ndimo FUMU Chiuta wakuyowoyera.

²³“Kasi ungayowoya uli kuti, ‘Ine kuti ndili kukazuzgika chara, kuti ndili kurondezga Baala chara’? Ghanaghana umo ukenderanga mu chidika mura, umanye icho wachita. Waŵa nga ndi ngamila yichoko, iyo yikuchimbira uku na uku.

²⁴Waŵa nga ndi boli uyo wali kuzgoŵera kukhara mu mapopa. Iyo wakupungizga mphepo, para wakukhumba mwanarume. Ndi njani uyo wangamukanizga makhumbiro ghakhe? Ŵanarume awo ŵakumukhumba kuti ŵakusuzgika chara, ŵakumusanga pa nyengo iyo wakukwerekera.

²⁵Reka kwenda mpaka skapato zimare ku malundi ghako, mpaka chigoromiro chako chomirwe. Kweni iwe ukati, ‘Palije icho ndingachita, pakuti ndatemwa ŵachiuta ŵachilendo, ndipo ndiwo nditi ndiŵarondezgenge.’ ”

²⁶FUMU yikuti, “Umo munkhungu wakukhozgekera soni para wakoreka, ndimo ŵaIsraele ŵati ŵakhozgekerenge soni, iwo ŵene, ŵakaronga ŵawo, nduna zawo, ŵasofi ŵawo na nchimi wuwo.

²⁷Iwo ŵakuti ku khuni, ‘Iwe ndiwe dada withu,’ ndipo ŵakuti ku libwe, ‘Iwe ndiwe ukatibaba.’ Pakuti ŵandirazgira nkhonyoro, mu malo mwa kurazga visko kwa ine. Kweni para ŵali mu visuzgo ŵakuti, ‘Zaninge mwize katiponoske!’

²⁸Kasi ŵachiuta awo mukapanga mwekha wali nkhu? Rekani iwo ndiwo ŵize usange ŵangamuponoskani, para imwe mwasuzgika. Pakuti iwe Yuda uli na ŵachiuta ŵanandi waka nga ndi umo yiliri misumba yako.

²⁹“Kasi nchifukwa uli mukundisuska ine? Mose mwandigarukira ine.” Ntheura ndimo FUMU yikuyowoyera.

³⁰“Nanga nkhaŵalanga ŵana ŵinu, ndipouli kuti ŵakalorako chara. Lupanga lwinu na lwinu lukakoma nchimi zinu, nga ndi nkharamu yakuzwatula.”

³¹Imwe ŵanthu ŵa muwiro wa sono, pulikani mazgu gha FUMU agho ghakuti, “Kasi ine nkhaŵa nga ndi mapopa kwa Israele, panji charu cha mdima wa bii? Kasi nchifukwa uli ŵanthu ŵane ŵakuti, ‘Ise tili ŵanangwa, kuti tizengeso kwa imwe chara.’

³²Kasi mwali wangaruwa vitoweskero vyakhe, panji mwali uyo wakutengwa, wangaruwa chakuvwara chakhe cha nthengwa? Ndipouli ŵanthu ŵane ŵandiruwa ine, pa mazuŵa ghanandi ghambula kupendeka.

³³Mukumanya chomene nthowa zakupenjera vibwezi. Ntheura mwasambizga nthowa zinu, nanga nkhu ŵanakazi ŵaheni wuwo.

³⁴Ndipo mu vyakuvwara vyinu, muli ndopa za ŵakavu ŵambula mrandu. Ŵanthu ŵara kuti mukaŵasanga ŵaswa nyumba chara, ndipouli mu vyose ivi,

³⁵imwe mukuti, ‘Tili ŵambula mrandu, nadi ukari wa FUMU watuna sono’. Kweni ine nditi ndimweruzgani, chifukwa mukuyowoya kuti, ‘Tilije kwananga.’

³⁶Kasi mukuyingayingirachi ntheura, pakusintha nthowa zinu? Mwizamkukhozgeka soni na Eguputo, nga ndi umo mukakhozgekera soni na Asiriya.

³⁷Mwizamkufuma ku malo gheneagho, uku mwaŵika mawoko ghinu pa mutu, chifukwa FUMU yaŵakana awo imwe mukuŵagomezga. Imwe kuti movwirikenge na iwo chara.”